29/08/2022
Uli Hoeness - Bayern's Legacy Builder
أولي هونس Uli Hoeness تزاد فالخامس من يناير سنة 1952 فمدينة أولم فجنوب ألمانيا ، دوز طفولة نوعا ما عادية بحيث أنه كان كيمشي المدرسة و فأوقات الفراغ كان كيساعد الأب ديالو لي كان جزار فالمحل لي كانت العائلة كاملة خدامة فيه , و فين غادي يتعلم هونس الشيء الكثير لي غادي يعاونو فالمستقبل ديالو باش يكتب الإسم ديالو بأحرف من ذهب فتاريخ العملاق البافاري .
هونس بدا كرة القدم فنادي صغير TSG Ulm فالمدينة ديالو فين تعلم أبجديات الكرة و تبين أنه غادي يكون واحد من أحسن المواهب فالكرة الألمانية .
من بعد ما كان فنادي صغير فالمدينة ديالو لقا راسو فالبايرن وسط مجموعة كبيرة من النجوم أبرزها الاسطورة جيرد مولر, لكن تمكن هونس من انه يضمن المكانة ديالو داخل الفريق و يكون عنصر جد مؤثر فتحقيق ألقاب كبيرة مع جيل تاريخي لي تمكن من تحقيق البوندسليغا ثلاث مرات و دوري أبطال أوروبا ثلاث مرات متتالية و تمكن من الفوز بكأس العالم سنة 1974.
هونس كان انسان لي نقدرو نقولو أنه كان سابق الزمان ديالو ، اللاعب كان كيركز على الجانب التسويقي بالموازاة مع الكرة ديالو ، و الأكثر من ذلك فكان كيربح منو أكثر بكثير من الربح لي كان كيحقو بالكرة من خلال اشهارات تلفزيونية ، توقيع كتب و حاجات آخرة ، كما انه كان سبب مباشر فأول صفقة لمستشهر غير رياضي فالتاريخ ديال البايرن من بعد ما سير المفاوضات ما بين النادي و المستشهر و هادشي كيبين انه أولي كان visionnaire فالزمان ديالو .
المسيرة ديال هونس كلاعب غادا تعرف النهاية ديالها مبكرا من بعد ما تلقى فنهائي دوري الأبطال ضد Leeds إصابة قوية على مستوى الركبة لي عمرو ما تعافى منها بشكل كامل و هادشي لي خلاه يحبس الكرة سنة 1979 باش ياخد المنصب ديال Manager فوحدة من أصعب الاوقات لي داز منها البايرن لي كان كيعاني من أزمة مالية كبيرة و لي كانت معاها حتى أزمة نتائج لكن هونس خدا المنصب و عطى وعد بلي غادي يخلي البايرن مامحتاجش لفلوس التذاكر من بعد ما كانت هي مصدر الربح الاساسي للفريق .
كان الهدف ديال هوينس هو يحول النادي من مجرد فريق كيلعب الكرة إلى ماركة تجارية كبيرة كاتحقق الربح ديالها من مصادر مختلفة و متنوعة ، لكن قبل ذلك دار هوينس الصفقة لي غادا تخرج الفريق من الأزمة بانتقال كارل هاينز رومينيغي للإنتر ب 11 مليون مارك ألماني لي كان ثاني أغلى انتقال فداك الوقت و من الفلوس لي ربح جاب واحد من أحسن اللاعبين لي دازو فالبايرن لوطار ماطاوس ، و من تما إلى يومنا هذا البايرن debt free .
من بعد ذلك قرر هونس يمشي لأمريكا باش يشوف و يتعلم من les modèles الناجحين للفرق فدوريات NFL و NBA و بعد الرجوع ديالو بسنوات قرر انه يبني ملعب خاص للبايرن Allianz Arena لي كيتعتابر إرث خلاه هوينس للفريق.
سنة 2013 كانت سنة فيها أحاسيس مختلطة للرجل من بعد الفوز ديالو بلقب دوري الابطال كرئيس للنادي تورط هونس بقضية التهرب من الضرائب و تحكم عليه بثلاث سنوات و نصف من السجن ، و بعد الخروج ديالو ترشح لولاية أخرى لرئاسة النادي و تمكن من حصد %98 من الاصوات .
هوينس رجل لي الراحة النفسية و الجسدية ديالو كاترتابط اشد الارتباط بنجاح البايرن ، فنا عمرو فبناء إرث و اتستقلال و عظمة العملاق البافاري ، تنحى على الرئاسة سنة 2019 و رغم ذلك كاتلقاه فكل مباراة للبايرن وسط الملعب كيشجع الفريق لي ساهم فالبناء ديالو .
Uli Hoeness ' Du bist der best Mann '
