29/07/2026
🔥🔴⚽️ ຄວາມແຕກຕ່າງ ລະຫວ່າງ 🇱🇦 ທີມຊາດລາວ ແລະ ທີມອື່ນໃນອາຊຽນ ໂດຍສະເພາະ ການດວນກັບ 2 ທີມແຖວໜ້າຂອງພາກພື້ນຄື: 🇹🇭 ທີມຊາດໄທ ແລະ 🇲🇾 ທີມຊາດມາເລເຊຍ❗️
------------------------
✍️ ບົດຄວາມນີ້ ແອັດມິນ ຂໍອະນຸຍາດສະເໜີແລກປ່ຽນນຳແຟນບານ ພາຍຫລັງໄດ້ຊົມການແຂ່ງຂັນ 2 ນັດຜ່ານມາຂອງທີມຊາດລາວ ໃນການຊິງແຊ້ມອາຊຽນ AFF Hyundai Cup 2026 ຖ້າທ່ານມີຂໍ້ຄິດເຫັນອັນໃດ ຢາກຮ່ວມແລກປ່ຽນ ກໍສາມາດມີສ່ວນຮ່ວມນໍາກັນໄດ້.
🔴 ດັ່ງທີ່ພວກເຮົາຮູ້ນຳກັນວ່າ: ທີມຊາດໃດໜຶ່ງ ຫາກຫວັງຈະສ້າງຜົນງານໃຫ້ດີໃນການເຂົ້າຮ່ວມລາຍການໃດໜຶ່ງ ຕົນຕ້ອງເປັນທີ່ເພິ່ງຂອງຕົນເອງກ່ອນ ເຮົາຕ້ອງມີຄວາມພ້ອມຮອບດ້ານ ໂດຍສະເພາະ ການກຽມທີມ, ຄຸນນະພາບ-ສັກກະຍະພາບຂອງນັກກິລາ, ລວມໄປເຖິງ ເຕັກນິກ, ຍຸດທະວິທີ, ການວາງເກມທີ່ສຽບຂາດ ແລະ ຄູຝຶກທີ່ແກ້ເກມດີ, ສິ່ງເຫຼົ່ານີ້ ເປັນປັດໄຈພື້ນຖານ ໃນການວັດກັບຄູ່ຕໍ່ສູ້, ແຕ່ເປັນຫຍັງ ຄຳເວົ້າທີ່ວ່າ: ເຂົາກະ 11 ຄົນ ເຮົາກະ 11 ຄົນ ເປັນຫຍັງຄືສູ້ເຂົ້າບໍ່ໄດ້, ມັນມີຄວາມແຕກຕ່າງດັ່ງລຸ່ມນີ້:
1️⃣ ຄຸນນະພາບ-ສັກກະຍະພາບຂອງນັກກິລາ ຍົກຕົວຢ່າງງ່າຍໆ: ຄວາມເຂັ້ມຂຸ້ນ ກໍຄືຂີດຄວາມສາມາດຂອງນັກກິລາລາວ ເມື່ອປຽບທຽບໃສ່ນັກກິລາໄທ 🇹🇭 ແລະ ມາເລເຊຍ 🇲🇾 ຊຸດນີ້ ເຮົາຍັງເປັນຮອງເຂົາຫລາຍ, ເຖິງວ່າໄດ້ຄັດນັກກິລາມາຈາກລີກສູງສຸດຂອງປະເທດ ແຕ່ລະດັບລີກຂອງພວກເຮົາ ຍັງເປັນຮອງທັງໄທ ແລະ ມາເລເຊຍ ຫລາຍເທົ່າ, ໂດຍສະເພາະ ຄວາມເຂັ້ມຂຸ້ນໃນການຍາດແຍ່ງແຂ່ງຂັນ ທີ່ສົ່ງຜົນຕໍ່ການພັດທະນາຂີດຄວາມສາມາດຂອງນັກກິລາ, ລີກລາວ ຢູ່ອັນດັບ 38 ຂອງທະວີບ, ສ່ວນລີກໄທ ຢູ່ອັນດັບ 7 ແລະ ມາເລເຊຍ ຢູ່ອັນດັບ 11 ຂອງທະວີບ, ນີ້ຍັງບໍ່ນັບ Ranking ຫລື ອັນດັບໂລກຂອງທີມຊາດ ເຮົາກໍຍັງຢູ່ຫລັງເຂົາ; ສະໂມສອນຈາກລີກໄທ ແລະ ມາເລເຊຍ ແມ່ນໄດ້ສິດໄປແຂ່ງຂັນຊິງແຊ້ມສະໂມສອນລະດັບສູງສຸດຂອງທະວີບເຊັ່ນ: AFC Champions League Elite (ລະດັບ1) ລວມທັງ AFC Champions League Two (ລະດັບ2), ສ່ວນສະໂມສອນຈາກລາວ ໄດ້ໂຄຕ້າພຽງໄປແຂ່ງຂັນລະດັບ 3 ຂອງທະວີບ AFC Challenge League ທຽບໃສ່ເອີຣົບ ກໍຄື UEFA Conference League.
🔴 ແລ້ວເຮັດຈັງໃດ ເຮົາຈຶ່ງຈະສູ້ເຂົາໄດ້ ຫລື ຍົກລະດັບໄປເທົ່າກັບເຂົາ ຫລື ແຊງເຂົາ?
- ຄວາມຈິງທິດສະດີກໍມີແລ້ວ! ແຕ່ການຈັດຕັ້ງປະຕິບັດຈະໄດ້ຫລືບໍ່ ຍັງເປັນສິ່ງທ້າທາຍທີ່ສຸດ!! ເຮົາຕ້ອງມີງົບປະມານໃນການລົງທຶນໃສ່ລີກ ແລະ ໃສ່ສະໂມສອນ ເໝືອນກັບຫລາຍປະເທດກຳລັງພະຍາຍາມໃນປັດຈຸບັນ ແຕ່ກໍບໍ່ໄດ້ໝາຍວ່າ: ມັນຈະດີສະເໝີໄປ ແມ້ແຕ່ລີກໃຫຍ່ຊັ້ນນຳລະດັບໂລກ ກໍຍັງບໍ່ໄດ້ດັ່ງເປົ້າໝາຍ ຊຶ່ງເປັນຕ່ອງໂສ້ເຖິງທີມຊາດ. ແຕ່ມັນຈະເປັນພື້ນຖານທີ່ດີ ໃນການສ້າງລີກ ແລະ ສ້າງນັກກິລາໃຫ້ແຂງແກ່ນ ເພື່ອຍາດແຍ່ງແຂ່ງຂັນໃນຕໍ່ໜ້າ.
- ການລົງທຶນໃສ່ລີກ ແລະ ສະໂມສອນ ບໍ່ແມ່ນເລື່ອງງ່າຍ ຕ້ອງມີແຫຼ່ງລາຍຮັບທີ່ໝັ້ນຄົງ ຍືນຍົງ, ຍົກຕົວຢ່າງສະໂມສອນໃນລີກໄທ ແລະ ມາເລເຊຍ ໃນແຕ່ລະລະດູການຕ້ອງມີເງິນໝູນວຽນບໍລິຫານຫລາຍລ້ານໂດລາສະຫະລັດ, ເມື່ອມີການລົງທຶນເພື່ອຍົກລະດັບລີກ ແລະ ສະໂມສອນ ກໍມີການຍາດແຍ່ງແຂ່ງຂັນຢ່າງເຂັ້ມຂຸ້ນ ມີຄວາມເປັນມືອາຊີບສູງ, ສາມາດດຶງເອົານັກກິລາທີ່ເກັ່ງ ມີຊື່ສຽງເຂົ້າມາຍົກລະດັບລີກ ແລະ ນັກກິລາພາຍໃນກໍຈະແຂງແກ່ນ ສາມາດເຄັ້ນຟອມ ແລະ ສັກກະຍະພາບຂອງຕົນໄດ້ດີຂຶ້ນ, ຢ່າລືມວ່າ: ມີລີກທີ່ແຂງແກ່ນ ຈະໄດ້ນັກກິລາທີ່ດີ ມີຄຸນນະພາບສູງ.
- ອັນຕໍ່ມາ ຄືການສ້າງເງື່ອນໄຂ-ນະໂຍບາຍ ດຶງເອົານັກເຕະບານເຊື້ອສາຍລາວ ທີ່ຢູ່ລີກຕ່າງປະເທດ ທີ່ມີຜົນງານພົ້ນເດັ່ນ ມາຊ່ວຍທີມ, ຈຸດນີ້ ເຫັນວ່າ: ຫລາຍຊາດໃນອາຊຽນ ແລະ ອາຊີ ກໍມີນະໂຍບາຍນີ້ ເພື່ອເສີມສ້າງຄວາມແຂງແກ່ນໃຫ້ກັບທີມ. ພວກເຮົາເຫັນບໍ່ວ່າໃນການແຂ່ງຂັນຄັ້ງນີ້ ແລະ ຄັ້ງຜ່ານໆມາ: ບາງຊາດເຊັ່ນ: ມາເລເຊຍ, ກຳປູເຈຍ, ຟີລິບປິນ ແລະ ຫວຽດນາມ ຍັງເອົານັກເຕະບໍ່ມີເຊື້ອສາຍຊາດຕົນເອງ ໂອນສັນຊາດມາຊ່ວຍທີມ.
- ສ່ວນເລື່ອງຄູຝຶກ ກໍສຳຄັນເຊັ່ນກັນ ຫາກໄດ້ຄູຝຶກສີມືດີ ປະສົບການສູງ ມາຊ່ວຍຍົກລະດັບ ພັດທະນາທີມ ກໍຄືນັກກິລາ ກໍຈະຊ່ວຍໃຫ້ທີມປະສົບຜົນສຳເລັດຕາມຄາດໝາຍ, ແຕ່ຄູຝຶກທີ່ໂປຣຟາຍດີ ມີຄ່າຈ້າງບໍ່ຖືກແນ່ນອນ.
2️⃣ ສະຫະພັນບານເຕະຂອງປະເທດ: ຕ້ອງມີລະບົບການກໍ່ສ້າງ ແລະ ພັດທະນານັກກິລາຢ່າງຕໍ່ເນື່ອງ ແລະ ຍືນຍົງ ນັບຕັ້ງແຕ່ລະດັບຮາກຫຍ້າຈົນໄປເຖິງທີມຊຸດໃຫຍ່, ຊຶ່ງປັດຈຸບັນ ເຫັນວ່າ: ສະຫະພັນບານເຕະແຫ່ງຊາດລາວ (ສຕລ) ປະຕິບັດໄດ້ດີສົມຄວນ ຕາມງົບປະມານທີ່ມີ, ແຕ່ຖ້າມີງົບເພີ່ມຕື່ມ ຄວນເພີ່ມກິດຈະກຳການເຄື່ອນໄຫວແຂ່ງຂັນໃຫ້ຫລາກຫລາຍຂຶ້ນ ທັງພາຍໃນ ແລະ ຕ່າງປະເທດ ເພື່ອສ້າງໂອກາດໃຫ້ນັກກິລາໄດ້ເສີມຄວາມແຂງແກ່ນ ແລະ ໄດ້ລຸ້ນແຊ້ມລະດັບເຍົາວະຊົນ-ໄວໜຸ່ມ ໃນລາຍການຕ່າງໆລະດັບພາກພື້ນ ແລະ ສາກົນ.
- ສຳລັບລີກລາວ ປັດຈຸບັນ ສະຫະພັນບານເຕະແຫ່ງຊາດລາວ (ສຕລ) ໄດ້ມີໂຄງສ້າງຂອງລີກ ທີ່ປະຕິບັດຕາມມາດຖານ, ເງື່ອນໄຂ ຂອງສະຫະພັນບານເຕະສາກົນ (FIFA) ແລະ ສະຫະພັນບານເຕະອາຊີ (AFC) ພ້ອມທໍາການຊຸກຍູ້ໃຫ້ສະໂມສອນພາຍໃນ ມີມາດຖານ-ເງື່ອນໄຂ ເປັນສະໂມສອນທີ່ຜ່ານເກນຂອງ AFC ຫລື Club Licensing ເພື່ອຊຸກດັນຍົກລະດັບໃຫ້ເປັນສະໂມສອນແບບຢ່າງ ມີມາດຕະຖານ ແລະ ຍືນຍົງ. ສະໂມສອນໃດ ຫາກຜ່ານເງື່ອນໄຂນີ້ ຈຶ່ງຈະໄດ້ເຂົ້າຮ່ວມແຂ່ງຂັນໃນລະດັບພາກພື້ນ ແລະ ສາກົນ, ເຊິ່ງທາງ ສຕລ ເພິ່ນເປີດກວ້າງ ພ້ອມຕ້ອນຮັບທຸກພາກສ່ວນ ມາຮ່ວມພັດທະນາບານເຕະລາວ.
🔴 ສຳລັບ ຈຸດທີ່ວ່າ: ປະຊາກອນສຳຄັນບໍ່? ກັບການສ້າງທີມຊາດໃຫ້ແຂງແກ່ນ? ຈຸດນີ້ ຫລາຍທ່ານກໍເຫັນຕົວຢ່າງມາແລ້ວວ່າ: ບາງທີມຊາດ ເຖິງວ່າ: ປະຊາກອນໜ້ອຍ ກໍຍັງໄປ ບານໂລກ ຮອບສຸດທ້າຍໄດ້ ເຊັ່ນວ່າ: ທີມຊາດແຄັບເວີດ ນ້ອງໃໝ່ ໃນບານໂລກ 2026 ມີປະຊາກອນບໍ່ເຖິງ 600,000 ຄົນ ລວມທັງ ທີມຊາດຄູຣາເຊົາ ປະຊາກອນບໍ່ເຖິງ 200,000 ຄົນ ກໍຍັງສາມາດໄປ ບານໂລກ 2026 ຮອບສຸດທ້າຍໄດ້, ເລື່ອງນີ້ ມັນຢູ່ທີ່ການໃຫ້ຄວາມສໍາຄັນ, ການບໍລິຫານຈັດການ ແລະ ທ່າແຮງຂອງປະເທດນັ້ນໆ, ເບາະບາງປະເທດປະຊາຊົນເປັນຕື້ ຫລື ຫລາຍຮ້ອຍລ້ານຄົນ ຍັງບໍ່ໄດ້ໄປບານໂລກ ຫລື ບໍ່ເຄີຍໄປບານໂລກຮອບສຸດທ້າຍເລີຍ.
🔴 ສິ່ງໜຶ່ງທີ່ສໍາຄັນ ຍຸກນີ້ ວິທະຍາສາດການກິລາ ແມ່ນມີສ່ວນສໍາຄັນຫລາຍ ໃນທຸກປະເພດກິລາ ເພາະຈະຊ່ວຍໃນດ້ານສັກສະຍາພາບຂອງນັກກິລາ, ການພັດທະນາກຳລັງ-ຮ່າງກາຍ ໂດຍສາມາດວິເຄາະຄຸນນະພາບຂອງນັກກິລາໄດ້. ນອກຈາກນີ້ ກໍແມ່ນເລື່ອງຂອງໂພສະນາການ: ອາຫານການກິນ ທີ່ສາມາເສີມສ້າງສຸຂະພາບຮ່າງກາຍໃຫ້ແຂງແຮງ ແລະ ສົມບູນ.
🔴 ອີກສິ່ງທີ່ແອັດມິນ ຢາກໃຫ້ເອົາໃຈໃສ່ຫລາຍສຸດຄື: ລະບຽບວິໄນຂອງນັກກິລາ ຄືໂຕນຳພາສູ່ຄວາມສຳເລັດ, ຖ້າຂາດສິ່ງນີ້ ສີມືດີກໍໄປສຸດ ‼️
Photo: LaoFF
