ພະແນກສຶກສາທິການ ແລະ ກິລາແຂວງ ສາລະວັນ

ພະແນກສຶກສາທິການ ແລະ ກິລາແຂວງ ສາລະວັນ Contact information, map and directions, contact form, opening hours, services, ratings, photos, videos and announcements from ພະແນກສຶກສາທິການ ແລະ ກິລາແຂວງ ສາລະວັນ, Sport & recreation, Saravane.

ຂໍສະແດງຄວາມໂສກເສົ້າເສຍໃຈ ອາໄລຮັກຢ່າງສຸດຊຶ້ງ ຕໍ່ການຈາກໄປຂອງສະຫາຍ ວິໄຊ ຍະລາດ ອະດີດຮອງຜູ້ອໍານວຍການ ສູນການສຶກສາ ນອກໂຮງຮຽນແຂ...
29/07/2026

ຂໍສະແດງຄວາມໂສກເສົ້າເສຍໃຈ ອາໄລຮັກຢ່າງສຸດຊຶ້ງ ຕໍ່ການຈາກໄປຂອງສະຫາຍ ວິໄຊ ຍະລາດ ອະດີດຮອງຜູ້ອໍານວຍການ ສູນການສຶກສາ ນອກໂຮງຮຽນແຂວງ ແຂວງ ສາລະວັນ ສະຫາຍ ໄດ້ເຖີງແກ່ມໍລະນະກໍາໄປແລ້ວ ໃນເວລາ 10:20 ໂມງ ຂອງວັນທີ 26, ກໍລະກົດ 2026, ລວມ ອາຍຸໄດ້ 56 ປີ ດ້ວຍພະຍາດຂອງເພີ່ນເອງ.
- ປັດຈຸບັນ ສົບຂອງເພື່ນໄດ້ບໍາເພັນກຸສົນ ຢູ່ທີ່ເຮືອນຂອງເພີ່ນເອງ, ບ້ານ ນາເຫລັກ, ເມືອງ ສາລະວັນ, ແຂວງ ສະວັນ
- ວັນຊາປະນະກິດສົບ ຈະໄດ້ຈັດຂື້ນໃນຕອນບ່າຍຂອງວັນທີ 30 ກໍະກົດ 2026 ທີ່ປ່າຊ້າ ໝອງເປັດ.
- ວັນທີ 1 ສິງຫາ 2026 ເປັນມື້ຕັ້ງບຸນ,
- ຕອນເຊົ້າທີ 2 ສິງຫາ 2026 ເປັນມື້ໃສ່ບາດ, ຖວາຍສັງຄະທານແດ່ພຣະສົງ ສາມະເນນ ອຸທິດສ່ວນບຸນກຸສົນ ເຖິງດວງວິນຍານຂອງ ສະຫາຍ
ຂໍໃຫ້ດວງວິນຍານຂອງສະຫາຍ ຈົ່ງໄປສູ່ສຸຂະຕິພູມດ້ວຍເຖີ້ນ.

ສສກ ຮ່ວມກັບ ລັດຖະບານອົດສະຕຣາລີ ສົ່ງເສີມຄວາມເປັນຜູ້ນຳຂອງແມ່ຍິງ ແລະ ການປົກປ້ອງເດັກ ໃນຂະແໜງ ການສຶກສາ+++++++++++++++++++++++...
29/07/2026

ສສກ ຮ່ວມກັບ ລັດຖະບານອົດສະຕຣາລີ ສົ່ງເສີມຄວາມເປັນຜູ້ນຳຂອງແມ່ຍິງ ແລະ ການປົກປ້ອງເດັກ ໃນຂະແໜງ ການສຶກສາ
++++++++++++++++++++++++++++++++++
ກະຊວງສຶກສາທິການ ແລະ ກິລາ (ສສກ) ແຫ່ງ ສປປ ລາວ ຮ່ວມກັບ ລັດຖະບານອົດສະຕຣາລີ ຜ່ານແຜນງານບີຄວາ (BEQUAL) ໄດ້ຈັດພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຢ່າງຟົດຟື້ນ ພ້ອມຈັດກິດຈະກຳຝຶກອົບຮົມເພື່ອສົ່ງເສີມຄວາມສະເໝີພາບຍິງ-ຊາຍ, ຄວາມເປັນຜູ້ນຳຂອງແມ່ຍິງ ແລະ ການປົກປ້ອງເດັກ ໃນຂະແໜງການສຶກສາ, ວິທະຍາສາດ ແລະ ກິລາ ໃນລະຫວ່າງວັນທີ 27-28 ກໍລະກົດ 2026 ທີ່ນະຄອນຫຼວງວຽງຈັນ ພາຍໃຕ້ການເປັນປະທານຮ່ວມໂດຍ ທ່ານ ປອ ນາງ ດາລາວອນ ກິດຕິພັນ ຮອງລັດຖະມົນຕີກະຊວງສຶກສາທິການ ແລະ ກິລາ ແລະ ທ່ານ ນາງ ເບັນນິຕາ ຊຳເມີວິວ (Benita Sommerville) ຮອງເອກອັກຄະລັດຖະທູດອົດສະຕຣາລີ ປະຈຳ ລາວ. ໂດຍມີແຂກຖືກເຊີນຈາກພາກສ່ວນຕ່າງໆ, ຫົວໜ້າຫ້ອງການກະຊວງ, ຫົວໜ້າ-ຮອງຫົວໜ້າກົມ, ສະມາຊິກສະຫະພັນແມ່ຍິງລາວ, ຕົວແທນອົງການຈັດຕັ້ງມະຫາຊົນ, ຜູ້ອຳນວຍການສຳນັກຂ່າວ ແລະ ສື່ມວນຊົນຂັ້ນສູງກາງ ແລະ ທ້ອງຖິ່ນເຂົ້າຮ່ວມ 200 ກວ່າທ່ານ.
ໃນພິທີເປີດ, ທ່ານ ປອ ນາງ ດາລາວອນ ກິດຕິພັນ ໄດ້ຍົກໃຫ້ເຫັນເຖິງຄວາມສຳຄັນຂອງການຮ່ວມມື ເພື່ອສົ່ງເສີມຄວາມສະເໝີພາບຍິງ-ຊາຍ ແລະ ການປົກປ້ອງເດັກ ໂດຍທ່ານໄດ້ກ່າວວ່າ: "ງານໃນມື້ນີ້ ຍັງເປັນວາລະສຳຄັນເພື່ອຢ້ຳຄືນເຖິງຄວາມສຳຄັນຂອງວຽກງານຄວາມສະເໝີພາບຍິງ-ຊາຍ ແລະ ການປົກປ້ອງເດັກ ວ່າແມ່ນຄວາມຮັບຜິດຊອບຂອງທຸກຄົນ. ສິ່ງດັ່ງກ່າວເປັນສ່ວນໜຶ່ງຂອງການປະຕິບັດປະຈຳວັນໃນໂຮງຮຽນ, ໃນສະຖາບັນ ແລະ ໃນວິທີທີ່ພວກເຮົາເຮັດວຽກຮ່ວມກັນ ເພື່ອອະນາຄົດຂອງເດັກທຸກຄົນ. ການຮ່ວມມືນີ້ ສະທ້ອນໃຫ້ເຫັນເຖິງຄວາມມຸ່ງໝັ້ນຂອງກະຊວງສຶກສາທິການ ແລະ ກິລາ ໃນການຫັນນະໂຍບາຍໄປສູ່ການຈັດຕັ້ງປະຕິບັດຈິງ ດ້ວຍເຄື່ອງມືທີ່ນຳໃຊ້ໄດ້, ການຮ່ວມມືທີ່ເຂັ້ມແຂງ ແລະ ຄວາມຮັບຮູ້ຂອງສັງຄົມທີ່ເພີ່ມຂຶ້ນ. ພວກເຮົາຂໍສະແດງຄວາມຂອບໃຈຕໍ່ການສະໜັບສະໜູນຢ່າງຕໍ່ເນື່ອງຂອງອົດສະຕຣາລີ ຕໍ່ວຽກງານບຸລິມະສິດທີ່ສຳຄັນເຫຼົ່ານີ້."
ດ້ານ ທ່ານ ນາງ ເບັນນິຕາ ຊຳເມີວິວ ກໍໄດ້ກ່າວເນັ້ນໜັກວ່າ: "ລັດຖະບານອົດສະຕຣາລີ ມີຄວາມພາກພູມໃຈທີ່ໄດ້ຢືນຢູ່ຄຽງຂ້າງກະຊວງສຶກສາທິການ ແລະ ກິລາ ໃນການສະໜັບສະໜູນວຽກງານການປົກປ້ອງເດັກ, ຄວາມສະເໝີພາບຍິງ-ຊາຍ ແລະ ຄວາມເປັນຜູ້ນຳຂອງແມ່ຍິງໃນຂະແໜງການສຶກສາ. ສິ່ງທີ່ເຮັດໃຫ້ການຮ່ວມມືນີ້ມີຄຸນຄ່າຫຼາຍ ບໍ່ແມ່ນພຽງແຕ່ໄລຍະເວລາການຮ່ວມມືທີ່ມາຍາວນານ, ແຕ່ຍ້ອນຄວາມສາມາດໃນການຫັນປ່ຽນໃຫ້ໂຮງຮຽນ ແລະ ຊຸມຊົນ ເຫັນໄດ້ເຖິງຄຸນຄ່າທີ່ສຳຄັນຂອງວຽກງານທີ່ໄດ້ຮ່ວມມືກັນພັດທະນາ."
ກິດຈະກຳໃນຄັ້ງນີ້ ໄດ້ສະແດງໃຫ້ເຫັນເຖິງບົດບາດສຳຄັນຂອງແມ່ຍິງໃນຂະແໜງການສຶກສາ, ວິທະຍາສາດ ແລະ ກິລາ ໃນຖານະຜູ້ນຳທາງຄວາມຄິດ, ຜູ້ຕັດສິນໃຈ ແລະ ເປັນຕົວແທນຂອງການປ່ຽນແປງ. ຄະນະນຳຂອງສະຫະພັນແມ່ຍິງ ກະຊວງສຶກສາທິການ ແລະ ກິລາ ໄດ້ນຳສະເໜີຍຸດທະສາດ, ແຜນງານ 5 ປີ ແລະ ນຳພາຜູ້ເຂົ້າຮ່ວມຊົມງານວາງສະແດງກ່ຽວກັບປະຫວັດສາດຂອງສະຫະພັນແມ່ຍິງ.
ພ້ອມດຽວກັນນີ້, ຍັງໄດ້ເປີດໂອກາດໃຫ້ໂຄງການໃໝ່ “ແມ່ຍິງໃນການເປັນຜູ້ນຳ” (Women In Leadership: WIL) ຂອງກະຊວງສຶກສາທິການ ແລະ ກິລາ ໄດ້ຮັບການຈັດຕັ້ງປະຕິບັດ. ໂຄງການ WIL ໄດ້ເລີ່ມຕົ້ນໃນເດືອນພຶດສະພາ 2026 ດ້ວຍການສະໜັບສະໜູນຈາກລັດຖະບານອົດສະຕຣາລີ ເພື່ອສະໜັບສະໜູນກຸ່ມສະມາຊິກຫຼັກໃນທົ່ວກະຊວງ ເສີມສ້າງການເຊື່ອມໂຍງວຽກງານຄວາມສະເໝີພາບຍິງ-ຊາຍ, ຄວາມພິການ ແລະ ການສຶກສາຮຽນຮ່ວມ (GEDSI) ຜ່ານວິທີການຝຶກອົບຮົມຄູຝຶກ (TOT). ໃນງານ, ສະມາຊິກສະຫະພັນແມ່ຍິງ 19 ທ່ານ ຂອງໂຄງການ WIL ໄດ້ຈັດການຝຶກອົບຮົມກ່ຽວກັບຄວາມສະເໝີພາບຍິງ-ຊາຍ ແລະ ການປົກປ້ອງເດັກ ໃຫ້ແກ່ສະມາຊິກ ຈຳນວນ 75 ທ່ານ ຈາກກະຊວງສຶກສາທິການ ແລະ ກິລາ.
ໃນໂອກາດດັ່ງກ່າວ, ສູນໂຄສະນາຂ່າວສານການສຶກສາ ແລະ ກິລາ ຮ່ວມກັບ ພະແນກຄວາມກ້າວໜ້າຂອງແມ່ຍິງ ໄດ້ນຳສະເໜີ ວິດີໂອໃໝ່ “ການປົກປ້ອງ ແລະ ຮັກສາຄວາມປອດໄພສຳລັບເດັກ” ເປັນຄັ້ງທຳອິດ. ວິດີໂອດັ່ງກ່າວສ້າງຂຶ້ນໂດຍອີງໃສ່ຄຳແນະນຳກ່ຽວກັບການປົກປ້ອງເດັກ ຂອງກະຊວງສຶກສາທິການ ແລະ ກິລາ (ເຜີຍແຜ່ໃນເດືອນກໍລະກົດ 2024), ໂດຍໃຊ້ພາບອະນິເມຊັນ (Animation) ເພື່ອສື່ສານຂໍ້ຄວາມ "ສິ່ງທີ່ຄວນເຮັດ ແລະ ຫ້າມເຮັດ" ຢ່າງປອດໄພ, ເຂົ້າໃຈງ່າຍ ແລະ ເໝາະສົມ.
ນອກຈາກນັ້ນ, ລັດຖະບານອົດສະຕຣາລີ ຍັງໄດ້ມອບອຸປະກອນຜະລິດວິດີໂອ ແລະ ອຸປະກອນໄອທີ (IT) ມູນຄ່າ 37,662 ໂດລາອົດສະຕຣາລີ (ປະມານ 585,793,000 ກີບ) ເພື່ອສະໜັບສະໜູນວຽກງານຂອງທີມງານສື່ສານ ກະຊວງສຶກສາທິການ ແລະ ກິລາ.
ຫຼັງຈາກພິທີທາງການ, ໄດ້ມີການຈັດຝຶກອົບຮົມໃຫ້ແກ່ທີມງານສື່ມວນຊົນຂັ້ນສູນກາງ, ທ້ອງຖິ່ນ ແລະ ນັກຂ່າວ ເພື່ອເສີມສ້າງຄວາມເຂົ້າໃຈກ່ຽວກັບການລາຍງານຂ່າວທີ່ມີຄວາມຮັບຜິດຊອບ, ການປົກປ້ອງເດັກ, ການຖ່າຍຮູບ-ວິດີໂອເດັກຢ່າງປອດໄພ ແລະ ການສື່ສານທີ່ສົ່ງເສີມຄວາມສະເໝີພາບຍິງ-ຊາຍ ໂດຍຄູຝຶກຈາກພະແນກຄວາມກ້າວໜ້າຂອງແມ່ຍິງ ແລະ ມະຫາວິທະຍາໄລແຫ່ງຊາດ.
ທ່ານ ປອ. ນາງ ດາລາວອນ ກິດຕິພັນ ໄດ້ກ່າວສະຫຼຸບວ່າ: “ພວກເຮົາມາຮ່ວມແຮງຮ່ວມໃຈກັນໃນທົ່ວກະຊວງສຶກສາທິການ ແລະ ກິລາ, ສະຫະພັນແມ່ຍິງ, ສື່ມວນຊົນ ແລະ ຄູ່ຮ່ວມງານທັງໝົດ ເພື່ອຫັນຄຳແນະນຳໄປສູ່ການຈັດຕັ້ງປະຕິບັດ, ສ້າງຄວາມຮັບຮູ້ທີ່ເຂັ້ມແຂງ ກ່ຽວກັບຄວາມສະເໝີພາບຍິງ-ຊາຍ ແລະ ສ້າງໂຮງຮຽນໃຫ້ເປັນສະຖານທີ່ໆ ປອດໄພ ແລະ ສົ່ງເສີມການຮຽນຮ່ວມ ເພື່ອເດັກທຸກຄົນ.”
ທ່ານ ນາງ ເບັນນິຕາ ຊຳເມີວິວ ໄດ້ກ່າວຕື່ມວ່າ: "ງານນີ້ ສະແດງໃຫ້ເຫັນວ່າ ການຮ່ວມມືທີ່ເຂັ້ມແຂງ ສາມາດບັນລຸໝາກຜົນໄດ້ຢ່າງແທ້ຈິງ. ລັດຖະບານອົດສະຕຣາລີ ມີຄວາມຍິນດີທີ່ຈະສະໜັບສະໜູນຄວາມພະຍາຍາມຂອງກະຊວງສຶກສາທິການ ແລະ ກິລາ ທີ່ໄດ້ຖືເອົາຄວາມເປັນຜູ້ນຳຂອງແມ່ຍິງ, ການປົກປ້ອງເດັກ ແລະ ຄວາມສະເໝີພາບຍິງ-ຊາຍ ມານຳສະເໜີຮ່ວມກັນ ເພື່ອຮ່ວມກັນຮັບຮູ້ ແລະ ຈັດຕັ້ງປະຕິບັດໃຫ້ປະກົດຜົນເປັນຈິງ."
#ຂ່າວ ແລະ Face ໂດຍ: ຂ່າວສຶກສາ, ວິທະຍາສາດ ແລະ ກິລາ / Education Science And Sport News

ກະຊວງສຶກສາທິການ ແລະ ກິລາ ສົມທົບກັບສູນກາງຊາວໜຸ່ມປະຊາຊົນປະຕິວັດລາວ, ພະແນກສຶກສາທິການ ແລະ ກິລາແຂວງສາລະວັນ ແລະ ຄະນະບໍລິຫານງານ...
11/07/2026

ກະຊວງສຶກສາທິການ ແລະ ກິລາ ສົມທົບກັບສູນກາງຊາວໜຸ່ມປະຊາຊົນປະຕິວັດລາວ, ພະແນກສຶກສາທິການ ແລະ ກິລາແຂວງສາລະວັນ ແລະ ຄະນະບໍລິຫານງານຊາວໜຸ່ມແຂວງສາລະວັນ ໄດ້ນໍາສົ່ງອາສາສະໝັກຊາວໜຸ່ມຕະລຸມບອນ ລົງປະຈໍາຢູ່ເມືອງຕະໂອ້ຍ ພາຍໃຕ້ໂຄງການອາສາສະໝັກບໍາລຸງນັກຮຽນຢູ່ເຂດຫ່າງໄກສອກຫຼີກ ເມືອງຈຸດສຸມພັດທະນາຂອງຂະແໜງການສຶກສາທິການ ແລະ ກິລາ ແລະ ນໍານ້ອງຄືນສູ່ໂຮງຮຽນໄລຍະພັກແລ້ງ ປະຈໍາສົກຮຽນ 2025-2026.
ໂດຍເປັນກຽດເຂົ້າຮ່ວມຂອງ ທ່ານ ນາງ ບຸນຖິນ ແກ່ນພົມມາ ຮອງເລຂາພັກເມືອງ ປະທານຄະນະກໍາມະການປົກຄອງເມືອງຕະໂອ້ຍ, ມີທ່ານ ຄຳເຟືອງ ອິນທິສອນ ຮອງຫົວໜ້າພະແນກສຶກສາທິການແລະກິລາແຂວງ, ທ່ານ ສີພອນ ສີບຸນເຮືອງ ຮອງເລຂາຄະນະບໍລິຫານງານຊາວໝຸ່ມ ກະຊວງສຶກສາທິການ ແລະ ກິລາ ພ້ອມດ້ວຍທີມງາມເຂົ້າຮ່ວມ.
ໂຄງການດັ່ງກ່າວຈະດຳເນີນເປັນເວລາ 1 ເດືອນເຕັມ ( ລະຫວ່າງວັນທີ 09 ກໍລະກົດ - ວັນທີ 9 ສິງຫາ 2026) ການດໍາເນີນໂຄງການດັ່ງກ່າວ ທາງຄະນະຮັບຜິດຊອບຈະໄດ້ນໍາສົ່ງອາສາສະໝັກລົງໄປປະຈໍາການຢູ່ບັນດາໂຮງຮຽນ 32 ແຫ່ງ ໃນ 8 ແຂວງ 8 ເມືອງ ເປົ້າໝາຍຂອງໂຄງການ ສໍາລັບເມືອງຕະໂອ້ຍ ມີ 4 ໂຮງຮຽນທີ່ເປັນເປົ້າໝາຍຂອງໂຄງການຄື: ໂຮງຮຽນປະຖົມຕະຫຼຸງ-ລະລາວ, ໂຮງຮຽນປະຖົມໂບງນໍ້າ, ໂຮງຮຽນປະຖົມພໍ່ເຊັນ ແລະ ໂຮງຮຽນປະຖົມປາຈູດອນ ມີອາສາສະໝັກທັງໝົດ 12 ຄົນ, ຍິງ 7 ຄົນ, ອາສາສະໝັກຈາກຂັ້ນສູນກາງ 8 ຄົນ, ຍິງ 6 ຄົນ ແລະ ຈາກໂຮງຮຽນເປົ້າໝາຍ 4 ຄົນ, ຍິງ 1 ຄົນ. ໃນແຕ່ລະໂຮງຮຽນຈະມີອາສາສະໝັກປະຈໍາການຈໍານວນ 3 ຄົນເພື່ອປະຕິບັດໜ້າທີ່ຈັດການຂຽນການສອນ, ຈັດກິດຈະກໍາຕ່າງໆ ໃຫ້ແກ່ນັກຮຽນຂັ້ນ ປ3, ປ4 ແລະ ປ5.

ຫ້ອງການສຶກສາທິການ ແລະ ກິລາ ເມືອງລະຄອນເພັງ ປະກາດພະນັກງານຄູ-ອາຈານເຂົ້າຮັບອຸດໜູນບຳນານ ---------------------------- ໂດ...
01/07/2026

ຫ້ອງການສຶກສາທິການ ແລະ ກິລາ ເມືອງລະຄອນເພັງ ປະກາດພະນັກງານຄູ-ອາຈານເຂົ້າຮັບອຸດໜູນບຳນານ
----------------------------

ໂດຍປະຕິບັດຕາມຂໍ້ຕົກລົງຂອງກະຊວງສຶກສາທິການ ແລະ ກິລາ ສະບັບເລກ ທີ 2785-2786-2787-2788- 2789-2790-2794-2795-2796-2797/ສສກ ລົງວັນທີ 26 ພຶດສະພາ 2026 ວ່າດ້ວຍ: ການອະນຸມັດໃຫ້ພະນັກ ງານລັດຖະກອນ (ຄູສອນ) ພັກການເຂົ້າຮັບອຸດໜູນບຳນານ ປະຈຳງວດ lll ປີ 2026 ໃນນັ້ນໄດ້ຕົກລົງອະນຸມັດໃຫ້ພະນັກງານລັດຖະກອນ (ຄູສອນ) ທີ່ສິດສອນຢູ່ບັນດາໂຮງຮຽນມູນລະປະຖົມ, ປະຖົມສົມບູນຂອງເມືອງ ລະຄອນເພັງແຂວງສາລະວັນ ເຂົ້າຮັບອຸດໜຸນບຳນານຈຳນວນ 10 ທ່ານຄື: ທ່ານ ແສງເດືອນ ເກສາງາມ ຫົວໜ້າມູນປະຖົມ ໂຮງຮຽນມູນປະຖົມເລີງນົກທາ, ທ່ານ ດາວວີ ແດງສົດ ພະນັກງານຄູສອນ ມັດທະຍົມສົມບູນ ດ່ານນາເລົາ, ທ່ານ ຄຳໄພ ສູດາໄລ ຮອງຜູ້ອຳນວຍການ ແລະ ສິດສອນ ປະຖົມສົມບູນວັງແກັດ, ທ່ານ ບຸນສີ ຈັນຊົມພູ ຮອງຜູ້ອຳນວຍການ ແລະ ສິດສອນ ປະຖົມສົມບູນນາວຽນ, ທ່ານ ນາງ ພະນົມສອນ ແກ້ວດາຣາ ຮອງຜູ້ອຳນວຍການ ແລະ ສິດສອນ ມັດທະຍົມສົມບູນ ດ່ານນາເລົາ, ທ່ານ ຄຳຜົງ ແກ້ວດວງສີ ພະນັກງານຄູສອນ ປະຖົມດອນໄລ່, ທ່ານ ນາງ ສົມອ່ອນ ສີຫາບຸດ ພະນັກງານຄູສອນ ປະຖົມຕາພານ, ທ່ານ ນາງ ດວງໃຈ ຈັນທີ ພະນັກງານຄູສອນ ປະຖົມໂນນສະຫວ່າງ, ທ່ານ ນາງ ຄຳໝັ້ນ ພະນັກງານຄູສອນປະຖົມດ່ານນາເລົາ ແລະ ທ່ານ ນາງ ເພັດ ເສີຍສົມບັດ ຫົວໜ້າມູນປະຖົມ ແລະ ສິດສອນ ປະຖົມໂພນແພງ.

ໃນພິທີຍັງໄດ້ມອບຂໍ້ຕົກລົງ,ໃບຍ້ອງຍໍ ແລະ ເງິນສົດ ກ່ອນເຂົ້າຮັບອຸດໜູນບຳນານໂດຍໃຫ້ກຽດມອບຂອງທ່ານ ສຸນີ ນາມມະບົວລີ ຫົວໜ້າພະແນກສຶກສາ ທິການ ແລະ ກິລາແຂວງສາລະວັນ ແລະ ທ່ານ ເວີນມະນີ ມຸ່ງສີວົງສາ ເລຂາພັກເມືອງ ຂື້ນມອບຕາມລຳດັບ.

ພິທີ ໄດ້ຈັດຂື້ນໃນຄັ້ງວັນທີ 01 ກໍລະກົດ 2026 ຢູ່ທີ່ ເມືອງລະຄອນເພັງ ໂດຍການໃຫ້ກຽດເຂົ້າຮ່ວມຂອງ ທ່ານ ສຸນີ ນາມມະບົວລີ ຫົວໜ້າພະແນກສຶກສາທິການ ແລະ ກິລາແຂວງສາລະວັນ ແລະ ທ່ານ ເວີນມະນີ ມຸ່ງສີວົງສາ ເລຂາພັກເມືອງ ແລະ ທ່ານ ກັນຍາ ໄຊຍະໂອຊະ ຫົວໜ້າຫ້ອງການສຶກສາທິການ ແລະ ກິລາ ເມືອງ ລະຄອນເພັງ; ມີບັນດາທ່ານແຂກທີ່ຖືກເຊີນພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ຂ່າວ - ພາບໂດຍ: ຈັນສະໜອນ ວົງສະຫວັດ

ແຂວງສາລະວັນ ສະຫຼຸບການຈັດຕັ້ງປະຕິບັດ ໂຄງການສົ່ງເສີມການສຶກສາເດັກກ່ອນໄວຮຽນຂັ້ນບ້ານ ໄລຍະ 6 ເດືອນຕົ້ນປີ----------------------...
30/06/2026

ແຂວງສາລະວັນ ສະຫຼຸບການຈັດຕັ້ງປະຕິບັດ ໂຄງການສົ່ງເສີມການສຶກສາເດັກກ່ອນໄວຮຽນຂັ້ນບ້ານ ໄລຍະ 6 ເດືອນຕົ້ນປີ
----------------------

ກອງປະຊຸມສະຫຼຸບ 6 ເດືອນຕົ້ນປີ 2026 ໂຄງການສົ່ງເສີມການສຶກສາເດັກກ່ອນໄວຮຽນຂັ້ນບ້ານ ເມືອງຕະໂອ້ຍ ແຂວງສາລະວັນ ໄດ້ຈັດຂື້ນໃນວັນທີ 30 ມິຖຸນາ 2026 ນີ້ ຢູ່ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ໂດຍການເປັນປະທານຂອງທ່ານ ນາງ ພູວຽງ ອິນທະສອນ ຮອງຫົວໜ້າພະແນກສຶກສາທິການ ແລະ ກິລາແຂວງ; ມີທ່ານ ມະນີວົງ ດາໄວສັນຕິ ຫົວໜ້າໜ່ວຍງານແຜນງານ ສະມາຄົມເຢຍລະມັນ ເພື່ອການພັດທະນາ; ທ່ານ ນາງ ບຸນຖິນ ແກ່ນພົມມາ ປະທານຄະນະກໍາມະການປົກຄອງ ເມືອງຕະໂອ້ຍ; ມີຕາງໜ້າຈາກກົມຮ່ວມມື, ກົມການສຶກສາກ່ອນໄວຮຽນ ກະຊວງສຶກສາທິການ ແລະ ກິລາ; ພະແນກການຕ່າງປະເທດແຂວງ; ຫ້ອງວ່າການແຂວງ; ຫ້ອງການສຶກສາທິການ-ກິລາເມືອງຕະໂອ້ຍ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໂຄງການດັ່ງກ່າວ ແມ່ນໂຄງການລະຫວ່າງກະຊວງສຶກສາທິການ ແລະ ກິລາ ຕາງໜ້າໂດຍພະແນກສຶກສາທິການ ແລະກິລາ ແຂວງສາລະວັນ ແລະ ອົງການສະມາຄົມເຢຍລະມັນ-ລາວ ເພື່ອການພັດທະນາ ປະຈໍາ ສປປ ລາວ (GLAD) ເຊີ່ງມີເປົ້າໝາຍກິດຈະກໍາຫຼັກໂຄງການ ໃນການສົ່ງເສີມກອງທຶນອາຫານທ່ຽງໃຫ້ແກ່ໂຮງຮຽນອະນຸບານຕະຮວກ; ການປູກຈິດສໍານຶກໃຫ້ແກ່ຊາວບ້ານເປົ້າໝາຍເຫັນຄວາມສໍາຄັນຂອງການສຶກສາກ່ອນໄວຮຽນ ເພື່ອຊຸກຍູ້ໃຫ້ ລູກຫຼານໄດ້ເຂົ້າຮຽນຕາມເກນອາຍຸ ແລະ ສ້າງຄວາມອາດສາມາດໃຫ້ຜູ້ອຳນວຍການ, ຄູສອນໂຮງຮຽນອະນຸບານໃນຄຸ້ມຄອງບໍລິຫານ ແລະ ສິດສອນຫຼັກສູດແບບໃໝ່; ໂຄງການໄດ້ເລັ່ງໃສ ບ້ານຕະຮວກ ເປັນບ້ານຈັດຕັ້ງປະຕິບັດກິດຈະກຳຫຼັກ ນອກຈາກນີ້ຍັງມີບ້ານປະຈຸດອນ ແລະ ບ້ານເທດສະບານ ເມືອງຕະໂອ້ຍ ໃນນັ້ນມີການສົ່ງເສີມກອງທຶນອາຫານທ່ຽງໃຫ້ມີການຕໍ່ເນື່ອງໃຫ້ແກ່ໂຮງຮຽນອະນຸບານບ້ານຕະຮວກ ໄດ້ປະຕິບັດກິດຈະກໍາຍ່ອຍເປັນຕົ້ນ: ໄດ້ຝຶກອົບຮົມດ້ານວິຊາການປູກຝັງ ແລະ ລ້ຽງສັດນ້ອຍໃຫ້ແກ່ພໍ່ແມ່ນັກຮຽນ, ຊາວບ້ານ ໄດ້ 2 ຄັ້ງເທົ່າກັບ 66%, ສະໜອງທຶນອາຫານທ່ຽງໃຫ້ແກ່ໂຮງຮຽນອະນຸບານ ບ້ານຕະຮວກ ຈໍານວນ 78 ຄົນ, 13 ເດືອນ, ສະເລ່ຍ 66.000 ກີບ/ເດືອນ/ຄົນ ແລະ 9 ເດືອນສຸດທ້າຍແມ່ນ 2,200,000 ຕໍ່ເດືອນ/ໂຮງຮຽນ ໄດ້ 18 ຄັ້ງເທົ່າກັບ 81%, ຝຶກອົບຮົມດ້ານວິຊາການປູກຝັງ ແລະ ລ້ຽງສັດນ້ອຍໃຫ້ແກ່ພໍ່ແມ່ນັກຮຽນ/ຊາວບ້ານເພີ້ມ ໄດ້ 3 ຄັ້ງເທົ່າ 100%, ສະໜອງອຸປະກອນການປູກ ແລະ ລ້ຽງໃຫ້ແກ່ ພໍ່ແມ່ນັກຮຽນ/ຊາວບ້ານເພີ້ມອີກ 5 ຄົນ ໄດ້ 1 ບ້ານເທົ່າກັບ 100%, ຝຶກອົບຮົມການຄຸ້ມຄອງທຶນໃຫ້ແກ່ ຄພສບ ໃນການຄຸ້ມຄອງບໍລິຫານກອງທຶນອາຫານທ່ຽງ ໂຮງຮຽນອະນຸບານ ບ້ານຕະຮວກ ສໍາເລັດ 100%, ສະເຫຼີມສະຫຼອງວັນເດັກນ້ອຍສາກົນ, ວັນທີ 1 ມິຖຸນາ ໄດ້ 2 ຄັ້ງເທົ່າ 100% ແລະ ກິດຈະກໍາຫຼັກຜູ້ອຳນວຍການ ແລະ ຄູສອນໂຮງຮຽນ ອະນຸບານມີຄວາມອາດສາມາດໃນການຄຸ້ມຄອງບໍລິຫານ ແລະ ສິດສອນຫຼັກສູດແບບໃໝ່ ແມ່ນຈັດຕັ້ງປະຕິບັດບັນດາກິດຈະກໍາຍ່ອຍໆສໍາເລັດ100%.

ໃນຕອນທ້າຍຂອງກອງປະຊຸມ, ບັນດາຜູ້ເຂົ້າຮ່ວມ ໄດ້ຮ່ວມກັນປະກອບຄຳຄິດຄຳເຫັນ, ພ້ອມທັງໄດ້ຍົກໃຫ້ເຫັນບາງຂໍ້ຄົງຄ້າງ ແລະ ສິ່ງທ້າທາຍ ທີ່ຈະຕ້ອງໄດ້ຮັບການແກ້ໄຂໃນຕໍ່ໜ້າ.

ພາບ-ຂ່າວ: ສ.ພະຈັນ
-------------------------

ແຂວງສາລະວັນ ສະຫຼຸບການຈັດຕັ້ງປະຕິບັດ ໂຄງການສົ່ງເສີມຜູ້ປະກອບການຂັ້ນບ້ານ ໄລຍະ 6 ເດືອນຕົ້ນປີ----------- ກອງປະຊຸມສະຫຼຸ...
30/06/2026

ແຂວງສາລະວັນ ສະຫຼຸບການຈັດຕັ້ງປະຕິບັດ ໂຄງການສົ່ງເສີມຜູ້ປະກອບການຂັ້ນບ້ານ ໄລຍະ 6 ເດືອນຕົ້ນປີ
-----------

ກອງປະຊຸມສະຫຼຸບ 6 ເດືອນຕົ້ນປີ 2026 ໂຄງການສົ່ງເສີມຜູ້ປະກອບການຂັ້ນບ້ານໂດຍຜ່ານການຝຶກອົບຮົມວິຊາອາຊີບຂັ້ນພື້ນຖານໄລຍະ II ເມືອງສາລະວັນ ແລະ ເມືອງຕະໂອ້ຍ ແຂວງສາລະວັນ ໄດ້ຈັດຂື້ນໃນວັນທີ 29 ມິຖຸນາ 2026 ນີ້ ຢູ່ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ໂດຍການເປັນປະທານຂອງ ທ່ານ ວຽງແກ້ວ ຈັນເບັງແສງ ຫົວໜ້າຂະແໜງບໍລິຫານ ພະແນກສຶກສາທິການ ແລະ ກິລາແຂວງ; ມີທ່ານ ມະນີວົງ ດາໄວສັນຕິ ຫົວໜ້າໜ່ວຍງານແຜນງານ ສະ ມາຄົມເຢຍລະມັນ ເພື່ອການພັດທະນາ; ທ່ານ ຂາວ ໂພໄຊ ຮອງປະທານຄະນະກໍາມະການ ເມືອງສາລະວັນ; ທ່ານ ນາງ ບຸນຖິນ ແກ່ນພົມມາ ປະທານຄະນະກໍາມະການ ເມືອງຕະໂອ້ຍ; ມີຕາງໜ້າຈາກກົມອາຊີວະສຶກສາ ກະຊວງສຶກສາທິການ ແລະ ກິລາ; ພະແນກການຕ່າງປະເທດແຂວງ; ຫ້ອງວ່າການແຂວງ; ຫ້ອງການສຶກສາທິການ-ກິລາເມືອງສາລະວັນ-ຕະໂອ້ຍ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໂຄງການສົ່ງການດັ່ງກ່າວ ແມ່ນໂຄງການລະຫວ່າງກະຊວງສຶກສາທິການ ແລະ ກິລາ ຕາງໜ້າໂດຍພະແນກສຶກສາທິການ ແລະກິລາ ແຂວງສາລະວັນ ແລະ ອົງການສະມາຄົມເຢຍລະມັນ-ລາວ ເພື່ອການພັດທະນາ ປະຈໍາ ສປປ ລາວ (GLAD) ເຊີ່ງມີບ້ານເປົ້າໝາຍທີ່ໂຄງການສະໜັບສະໜູນຫຼັກ 8 ບ້ານ ໃນນັ້ນເມືອງຕະໂອ້ຍ ມີ 4 ບ້ານຄື: ບ້ານປະດຸ, ບ້ານຊຶງຕະມອງ, ບ້ານລະປຶງ, ບ້ານປະຈຸກະປາ ແລະ ເມືອງສາລະວັນ ມີ 4 ບ້ານຄື: ບ້ານນາບອນ, ບ້ານແກ້ງສິມ, ບ້ານນາຫວ້າ, ບ້ານໂນນສະຫວັນ; ກິດຈະກໍາຫຼັກຂອງໂຄງການແມ່ນສ້າງຄວາມເຂັ້ມແຂງໃຫ້ແມ່ຍິງ ມີຄວາມອາດສາ ມາດດ້ານເຕັກນິກການປູກຝັງ-ລ້ຽງສັດ; ວຽກສຸຂະສຶກສາ ແລະ ໂພຊະນາການ; ກໍ່ ສ້າງ ແລະ ສ້ອມແປງໂຮງຮຽນ, ຫ້ອງປະຊຸມບ້ານ, ລະບົບນໍ້າ, ຫ້ອງນໍ້າ ໃນນັ້ນ ຜົນສໍາເລັດ 6 ເດືອນຕົ້ນປີ 2026 ໄດ້ເຮັດສໍາເລັດການຝຶກອົບຮົມການເງິນຂັ້ນພື້ນຖານໃຫ້ແມ່ຍິງ 72 ຄົນ ຈາກ 8 ບ້ານ; ສໍາເລັດການສະໜອງອຸປະກອນ ແລະ ແນວພັນປູກ-ລ້ຽງ: ສໍາເລັດການສະໜອງອຸປະກອນ ແລະ ແນວພັນໃຫ້ຄອບຄົວປູກລ້ຽງ ຈໍານວນ 6 ບ້ານ ແລະ ຕິດຕາມຄວາມຄືບໜ້າວຽກງານກໍ່ສ້າງສູນຮຽນຮູ້ຊຸມຊົນ 2 ແຫ່ງ ທີ່ກໍ່ສ້າງຢູ່ບ້ານໂນນສະຫວັນ (ເມືອງສາລະວັນ) ແລະ ບ້ານລະປືງ (ເມືອງຕະໂອ້ຍ) ນອກ ຈາກນີ້ ຍັງສໍາເລັດການສໍາຫຼວດວາງແຜນການກໍ່ສ້າງລະບົບນໍ້າ 1 ບ້ານ (ບ້ານຊຶ່ງຕະມອງ, ເມືອງຕະໂອ້ຍ). ຖ້າສົມທຽບຕົວຊີ້ວັດຕັ້ງແຕ່ເລີ່ມຕົ້ນຮອດປະຈຸບັນ ກິດຈະກໍາຕ່າງໆໄດ້ສ້າງຄວາມເຂັ້ມແຂງໃຫ້ແມ່ຍິງມີຄວາມອາດສາມາດດ້ານເຕັກນິກການປູກ ຝັງ-ລ້ຽງສັດ, ວຽກສຸຂະສຶກສາ ແລະ ໂພຊະນາ ປະຕິບັດໄດ້ 1 ຄັ້ງ, ໃນ 8 ບ້ານ ເທົ່າ ກັບ 33% ແລະ ກໍ່ສ້າງ-ສ້ອມແປງໂຮງຮຽນ, ຫ້ອງນໍ້າ ປະຕິບັດໄດ້ 5 ບ້ານ, 6 ກິດຈະກໍາກໍ່ສ້າງເທົ່າກັບ 83,33%.

ໃນຕອນທ້າຍຂອງກອງປະຊຸມ, ບັນດາຜູ້ເຂົ້າຮ່ວມ ໄດ້ຮ່ວມກັນປະກອບຄຳຄິດຄຳເຫັນ, ພ້ອມທັງໄດ້ຍົກໃຫ້ເຫັນບາງຂໍ້ຄົງຄ້າງ ແລະ ສິ່ງທ້າທາຍ ທີ່ຈະຕ້ອງໄດ້ຮັບການແກ້ໄຂໃນຕໍ່ໜ້າ.

ພາບ-ຂ່າວ: ສ.ພະຈັນ
---------------------------

ເມືອງສະໝ້ວຍ ດໍາເນີນການສອບເສັງຈົບຊັ້ນ ມ7 ປະຈຳສົກຮຽນ 2025-2026------------------------------- ເມືອງສະໝ້ວຍ ແຂວງສາລ...
17/06/2026

ເມືອງສະໝ້ວຍ ດໍາເນີນການສອບເສັງຈົບຊັ້ນ ມ7 ປະຈຳສົກຮຽນ 2025-2026
-------------------------------
ເມືອງສະໝ້ວຍ ແຂວງສາລະວັນ ໄດ້ດຳເນີນການສອບເສັງຈົບຊັ້ນມັດທະຍົມຕອນປາຍ (ມ7) ປະຈຳສົກຮຽນ 2025-2026, ໃນວັນທີ 17 ມິຖຸນາ 2026, ຢ່າງເປັນທາງການ, ທີ່ໂຮງຮຽນມັດທະຍົມສົມບູນ ສະໝ້ວຍ, ໂດຍການເຂົ້າຮ່ວມຂອງ ທ່ານ ສົມນຶກ ກຸມມານພີນເບ ປະທານຄະນະກຳມະການປົກຄອງເມືອງ ຜູ້ຊີ້ນໍາວຽກງານວັດທະນະທຳ-ສັງຄົມ, ທ່ານ ສຸນີ ນາມມະບົວລີ ຫົວໜ້າພະແນກສຶກສາທິການ ແລະ ກິລາ, ທ່ານສັນຍາລັກ ລາດສະບຸດ ຫົວຫນ້າຫ້ອງການສຶກສາທິການ ແລະ ກິລາເມືອງ ແລະ ທ່ານ ມີໂນ ໄຊຍະສານ ຮອງຫົວໜ້າຂະແໜງ ສາມັນສຶກສາ ພະແນກສຶກສາທິການ ແລະ ກິລາແຂວງ ຕະຫຼອດຮອດຄະນະຮັບຜິດຊອບ, ຄູ-ອາຈານ ແລະ ນັກຮຽນເຂົ້າຮ່ວມ.
ສໍາລັບການສອບເສັງຈົບຊັ້ນມັດທະຍົມຕອນປາຍ ສົກຮຽນ 2025-2026, ໃນທົ່ວເມືອງສະໝ້ວຍ, ມີນັກຮຽນເຂົ້າຮ່ວມສອບເສັງທັງໝົດ 66ນ້ອງ, ຍິງ 28 ນ້ອງ, ຈາກ 3 ໂຮງຮຽນຄື: ມສ ສະໝ້ວຍ, ມສ ກະແລງ ແລະ ມສ ລະເສນ. ໂດຍໄດ້ກຳນົດເອົາ 1 ສູນສອບເສັງ ແລະ ແບ່ງອອກເປັນ 5 ຫ້ອງສອບເສັງ. ສຳລັບວິຊາທີ່ໃຊ້ໃນການສອບເສັງມີທັງໝົດ 5 ວິຊາຫຼັກ ໄດ້ແກ່: ວິຊາພາສາລາວ - ວັນນະຄະດີ, ວິທະຍາສາດ - ສັງຄົມ, ວິທະຍາສາດ - ທຳມະຊາດ, ວິຊາພາສາອັງກິດ ແລະ ວິຊາຄະນິດສາດ. ເຊີ່ງການສອບເສັງຈະດຳເນີນໄປເປັນເວລາ 3 ວັນ ຄືແຕ່ວັນທີ 17-19 ມິຖຸນາ 2026. ຈິ່ງສໍາເລັດ.
-----------------------
ພາບ - ຂ່າວໂດຍ: ຈັນສະໜອນ ວົງສະຫວັດ

ເມືອງລະຄອນເພັງ ເປີດບັ້ນສອບເສັງຈົບຊັ້ນມັດທະຍົມສຶກສາຕອນປາຍ ມ7 ສົກຮຽນ 2025-2026.‎------------------------------- ‎ ‎ ...
17/06/2026

ເມືອງລະຄອນເພັງ ເປີດບັ້ນສອບເສັງຈົບຊັ້ນມັດທະຍົມສຶກສາຕອນປາຍ ມ7 ສົກຮຽນ 2025-2026.
‎------------------------------- ‎ ‎
ຕອນເຊົ້າວັນທີ 17 ມິຖຸນາ 2026 ນີ້, ເມືອງລະຄອນເພັງ ໄດ້ຈັດພິທີເປີດບັ້ນສອບເສັງຈົບຊັ້ນມັດທະຍົມສຶກສາຕອນປາຍ ມ7 ສົກຮຽນ 2025-2026, ໂດຍເຂົ້າຮ່ວມຂອງທ່ານ ກັນຍາ ໄຊຍະໂອຊະ ຫົວໜ້າຫ້ອງການສຶກສາທິການ ແລະກິລາເມືອງລະຄອນເພັັງ ຮອງປະທານຄະນະກຳມະການສອບເສັງຂັ້ນເມືອງ, ທ່ານ ວຽງແກ້ວ ຈັນເບັງແສງ ຫົວໜ້າຂະແໜງບໍລິຫານ ແລະ ການເງິນ ພະແນກສຶກສາທິການ ແລະ ກິລາແຂວງສາລະວັນ, ມີບັນດາທ່ານຄະນະກຳມະການຮັບຜິດຊອບຊີ້ນຳ ແລະ ຕັດສິນການສອບເສັງ ຂັ້ນເມືອງ, ຄະນະຮັບຜິດຊອບກວດກາສະເພາະກິດຂັ້ນເມືອງ ແລະ ພາກສ່ວນກ່ຽວຂ້ອງຕະຫຼອດຮອດນັກສອບເສັງ ເຂົ້າຮ່ວມ. ‎
ການສອບເສັງຈົບຊັ້ນ ມ7 ແມ່ນຈັດຂຶ້ນເອກະພາບທົ່ວປະເທດໃນວັນທີ 17-19 ມິຖຸນາ 2026 ທົ່ວເມືອງລະຄອນເພັງ ມີ 1 ສູບສອບເສັງຄື: ສູນສອບເສັງ ມສ ລະຄອນສີ ເຊິ່ງມີ 3 ໂຮງຮຽນເຂົ້າຮ່ວມ, ມີໂຮງຮຽນ ມສ ລະຄອນສີ, ໂຮງຮຽນ ມສ ດ່ານນາເລົາ ແລະ ໂຮງຮຽນ ມສ ຕາພານ, ມີ 5 ຫ້ອງສອບເສັງ, ມີນັກສອບເສັງທັງໝົດ 95 ຄົນ, ຍິງ 54 ຄົນ, ກຳນົດ 5 ວິຊາສອບເສັງຄື: ວິຊາພາສາລາວ-ວັນນະຄະດີ, ວິຊາຄະນິດສາດ, ວິຊາພາສາອັງກິດ, ກຸ່ມວິຊາວິທະຍາສາດທຳມະຊາດ ແລະ ກຸ່ມວິຊາວິທະຍາສາດສັງຄົມ.
ໃນໂອກາດເຂົ້າຮ່ວມໃນພິທີເປີດການສອບເສັງຄັ້້ງນີ້ ຄະນະປະທານ ກໍໄດ້ມີຄໍາເຫັນ ໂດຍໄດ້ເນັ້ນໃຫ້ຄະນະກໍາມະການຮັບຜິດຊອບການສອບເສັງ ຍົກສູງໜ້າທີ່ການເມືອງ ກໍຄືຄວາມຮັບຜິດຊອບທີ່ໄດ້ຮັບມອບໝາຍ ເພື່ອໃຫ້ການສອບເສັງ ມີຄວາມໂປ່ງໃສ, ຍຸຕິທໍາ, ມີຄວາມສະຫງົບປອດໄພຮອບດ້ານ, ພ້ອມທັງເນັ້ນໃຫ້ຜູ້ບໍລິຫານການນສຶກສາແຕ່ລະໂຮງຮຽນ ແລະ ຄູ-ອາຈານຜູ້ນໍາພານັກຮຽນ ເອົາໃຈໃສ່ຕິດຕາມກວດການັກຮຽນທີ່ຢູ່ໃນຄວາມຮັບຜິດຊອບຂອງຕົນຢ່າງໃກ້ຊິດ, ຖືສຳຄັນກົນໄກການປະສານງານ ແລະເຕົ້າໂຮມຄວາມສາມັກຄີ, ຫຼີກລຽງບັນຫາຫາງສຽງ ຫຼືປະກົດການຫຍໍ້ທໍ້ອື່ນໆ, ຮັບປະກັນເຮັດໃຫ້ບັ້ນສອບເສັງສົກປີຄັ້ງນີ້ມີຜົນສຳເລັດຕາມຄາດໝາຍ.
ຈາກນັ້ນ, ຄະນະປະທານພິທີ ພ້ອມດ້ວຍຄະນະຮັບຜິດຊອບ ຍັງໄດ້ຮ່ວມເປີດຫົວບົດສອບເສັງ ແລະ ຕິດຕາມການສອບເສັງຈົບຊັ້ນ ມ7 ປະຈໍາສົກຮຽນ 2025-2026 ຕື່ມອີກ; ການສອບເສັງຈະໄດ້ດຳເນີນໄປຮອດວັນສຸກ ວັນທີ 19 ມິຖຸນາ 2026 ( ກຳນົດ 3 ວັນ) ຈິ່ງຈະສຳເລັດ.

ເມືອງຕະໂອ້ຍ ດໍາເນີນການສອບເສັງຈົບຊັ້ນ ມ7 ປະຈຳສົກຮຽນ 2025-2026------------------------------- ເມືອງຕະໂອ້ຍ ແຂວງສາລ...
17/06/2026

ເມືອງຕະໂອ້ຍ ດໍາເນີນການສອບເສັງຈົບຊັ້ນ ມ7 ປະຈຳສົກຮຽນ 2025-2026
-------------------------------
ເມືອງຕະໂອ້ຍ ແຂວງສາລະວັນ ໄດ້ດຳເນີນການສອບເສັງຈົບຊັ້ນມັດທະຍົມຕອນປາຍ (ມ7) ປະຈຳສົກຮຽນ 2025-2026, ໃນວັນທີ 17 ມິຖຸນາ 2026, ຢ່າງເປັນທາງການ, ທີ່ໂຮງຮຽນມັດທະຍົມສົມບູນ ຕະໂອ້ຍ, ໂດຍການເຂົ້າຮ່ວມຂອງ ທ່ານ ນາງ ບຸນຖິນ ແກ່ນພົມມາ ປະທານຄະນະກຳມະການປົກຄອງເມືອງ ຜູ້ຊີ້ນໍາວຽກງານວັດທະນະທຳ-ສັງຄົມ, ທ່ານ ຄໍາຫລ້າ ວົງສະຢາ ຫົວຫນ້າຫ້ອງການສຶກສາທິການ ແລະ ກິລາເມືອງ ແລະ ທ່ານ ຄົມເພັດ ສຸເທບມະນີ ຫົວໜ້າຂະແໜງກວດກາ-ປະເມີນຜົນ ແລະ ຮັບປະກັນຄຸນນະພາບ ພະແນກສຶກສາທິການ ແລະ ກິລາແຂວງ ຕະຫຼອດຮອດຄະນະຮັບຜິດຊອບ, ຄູ-ອາຈານ ແລະ ນັກຮຽນເຂົ້າຮ່ວມ.
ສໍາລັບການສອບເສັງຈົບຊັ້ນມັດທະຍົມຕອນປາຍ ສົກຮຽນ 2025-2026, ໃນທົ່ວເມືອງຕະໂອ້ຍ, ມີນັກຮຽນເຂົ້າຮ່ວມສອບເສັງທັງໝົດ 58 ນ້ອງ, ຍິງ 25 ນ້ອງ, ຈາກ 2 ໂຮງຮຽນຄື: ມສ ຕະໂອ້ຍ ແລະ ມສ ປະຈູດອນ. ໂດຍໄດ້ກຳນົດເອົາ 1 ສູນສອບເສັງ ແລະ ແບ່ງອອກເປັນ 3 ຫ້ອງສອບເສັງ, ສະເລ່ຍຫ້ອງລະ 19-20 ນ້ອງ. ສຳລັບວິຊາທີ່ໃຊ້ໃນການສອບເສັງມີທັງໝົດ 5 ວິຊາຫຼັກ ໄດ້ແກ່: ວິຊາພາສາລາວ - ວັນນະຄະດີ, ວິທະຍາສາດ - ສັງຄົມ, ວິທະຍາສາດ - ທຳມະຊາດ, ວິຊາພາສາອັງກິດ ແລະ ວິຊາຄະນິດສາດ. ເຊີ່ງການສອບເສັງຈະດຳເນີນໄປເປັນເວລາ 3 ວັນ ຄືແຕ່ວັນທີ 17-19 ມິຖຸນາ 2026. ຈິ່ງສໍາເລັດ.
-----------------------
ໂດຍ: ກິລິຍາ

ພິທີເປີດບັ້ນສອບເສັງຈົບຊັ້ນມັດທະຍົມສຶກສາຕອນປາຍ ( ມ 7)ທົ່ວແຂວງສາລະວັນ ສົກຮຽນ 2025 – 2026 ໃນຕອນບ່າຍຂອງວັນທີ 16 ມີຖຸນາ 2...
17/06/2026

ພິທີເປີດບັ້ນສອບເສັງຈົບຊັ້ນມັດທະຍົມສຶກສາຕອນປາຍ ( ມ 7)
ທົ່ວແຂວງສາລະວັນ ສົກຮຽນ 2025 – 2026

ໃນຕອນບ່າຍຂອງວັນທີ 16 ມີຖຸນາ 2026 ຜ່ານມານີ້ທີ່ສະໂມສອນໃຫຍ່ຂອງແຂວງ ໄດ້ຈັດພິທີເປີດບັ້ນສອບເສັງຈົບຊັ້ນມັດທະຍົມສຶກສາຕອນປາຍ ( ມ7) ທົ່ວແຂວງ ສາລະວັນ ສົກຮຽນ 2025 – 2026 ຂຶ້ນຢ່າງເປັນທາງການ ໂດຍການເປັນປະທານຂອງ ທ່ານ ແຫວນເພັດ ລັດດາວົງ ຄະນະປະຈຳພັກແຂວງ ຮອງປະທານຄະນະກຳມະການປົກຄອງແຂວງ ປະທານການສອບເສັງຂັ້ນແຂວງ, ມີທ່ານ ສຸນີ ນາມມະບົວລີ ກຳມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງ, ທ່ານ ສົມພົງ ດິດສະຍະວົງ ຮອງຜູ້ອຳນວຍການສູນສົ່ງເສີມການສຶກສາຮຽນຮ່ວມ ກົມສາມັນສຶກສາ ຕາງໜ້າຈາກກະຊວງສຶກສາທິການ ແລະ ກິລາ, ມີບັນດາທ່ານຄະນະຮັບຜິດຊອບຫ້ອງການສຶກສາທິການ ແລະ ກິລາເມືອງ, ພ້ອມດວ້ຍຄະນະກໍາມະການຕັດສິນຜົນສອບເສັງ ແລະ ນ້ອງນັກຮຽນຈົບຊັ້ນ ມ 7 ເຂົ້າຮ່ວມ.
ໃນພິທີ ທ່ານ ຄໍາເຟືອງ ອິນທິສອນ ຮອງຫົວໜ້າພະແນກສຶກສາທິການ ແລະ ກິລາແຂວງ ກໍ່ໄດ້ໃຫ້ກຽດຂຶ້ນຜ່ານບົດລາຍງານຄວາມພ້ອມໃນການສອບເສັງຈົບຊັ້ນມັດທະຍົມສຶກສາຕອນປາຍ ມ7 ເຊິ່ງທ່ານໄດ້ກ່າວວ່າ: ສົກຮຽນ 2025-2026 ທົ່ວແຂວງມີໂຮງຮຽນສາມັນສຶກສາທັງໝົດ 691 ແຫ່ງ, ໂຮງຮຽນ ປະຖົມ ມີ 588 ແຫ່ງ (ນັບທັງໂຮງຮຽນສົງ ແລະ ໂຮງຮຽນເອກະຊົນ), ໂຮງຮຽນມັດທະຍົມທັງໝົດ 103 ແຫ່ງ, ມັດທະຍົມສົມບູນ 34 ແຫ່ງ, ມັດທະຍົມຕອນຕົ້ນ 69 ແຫ່ງ(ນັບທັງໂຮງຮຽນສົງ), ມີຈໍານວນນັກຮຽນທັງໝົດ 63,571 ຄົນ, ຍິງ 31,736 ຄົນ, ໃນນັ້ນ ຊັ້ນປະຖົມມີ 45,025 ຄົນ, ຍິງ 22,363 ຄົນ, ມັດທະຍົມຕອນຕົ້ນມີ 14,735 ຄົນ, ຍິງ 7,441 ຄົນ, ມັດທະຍົມຕອນປາຍມີ 3,811 ຄົນ, ຍິງ 1,932 ຄົນ, ໃນນັ້ນ ມີຈໍານວນນັກຮຽນທີ່ຈະເຂົ້າຮ່ວມການສອບເສັງຈົບຊັ້ນທັງໝົດ 9,925 ຄົນ, ຍິງ 5,010 ຄົນ ສະເພາະຊັ້ນມັດທະຍົມສຶກສາຕອນປາຍ (ມ.7) ຈໍານວນ 1,024 ຄົນ, ຍິງ 513 ຄົນ.
ໃນການກະກຽມການຈັດຕັ້ງການສອບເສັງ ແມ່ນມີຜົນສໍາເລັດຫຼາຍດ້ານເປັນຕົ້ນແມ່ນ ການນໍາສົ່ງກໍາມະການ, ຫົວບົດສອບເສັງ ແລະ ອຸປະກອນຮັບໃຊ້ການສອບເສັງລົງປະຈໍາສູນສອບເສັງໃນທົ່ວແຂວງ, ຄະນະກໍາມະການຂັ້ນແຂວງທີ່ຖືກແຕ່ງຕັ້ງໄປປະຈໍາແຕ່ລະສູນສອບເສັງໄດ້ລົງປະຈໍາສູນສອບເສັງແຕ່ລະເມືອງ, ຈັດກອງປະຊຸມແນະນໍາພາກວິຊາການ ແລະ ຮັບຟັງການຊີ້ນໍາຈາກທ່ານປະທານຄະນະກໍາມະການສອບເສັງຂັ້ນແຂວງ, ສໍາເລັດການບັນທຶກທະບຽນໃສ່ເລກໂຕະ ແລະ ສົ່ງບັນຊີລາຍຊື່ເຂົ້າຫ້ອງຂອງນັກສອບເສັງແຕ່ລະສູນສອບເສັງ, ສໍາເລັດການກະກຽມສະຖານທີ່ສອບເສັງຢ່າງພຽງພໍ; ການສອບເສັງຄັ້ງນີ້ ມີຈໍານວນນັກສອບເສັງທັງໝົດ 1,024 ຄົນ,ຍິງ 513 ຄົນ, ທຽບໃສ່ສົກຮຽນ 2024 - 2025 ຫຼຸດລົງ 80 ຄົນ; ຍິງ 14 ຄົນ; ຈໍານວນຫ້ອງສອບເສັງທັງໝົດ 52 ຫ້ອງ, ໂດຍສະເລ່ຍຕໍ່າສຸດ 12 ຄົນ/ຫ້ອງ, ສຸງສຸດ 22 ຄົນ/ຫ້ອງ, ຈໍານວນສູນສອບເສັງທັງໝົດ 9 ສູນຄື: ສູນເມືອງສາລະວັນມີ 2 ສູນ ມສ ອົງແກ້ວ, ມສ ສາລະວັນ, ສູນເມືອງຕະໂອ້ຍ, ສູນເມືອງຕຸ້ມລານ, ສູນເມືອງລະຄອນເພັງ, ສູນເມືອງວາປີ, ສູນເມືອງຄົງເຊໂດນ, ສູນເມືອງເລົ່າງາມ ແລະ ສູນເມືອງສະໜ້ວຍ ສຳລັບວິຊາສອບເສັງຈົບຊັ້ນມັດທະຍົມສຶກສາຕອນປາຍ ມ.7 ມີ ວິຊາ ພາສາລາວ-ວັນນະຄະດີ, ກຸ່ມວິຊາວິທະຍາສາດສັງຄົມ, ກຸ່ມວິຊາວິທະຍາສາດທໍາມະຊາດ, ພາສາອັງກິດ ແລະ ຄະນິດສາດ.
ຈາກນັ້ນ, ກໍ່ໄດ້ຮັບຟັງຄໍາເຫັນໂອ້ລົມຈາກທ່ານ ແຫວນເພັດ ລັດດາວົງ ຄະນະປະຈຳພັກແຂວງ ຮອງປະທານຄະນະກຳມະການປົກຄອງແຂວງ ປະທານການສອບເສັງຂັ້ນແຂວງ, ເຊິ່ງທ່ານກໍ່ໄດ້ກ່າວຄໍາຍ້ອງຍໍຊົມເຊີຍຕໍ່ຄະນະຮັບຜິດຊອບທີ່ມີຄວາມເອົາໃຈໃສ່ກະກຽມທຸກຢ່າງ ມີຄວາມພ້ອມໃນການຈັດບັ້ນສອບເສັງຄັ້ງນີ້ໄດ້ທັນກໍານົດເວລາ ກໍ່ຄືປະຕິບັດຕາມໂຄງການຫຼັກສູດຂອງກະຊວງສຶກສາໄດ້ວາງອອກ, ພ້ອມນີ້ ຍັງໄດ້ເນັ້ນໜັກໃຫ້ຄະນະຮັບຜິດຊອບຈົ່ງເອົາໃຈໃສ່ຕໍ່ບົດບາດ, ສິດ ແລະ ໜ້າທີ່ ທີ່ຂັ້ນເທິງມອບໝາຍໃຫ້, ຍຶດໝັ້ນຄວາມສາມັກຄີພາຍໃນ, ມີຄວາມໂປ່ງໃສ, ອະຍຸດຕິທໍາ, ເຂັ້ມງວດຕໍ່ໜ້າທີ່ວຽກງານທີ່ຕົນຮັບຜິດຊອບ ຮັບປະກັນຄຸນນະພາບ ແລະ ປົກປ້ອງຜົນປະໂຫຍດອັນຊອບທໍາຂອງຄູ ແລະ ນັກຮຽນ ໃຫ້ມີຄວາມສະຫງົບ ແລະ ປອດໄພ , ມີຄວາມເປັນລະບຽບຮຽບຮ້ອຍ ແລະ ນ້ອງນັກຮຽນໃຫ້ເອົາໃຈໃສ່ປະຕິຕໍ່ກົດລະບຽບຢ່າງເຄັ່ງຄັດ , ເອົາໃຈໃສ່ຕັ້ງໜ້າຄົ້ນຄ້ວາບົດຮຽນເພື່ອເຂົ້າໃນການສອບເສັງຄັ້ງນີ້ໃຫ້ສໍາເລັດຢ່າງຈົບງາມແລະໄດ້ກ່າວເປີດພິທີຢ່າງເປັນທາງການ.
ການສອບເສັງຈົບຊັ້ນມັດທະຍົມສຶກສາຕອນປາຍ ( ມ 7) ທົ່ວແຂວງສາລະວັນ ສົກຮຽນ 2025 – 2026 ແມ່ນເລີ່ມແຕ່ວັນທີ 17 – 19 ມິຖຸນາ 2026 ຈິ່ງຈະສຳເລັດ.

ພາບ - ຂ່າວໂດຍ: ແຫຼັງຄຳ ບຸດນາໂຄກ

Address

Saravane

Website

Alerts

Be the first to know and let us send you an email when ພະແນກສຶກສາທິການ ແລະ ກິລາແຂວງ ສາລະວັນ posts news and promotions. Your email address will not be used for any other purpose, and you can unsubscribe at any time.

Shortcuts

Share

Category