26/08/2026
«ទីណាមានទុក្ខលំបាក ទីនោះមានកាកបាទក្រហមកម្ពុជា»
«កាកបាទក្រហមកម្ពុជា មានគ្រប់ទីកន្លែងសម្រាប់គ្រប់ៗគ្នា»
កំពង់ចាម៖ នាព្រឹកថ្ងៃទី២៦ ខែសីហា ឆ្នាំ២០២៦ ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ចាម បានអញ្ជើញចូលរួមកម្មវិធីជួបសំណេះសំណាល សួរសុខទុក្ខ និងចែកអំណោយមនុស្សធម៌ដ៏ថ្លៃថ្លារបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តល់ជូនប្រជាពលរដ្ឋរងគ្រោះដោយសារទឹកជំនន់ ដែលត្រូវជម្លៀសមករស់នៅលើទីទួលសុវត្ថិភាព។
ពិធីនេះប្រារព្ធធ្វើឡើងនៅបរិវេណវត្តបល្ល័ង្គពេជ្រ ឃុំរអាង ដោយមានប្រជាពលរដ្ឋរងគ្រោះចំនួន ២៦គ្រួសារ មកពីឃុំកោះសំរោង ឃុំកោះទន្ទឹម និងឃុំហាន់ជ័យ។
ក្នុងឱកាសនោះ ឯកឧត្តម អ៊ុន ចាន់ដា បាននាំមកនូវការផ្តាំផ្ញើសួរសុខទុក្ខ និងក្តីនឹករលឹកពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះប្រជាពលរដ្ឋរងគ្រោះទាំងអស់ ព្រមទាំងបានលើកទឹកចិត្តឱ្យបងប្អូនថែរក្សាសុខភាព រក្សាអនាម័យ និងអនុវត្តតាមការណែនាំរបស់អាជ្ញាធរ ដើម្បីធានាសុវត្ថិភាពក្នុងអំឡុងពេលគ្រោះទឹកជំនន់។
ឯកឧត្តមបានបញ្ជាក់ថា កាកបាទក្រហមកម្ពុជា តែងតែយកចិត្តទុកដាក់ និងនៅជាមួយប្រជាពលរដ្ឋគ្រប់ពេលដែលជួបទុក្ខលំបាក ដោយឈរលើគោលការណ៍មនុស្សធម៌ មិនប្រកាន់ពូជសាសន៍ សាសនា ឬនិន្នាការនយោបាយ ស្របតាមទស្សនៈ «ទីណាមានទុក្ខលំបាក ទីនោះមានកាកបាទក្រហមកម្ពុជា» និង «កាកបាទក្រហមកម្ពុជា មានគ្រប់ទីកន្លែងសម្រាប់គ្រប់ៗគ្នា»។
ជាមួយគ្នានេះ ឯកឧត្តមបានអំពាវនាវដល់ប្រជាពលរដ្ឋទាំងអស់ បន្តសហការជាមួយអាជ្ញាធរមូលដ្ឋាន និងកម្លាំងមានសមត្ថកិច្ច អនុវត្តតាមការណែនាំ និងវិធានការសុវត្ថិភាពនានា ដើម្បីបង្ការ និងកាត់បន្ថយហានិភ័យដែលអាចកើតមានក្នុងអំឡុងពេលទឹកជំនន់។
កែសម្រួលអត្ថបទ : ឃុត ពិនិត
