គណៈកម្មការ ទូកងសារាយផ្កាយព្រឹក

29/08/2026

២៩/០៨/២០២៦ កម្មភាពជាងកំពុងតែបន្តដំណើរការសាងសង់ឆ្ពោះទៅរកការបញ្ចប់🥰

28/08/2026

📢ក្រោយពីអាក់ខានដំណើរការសាងសង់មួយរយៈ ពេលនេះអគារបេតុងរោងទូកងសារាយផ្កាយព្រឹក បានចាប់ផ្ដើមបន្តការសាងសង់ឡើងវិញហើយ ដោយកំពុងឈានចូលដំណាក់កាលសម្អាត និងលាបថ្នាំ ហើយគ្រោងនឹងបញ្ចប់ការងារនាពេលឆាប់ៗខាងមុខនេះ។

ការកសាងរោងទូកងនេះដឹកនាំដោយ ព្រះចៅអធិការស្ដីទី ភី សាំងហេង អាចារ្យ គណៈកម្មការវត្ត និងគណៈកម្មការទូកង ព្រមទាំងមានការជ្រោមជ្រែងឧបត្ថម្ភពីបរិស័ទ និងសប្បុរសជនជិតឆ្ងាយ ដែលលោកមានសទ្ធា និងស្រឡាញ់គាំទ្រកីឡាប្រពៃណីប្រណាំងទូកខ្មែរ។

រោងទូកងមួយនេះ មិនមែនគ្រាន់តែជាសំណង់សម្រាប់រក្សាទុកទូកប៉ុណ្ណោះទេ ប៉ុន្តែជាទីតាំងមួយដែលមានតម្លៃសម្រាប់ ថែរក្សាមរតកវប្បធម៌ ប្រពៃណី និងកេរដំណែលរបស់ ទូកងលោកតាសារាយផ្កាយព្រឹក ឱ្យបានគង់វង្សសម្រាប់កូនចៅជំនាន់ក្រោយ។

អាស្រ័យហេតុនេះ បរិស័ទ សប្បុរសជនជិតឆ្ងាយ និងបងប្អូនអ្នកស្រឡាញ់កីឡាប្រពៃណីប្រណាំងទូក ជាពិសេសអ្នកគាំទ្រ ទូកងលោកតាសារាយផ្កាយព្រឹកផ្ទល់ អាចចូលរួមចំណែកតាមសទ្ធាជ្រះថ្លា ដើម្បីជួយបញ្ចប់ការសាងសង់រោងទូកងនេះឱ្យបានសម្រេចជាស្ថាពរ។

🙏 រាល់ការចូលរួមរបស់បងប្អូន ទោះតិចក្ដី ច្រើនក្ដី គឺសុទ្ធតែមានតម្លៃ សម្រាប់បងប្អូនដែលមានបំណងចូលរួមឧបត្ថម្ភការសាងសង់ សូមអញ្ជើញចូលរួមតាមរយៈ QR Code ដែលបានភ្ជាប់ជូនខាងក្រោម៕

✍️២៨/០៨/២០២៦ ប្រធានទូកង កាប់ ច្រឹក

28/08/2026

22/08/2026

ស្រុករបស់ super star គឺសប្បាយអញ្ចឹងចាញ់ឈ្នះជាលទ្ធផលមួយហើយ ប៉ុន្តែភាពសាមគ្គីគឺជាកត្តាសំខាន់បំផុត ភាពជោគជ័យរបស់សារាយផ្កាយព្រឹកគឺការខិតខំប្រឹងប្រែងរបស់ក្រុម ដង្ហើមរបស់សារាយផ្កាយព្រឹកគឺអ្នកគាំទ្រ

បទ : ទូកងបងឈ្មោះសារាយផ្កាយព្រឹក
បកស្រាយផ្ទាល់ដោយ : ប្រុស ឆើត

21/08/2026

ធ្វើម្ដេចយើងគ្មានលទ្ធភាពហាត់សមដូចគេ មានតែជូនដំណឹងដល់កីឡាករពីចម្ងាយ ត្រៀមចិត្តត្រៀមកាយថែសុខភាពឱ្យបានល្អ super star សារាយផ្កាយព្រឹកថ្មី ៧៥នាក់ និងបង្ហាញវត្តមានប្រកួតនៅក្រុងកំពង់ចាម នាថ្ងៃចេញព្រះវស្សាខាងមុខនេះ មិនមែនជាទាហានហាត់កម្មង់ដូរដូចគេតែទឹកចិត្តកីឡាករសារាយផ្កាយព្រឹកប្រៀបបានយោធាផ្ដាច់ខ្លួនតស៊ូប្រយុទ្ធដល់ទីបញ្ចប់🥰

20/08/2026

អាវទឹកប៊ិចរំលេចជើងច្រវ៉ាពណ៌លឿង❤️

18/08/2026

នេះជាសកម្មភាពរបស់ព្រះចៅអធិការស្តីទី វត្តប្រាសាទវដ្តី ហៅវត្តត្បូង ស្ថិតនៅឃុំព្រែកដំបូក ស្រុកស្រីសន្ធរ ខេត្តកំពង់ចាម ដែលបានបន្តអនុវត្តតាមគន្លងដ៏ល្អប្រពៃរបស់អតីតព្រះចៅអធិការជំនាន់មុនៗ ក្នុងការដឹកនាំ និងគាំទ្រក្រុមការងារទូកង សារាយផ្កាយព្រឹក ឱ្យចូលរួមបំពេញកិច្ចការងារមនុស្សធម៌ និងសកម្មភាពសង្គមនានា ព្រមទាំងជួយដល់ពុទ្ធបរិស័ទ និងកីឡាករទូកង តាមលទ្ធភាព និងស្ថានភាពជាក់ស្តែង សកម្មភាពមនុស្សធម៌នេះត្រូវបានអតីតព្រះចៅអធិការមុនៗ និងព្រះចៅអធិការស្ដីទីដែលជាអ្នកដឹកនាំបច្ចុប្បន្នបានកំណត់ជាផ្លូវការថាអ្នកជំនាន់ក្រោយត្រូវតែបន្តសកម្មភាពនេះជារៀងរហូត ដើម្បីជាប្រយោជន៍ដល់សង្គមនិងសាសនា៕

16/08/2026

សូមក្រាបបង្គំទូលថ្វាយព្រះបវរមុនី ឃានសំវរត្ថេរ ងិន ឃីម ព្រះគ្រូសិរីវិជ្ជា ព្រះអនុគណខណ្ឌទួលគោក រាជធានីភ្នំពេញ ជាទីគោរពសក្ការៈដ៏ខ្ពង់ខ្ពស់បំផុត ក្រោយពីបានទទួលដំណឹងថា ព្រះអង្គមានព្រះរោគាពាធ កីឡាករ គណៈកម្មការ និងក្រុមការងារទូកង សារាយផ្កាយព្រឹក ព្រមទាំងព្រះសង្ឃក្នុងវត្តប្រាសាទវដ្ដី ហៅវត្តត្បូង ឃុំព្រែកដំបូក ស្រុកស្រីសន្ធរ ខេត្តកំពង់ចាម មានសេចក្តីព្រួយបារម្ភ និងនឹករលឹកចំពោះព្រះសុខភាពរបស់ព្រះអង្គជាពន់ពេក។

ព្រះអង្គជាព្រះសង្ឃដែលមានព្រះជាតិភូមិនៅឃុំព្រែកដំបូក ស្រុកស្រីសន្ធរ ហើយតែងមានព្រះទ័យយកព្រះទ័យទុកដាក់ និងចូលរួមចំណែកយ៉ាងសកម្មក្នុងការអភិវឌ្ឍក្នុងមូលដ្ឋាន ជាពិសេសការជួយឧបត្ថម្ភ និងគាំទ្រវត្តអារាម ព្រះសង្ឃ ព្រមទាំងសកម្មភាពសង្គមនានា ក្នុងឃុំព្រែកដំបូក ជាមួយគ្នានេះ ព្រះអង្គក៏តែងតែមានព្រះទ័យមេត្តាគាំទ្រ និងឧបត្ថម្ភដល់ទូកង សារាយផ្កាយព្រឹក ជាបន្តបន្ទាប់កន្លងមក ដែលជាការចូលរួមដ៏មានតម្លៃក្នុងការលើកស្ទួយ និងថែរក្សាប្រពៃណីកីឡាទូកងខ្មែរ។

អាស្រ័យហេតុនេះ ខ្ញុំព្រះករុណា យើងខ្ញុំទាំងអស់គ្នា សូមក្រាបបង្គំប្រគេនពរ សូមព្រះអង្គមានព្រះសុខភាពល្អបរិបូរណ៍ ព្រះកាយពលរឹងមាំ និងឆាប់ជាសះស្បើយពីព្រះរោគាពាធ ដើម្បីបានបន្តសកម្មភាពដ៏ប្រពៃជាប្រយោជន៍ដល់ព្រះពុទ្ធសាសនា សង្គមជាតិ និងមូលដ្ឋានជាបន្តទៀត។

សូមព្រះអង្គមេត្តាទទួលនូវសេចក្តីគោរព និងក្តីនឹករលឹកដ៏ស្មោះស្ម័គ្រពីខ្ញុំព្រះករុណា យើងខ្ញុំទាំងអស់គ្នា៕

✍️ប្រធានទូកង កាប់ ច្រឹក

14/08/2026

ជាងកំពុងតែផ្ចិតផ្ចង់លើប្លង់ទ្វារខាងក្រោយអាគារបេតុងរោងទូកងសារាយផ្កាយព្រឹក🥰

13/08/2026

ប្រវត្តិនិងអត្ថន័យនៃឈ្មោះទូក «សារាយផ្កាយព្រឹក»

សារាយផ្កាយព្រឹក គឺជានាមទូកបុរាណមួយ ដែលមានប្រវត្តិសាស្ត្រដ៏យូរលង់ និងពង្សាវតារប្រកបដោយអត្ថន័យជ្រាលជ្រៅ ឆ្លងកាត់កាលវេលាជិតពីរសតវត្សរ៍ តាមកំណត់ត្រាដែលបានរក្សាទុក ឈ្មោះសារាយផ្កាយព្រឹក ត្រូវបានប្រើប្រាស់ជាលើកដំបូងនៅឆ្នាំ១៨៣១ ហើយបានបន្តបន្សល់ឈ្មោះនេះមកដល់សម័យបច្ចុប្បន្ន។

ជាបន្តបន្ទាប់ ឈ្មោះដ៏មានតម្លៃនេះត្រូវបានចារឹក និងប្រើប្រាស់លើទូកចំនួន ៣ គ្រឿង គឺ៖

ទី១. ឆ្នាំ១៨៣១ ឈ្មោះសារាយផ្កាយព្រឹក ត្រូវបានប្រើប្រាស់ជាលើកដំបូងលើទូកង ដែលមានចំណុះ ៣៣ នាក់។

ទី២. ឆ្នាំ១៩៩៩ ឈ្មោះសារាយផ្កាយព្រឹក ត្រូវបានបន្តប្រើប្រាស់លើទូកងមួយគ្រឿងទៀត ដែលមានចំណុះ ៦៧ នាក់។

ទី៣. ឆ្នាំ២០១៥ ឈ្មោះសារាយផ្កាយព្រឹកនេះត្រូវបានបន្តចារឹកលើទូកងមួយគ្រឿងទៀត ដែលមានចំណុះ ៧៥ នាក់។

ដោយឡែក ទូកដែលបង្ហាញនៅក្នុងវីដេអូនេះ គឺជាទូកបុរាណចាស់ដែលបានប្រើប្រាស់ឈ្មោះសារាយផ្កាយព្រឹក ជាលើកដំបូងបង្អស់នៅឆ្នាំ ១៨៣១ ដូច្នេះ ទូកមួយគ្រឿងនេះមិនមែនជាវត្ថុធម្មតាសម្រាប់ការប្រណាំងតែប៉ុណ្ណោះទេ ប៉ុន្តែជាសក្ខីភាពរស់រវើកនៃប្រវត្តិសាស្ត្រ ប្រពៃណី និងមរតកវប្បធម៌ដែលបានឆ្លងកាត់ជំនាន់ជាច្រើន។

អត្ថន័យនៃនាម «សារាយផ្កាយព្រឹក»

ពាក្យ «សារាយផ្កាយព្រឹក» ជាការផ្សំនៃពាក្យ «សារាយ» និង «ផ្កាយព្រឹក» ដែលពាក្យនីមួយៗមានន័យ និងនិមិត្តរូបដ៏គួរឱ្យចាប់អារម្មណ៍។

«សារាយ» សំដៅលើរុក្ខជាតិដែលដុះនៅក្នុងទឹក ហើយតាមជំនឿប្រជាប្រិយ តំណាងឱ្យភាពត្រជាក់ត្រជុំ ភាពរស់រវើក ការរីកលូតលាស់ និងការរស់នៅប្រកបដោយភាពសុខដុមរមនា។

ចំណែក «ផ្កាយព្រឹក» សំដៅទៅលើដួងតារាដែលលេចរន្ទឺនៅលើមេឃក្នុងពេលព្រឹក ជានិមិត្តរូបនៃពន្លឺក្តីសង្ឃឹម ការចាប់ផ្តើមថ្មី និងភាពរុងរឿង ក្នុងទស្សនៈប្រជាប្រិយ ផ្កាយក៏តែងតែត្រូវបានផ្សារភ្ជាប់ជាមួយនឹងសំណាងពន្លឺនៃអនាគតផងដែរ។

ហេតុនេះ «សារាយផ្កាយព្រឹក» អាចបកស្រាយជានិមិត្តរូបថា៖ ភាពត្រជាក់ត្រជុំ សុខសាន្ត និងសេចក្តីរុងរឿង ដែលមានពន្លឺនាំផ្លូវឆ្ពោះទៅរកសំណាង និងជ័យជំនះជានិរន្តរ៍។

លើសពីអត្ថន័យនៃពាក្យ ឈ្មោះ «សារាយផ្កាយព្រឹក» ក៏បានក្លាយជានិមិត្តសញ្ញានៃការបន្តវេនមរតកពីបុរាណទៅបច្ចុប្បន្ន រាល់ពេលឈ្មោះនេះត្រូវបានដាក់លើទូកថ្មី វាមិនមែនមានន័យថាគ្រាន់តែបន្តឈ្មោះចាស់នោះឡើយ ប៉ុន្តែជាការបន្ត ព្រលឹងប្រពៃណី កិត្តិយស និងអនុស្សាវរីយ៍របស់បុព្វបុរស ទៅកាន់មនុស្សជំនាន់ក្រោយ។

ជាពិសេស ការដែលឈ្មោះមួយអាចបន្តនៅលើទូកជាច្រើនគ្រឿង ចាប់ពីឆ្នាំ១៨៣១ រហូតដល់ឆ្នាំ២០១៥ មកដល់បច្ចុប្បន្ន គឺជារឿងដ៏មានតម្លៃសម្រាប់ការសិក្សា និងការអភិរក្សប្រពៃណីទូកងខ្មែរ ដូច្នេះ មិនមែនគ្រាន់តែជាឈ្មោះទូកមួយគ្រឿងទេ គឺជាឈ្មោះដែលផ្ទុកនូវរឿងរ៉ាវនៃកាលវេលា ស្នាដៃរបស់ដូនតា កម្លាំងសាមគ្គីរបស់អ្នកអុំទូក និងស្មារតីនៃមរតកប្រពៃណីខ្មែរ។

ពីជំនាន់មួយទៅជំនាន់មួយ ឈ្មោះ «សារាយផ្កាយព្រឹក» នៅតែប្រៀបដូចជាដួងផ្កាយមួយដែលរះបំភ្លឺលើផ្លូវប្រពៃណី ដើម្បីរំឭកដល់កូនខ្មែរគ្រប់ជំនាន់ថា មរតកដែលដូនតាបានបន្សល់ទុក គឺមានតម្លៃលុះត្រាតែយើងរួមគ្នាថែរក្សា អភិរក្ស និងបន្តឱ្យរស់រវើកតទៅអនាគត។

«សារាយផ្កាយព្រឹក» ពីមរតកដូនតា ឆ្លងកាត់កាលវេលា ដល់មរតកជំនាន់ក្រោយ៕