24/07/2026
ខ្ញុំនៅតែគាំទ្រផល្លិតផលខ្មែរ🇰🇭❤️
តាមរយៈទំព័រហ្វេស ប៊ុក កាលពីថ្ងៃទី ២១ ខែកក្កដា ឆ្នាំ២០២៦ លោកស្រី នុត សម្ផស្ស អគ្គនាយិកាក្រុមហ៊ុន LSV Industry ដែលជាម្ចាស់ម៉ាកផលិតផលសាប៊ូស្ពៃ បានសំណូមពរទៅដល់សមត្ថកិច្ចពាក់ព័ន្ធទាំងអស់ មេត្តាជួយរកយុត្តិធម៌ដល់លោកស្រីដែលជាអ្នករងគ្រោះក្នុងករណីក្លែងបន្លំម៉ាកផលិតផល ព្រោះក្នុងនាមជាអ្នកផលិត គឺលោកស្រី និងក្រុមការងារ បានខំប្រឹងប្រែងយ៉ាងខ្លាំងទើបទទួលបានការគាំទ្រក្នុងទីផ្សារ តែត្រូវមកជួបរឿងបែបនេះ។
លោកស្រី នុត សម្ផស្ស បន្ថែមថា«យើងខ្ញុំទាំងអស់គ្នា មានទាំងក្រុមអ្នកវិទ្យសាស្ត្រគីមីខ្មែរ ក្រុមបច្ចេកទេសផលិត ក្រុមកសិករ ក្រុមការងារផ្នែកផ្សេងៗបានចំណាយពេលវេលា កម្លាំងចិត្ត កម្លាំងកាយអស់ជាច្រើនឆ្នាំ ទម្រាំតែមានលទ្ធផលល្អ ស្រាប់តែមករងផលប៉ះពាល់ពីទង្វើល្មើសច្បាប់របស់ជនល្មើសទាំងនេះទៅវិញ។ »
ជាការកត់សម្គាល់ ការចេញមកសំណូមពរឱ្យមានចំណាត់ការ លើក្រុមអ្នកក្លែងបន្លំម៉ាកផលិតផលស្ពៃខាងលើ គឺធ្វើឡើងបន្ទាប់ពី មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប.) ក្រោមការសម្របសម្រួលនីតិវិធីពីព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះត្រួតពិនិត្យទីតាំងមួយកន្លែង ស្ថិតនៅផ្ទះលេខ១៣៩ ផ្លូវលេខ២៨៦ សង្កាត់ទួលស្វាយព្រៃ ខណ្ឌបឹងកេងកង រាជធានីភ្នំពេញ។ ការចុះបង្ក្រាបនេះធ្វើឡើងបន្ទាប់ពីទទួលបានបណ្ដឹងសុំអន្តរាគមន៍ពីសហគ្រាស LSV Industry ដែលជាក្រុមហ៊ុនផលិតសាប៊ូស្ពៃម៉ាក Empress កាលពីថ្ងៃទី១៦ ខែកក្កដា ឆ្នាំ២០២៦។
នៅក្នុងប្រតិបត្តិការនោះដែរ ក្រុមមន្ត្រីជំនាញបានរកឃើញទីតាំងខាងលើ កំពុងធ្វើសកម្មភាពលក់-ចែកចាយ និងស្តុកទុកផលិតផលក្លែងក្លាយ និងក្លែងម៉ាកសញ្ញា Empress របស់សហគ្រាស LSV Industry។ ការរកឃើញនេះបានបញ្ជាក់ ពីការរំលោភបំពានយ៉ាងធ្ងន់ធ្ងរទៅលើកម្មសិទ្ធិបញ្ញា និងការបោកប្រាស់ទៅកាន់អ្នកប្រើប្រាស់។
ក្រោយពីចុះត្រួតពិនិត្យរួច សមត្ថកិច្ចជំនាញក៏បានសម្រេចឃ្លុំបេបិទទីតាំងខាងលើជាបណ្ដោះអាសន្ន និងបានអញ្ជើញម្ចាស់ទីតាំងជាជនជាតិចិនមកបំភ្លឺនៅអគ្គនាយកដ្ឋាន ក.ប.ប. ដើម្បីប្រមូលភស្តុតាងរកប្រភពនៃផលិតផលក្លែងម៉ាកទាំងអស់នោះ និងវែកមុខរកអ្នកដែលពាក់ព័ន្ធនៅក្នុងករណីនេះ។
គួរបញ្ជាក់ថា បច្ចុប្បន្ន ករណីនេះសមត្ថកិច្ចជំនាញ ក.ប.ប. កំពុងអនុវត្តនីតិវិធីបន្តស្របតាមច្បាប់និងបទប្បញ្ញត្តិជាធរមាន មុននឹងរៀបចំកសាងសំណុំរឿងបញ្ជូនទៅតុលាការដើម្បីអនុវត្តតាមនីតិវិធីច្បាប់។ វិធានការនេះបង្ហាញពីការប្តេជ្ញាចិត្តរបស់ រាជរដ្ឋាភិបាល ក្នុងការការពារផលប្រយោជន៍អ្នកប្រើប្រាស់ និងធានាការប្រកួតប្រជែងដោយស្មោះត្រង់នៅក្នុងទីផ្សារកម្ពុជា៕
#សាប៊ូស្ពៃ
