15/06/2026
TM mótinu í Vestmannaeyjum er lokið og þvílík helgi sem stelpurnar okkar í 5.flokki áttu ❤️🖤
TM mótið er eitt stærsta og sterkasta fótboltamót landsins og í ár tóku þátt 112 lið frá 32 félögum víðs vegar að af landinu, tæplega 1150 keppendur, þjálfarar og fararstjórar.
Afturelding mætti til leiks með þrjú lið og 26 stelpur úr 5. flokki og skrifuðu um leið nýjan kafla í sögu félagsins.
🥈 Afturelding 1 vann sér sæti í úrslitaleik TM bikarsins og hafnaði í 2. sæti eftir frábæra frammistöðu alla helgina. Þar mættu þær sterku liði Þróttar í úrslitum og er þetta besti árangur Aftureldingar frá upphafi á mótinu og í fyrsta sinn sem lið félagsins kemst alla leið í úrslitaleikinn.
Afrek sem stelpurnar og þjálfarar geta verið ótrúlega stolt af.
🥈 Afturelding 2 stóð sig einnig frábærlega og endaði í 2. sæti í Dala-Rafnsbikarnum.
👏 Afturelding 3 átti frábært mót og endaði í 7. sæti í Álseyjarbikarnum.
Valgerður Dagný Guðjónsdóttir var valin til að fara fyrir hönd Aftureldingar í landslið TM mótsins. Það er skemmtileg hefð á mótinu að þjálfarar velja einn leikmann úr hverju liði til þátttöku í leik á aðalvellinum og Vala stóð sig frábærlega og skoraði frábært mark ❤️🖤
Einnig hlaut Ema Mehica sérstaka viðurkenningu þegar hún var valin í lið mótsins, en í mótslok velja dómarar mótsins 10–12 leikmenn sem hafa skarað fram úr yfir mótið. Frábær og verðskulduð viðurkenning sem endurspeglar bæði hennar frammistöðu og þann metnað sem hefur einkennt hópinn allan ❤️🖤
En það sem stendur kannski hæst eftir helgina eru ekki bara úrslitin.
Eitt fallegasta augnablik mótsins kom í leiknum gegn Fram um sæti í úrslitaleik. Þegar Fram brenndi af víti á lokamínútunum, sýndu okkar stelpur einstakan karakter, þær fóru allar og tóku utan um andstæðingana og hughreystu þær áður en þær fögnuðu sínum sigri.
Eins og eitt foreldri andstæðinganna sagði eftir leik:
„Þær eru ekki bara stórkostlegar í fótbolta heldur stórkostlegar manneskjur.“
Þetta er það sem íþróttir eiga að snúast um: vináttu, metnað, samvinnu, virðingu, samkennd og gleði.
Stelpurnar voru félaginu til mikils sóma alla helgina. Þjálfarateymið á stórt hrós skilið fyrir fagmennsku, umgjörð og metnað sem og foreldrasamfélagið fyrir stuðninginn, stemninguna og að standa vaktina með liðunum alla leið.
Ef þetta er framtíðin, þá er hún sannarlega björt í Mosfellsbæ ❤️🖤
