16/09/2026
Körfuknattleiksdeild Breiðabliks hefur samið við Ivan Catani um að leika með meistaraflokki félagsins á komandi tímabili.
Ivan er argentínskur kraftframherji með ítalskt vegabréf. Hann er 198 cm hár, líkamlega sterkur leikmaður með góða skotgetu fyrir utan þriggja stiga línu og þykir harðskeyttur og grimmur varnarmaður.
Ivan hefur leikið í heimalandinu og víðsvegar um Evrópu síðustu ár en kemur til liðsins eftir velheppnaða dvöl í Paraguay þar sem hann skoraði í kringum 18 stig að meðaltali í efstu deild þar í landi.
Aðspurður segist Ivan hlakka mikið til að mæta til landsins og taka slaginn með liðsfélögunum: “Möguleikinn að spila á Íslandi hefur áður komið upp án þess að það gengi upp þannig að þetta er eitthvað sem mér fannst ég þyrfti að klára af listanum! Ég hef fylgst vel með undirbúningi strákanna og er tilbúinn að ganga til liðs við liðið og berjast með þeim í vetur!”.
Hrafn Kristjánsson, þjálfari meistaraflokks karla, er ánægður með nýjasta liðsmanninn:
„Þegar varð ljóst í byrjun ágúst að Dino Stipcic yrði ekki með liðinu í vetur þurftum við að ákveða hvaða leið við vildum fara varðandi leikmannamálin. Það eru ansi öflugir, stórir miðherjar mættir til leiks í deildina en við vildum ekki eltast við þá þróun heldur taka inn leikmann sem myndi efla hraðan leikstíl okkar og þann grimma varnarleik sem við viljum tefla fram í vetur. Við teljum Ivan henta vel í það hlutverk auk þess sem hann er þekktur fyrir leiðtogahæfileika og sterka rödd í búningsklefanum.“
Körfuknattleiksdeild Breiðabliks býður Ivan hjartanlega velkominn í Smárann og hlakkar til að sjá hann leika með liðinu á komandi tímabili.
Hér fyrir neðan má finna myndband af Ivan í leik í Argentínu sem sýnir ágætlega flesta þætti leiks hans.
https://www.youtube.com/watch?v=sMisfPHMS14
