10/06/2026
Haukar hljóta styrk til að efla farsæld barna í körfuknattleiksstarfi
Körfuknattleiksdeild Hauka hefur hlotið styrk úr Farsældarsjóði mennta- og barnamálaráðuneytisins til að þróa og innleiða verklag sem styður við farsæld barna og ungmenna í íþróttastarfi.
Verkefnið, sem ber heitið „Stígum farsældarskref í körfunni“, snýst um að byggja upp markvissa umgjörð utan um börn, foreldra og þjálfara með það að markmiði að efla vellíðan, öryggi og þátttöku allra iðkenda.
Körfuknattleiksdeild Hauka vill þakka mennta- og barnamálaráðuneytinu fyrir traustið og hlakkar til að nýta verkefnið til að styrkja enn frekar það mikilvæga starf sem unnið er með börnum og ungmennum á hverjum degi. „Við erum afar stolt af þessari úthlutun. Hún er viðurkenning á því mikilvæga starfi sem unnið er innan Hauka og gefur okkur tækifæri til að stíga enn stærri skref í að bjóða upp á öruggt og uppbyggilegt umhverfi fyrir börn og ungmenni,“ segir Brynjar Þór Þorsteinsson, formaður körfuknattleiksdeildar Hauka.
Áhersla verður lögð á fræðslu og stuðning við þjálfara, öflugt foreldrasamstarf, markvissari upplýsingamiðlun og eftirfylgni með iðkendum, bætt viðbrögð við áskorunum sem geta komið upp í starfinu ásamt uppbyggingu gæðakerfis sem styður við vellíðan og jákvætt félagslegt umhverfi.
„Af eigin reynslu veit ég hversu mikilvægt það er fyrir barn að tilheyra liði og eiga öruggan stað innan íþróttafélags. Með þessum styrk getum við byggt upp sterkari umgjörð í kringum börnin okkar og skapað varanlegt kerfi sem styður við iðkendur, foreldra og þjálfara. Markmiðið er að hvert barn upplifi að það skipti máli og eigi sinn stað í Haukafjölskyldunni.“ segir Benedikt S. Benónýsson, formaður Barna- og unglingaráðs körfuknattleiksdeildar Hauka.
