05/09/2026
Norðurlandameistaramótið í Gravel!
Hafdís Sigurðardóttir og Sóley Kjerúlf Svansdóttir, báðar í Hjólreiðafélagi Akureyrar, kepptu í dag á Norðurlandameistaramótinu í malarhjólreiðum (gravel) sem fram fór við Dronninglund á Norður-Jótlandi í Danmörku.
Dagurinn var erfiður hjá Hafdísi, ríkjandi Íslandsmeistara í gravel.
Strax í upphafi keppninnar biluðu gírarnir á hjólinu hennar og Hafdís sat því föst í einum gír. Það gerði krefjandi brautina enn erfiðari, sérstaklega í bröttum brekkum, og þurfti hún meðal annars að ganga upp bröttustu grasbrekkuna.
Þrátt fyrir bilunina náði Hafdís að halda sér með næstfremsta hópi keppninnar, þar sem hjólað var um 6.–7. sætið.
Eftir fyrri hringinn stoppaði hún til að reyna að koma gírunum aftur í lag. Það tókst því miður ekki og varð hún að hætta keppni.
Svekkjandi niðurstaða fyrir Hafdísi, en frammistaðan áður en hún þurfti að hætta sýnir vel að formið var til staðar – jafnvel með aðeins einn gír til umráða.
Sóley átti frábæran dag og endaði í þriðja sæti í sínum aldursflokki í heildarkeppninni. Konurnar tvær sem komu á undan henni voru frá Hollandi og Belgíu og töldust því ekki með í Norðurlandameistaramótinu.
Sóley var því fyrst Norðurlandabúa og tryggði sér Norðurlandameistaratitilinn í sínum aldursflokki!
Árangurinn skilar henni jafnframt keppnisrétti á heimsmeistaramótinu í gravel og Evrópumeistaramótinu á næsta ári.
Það er því óhætt að segja að ferðin til Danmerkur hafi skilað góðum árangri – Norðurlandameistaratitill og tveir stórmótsmiðar í farteskinu heim.
Stór dagur fyrir HFA á Norðurlandameistaramótinu og innilega til hamingju Sóley með Norðurlandameistaratitilinn!
