Sjálfsrækt

20/06/2026

Ég sat með einstakling í markþjálfun fyrir nokkru síðan sem sagði við mig: „Mér finnst ég vera fastur. Mér líður stundum eins og ég hafi ekkert komist áfram.“

Hann sá alla hlutina sem hann átti eftir að gera og það dró úr honum kraftinn að hugsa til þess hversu leiðin í land væri ennþá svo löng. Þegar við fórum að skoða þetta saman kom hins vegar önnur mynd í ljós. Hann hafði farið í gegnum breytingar sem hann hefði ekki trúað að hann gæti tekist á við. Hann hafði staðið af sér erfiða tíma, lært að setja mörk, tekið ákvarðanir sem kröfðust hugrekkis og byrjað að hlusta betur á sjálfan sig.

Ég held að við könnumst öll við þetta á einn eða annan hátt. Það er merkilegt hvað við eigum auðvelt með að sjá það sem vantar. Það sem við eigum eftir að læra, laga eða bæta. Markmiðin sem við höfum ekki enn náð, venjurnar sem við höfum ekki enn tileinkað okkur eða verkefnin sem bíða okkar handan við hornið.

Rannsóknir í sálfræði hafa sýnt að við höfum tilhneigingu til að veita hinu neikvæða meiri athygli en hinu jákvæða. Þetta er stundum kallað negativity bias og lýsir því hvernig neikvæð reynsla, gagnrýni og erfið atvik hafa oft sterkari áhrif á okkur en jákvæð reynsla af svipuðum styrk. Að einhverju leyti hefur þessi eiginleiki hjálpað okkur að þróast og lifa af. Hugurinn leitar ósjálfrátt að því sem gæti farið úrskeiðis, því sem þarf að laga og því sem við þurfum að varast.

Kannski er það ástæðan fyrir því að við getum fengið tíu fallegar athugasemdir frá fólki í kringum okkur en festum okkur samt við þá einu sem felur í sér gagnrýni. Eða af hverju eitt erfitt samtal getur skyggt á heila helgi sem annars var góð.

Vandinn er sá að ef þessi neikvæða rödd fær of mikla athygli þá getur hún skyggt á annað. Litlu skrefin sem við höfum tekið. Breytingarnar sem hafa átt sér stað. Þroskann sem hefur orðið til í gegnum reynsluna. Styrkinn sem hefur byggst upp á leiðinni.

Lestu alla greinina hér:
https://www.sjalfsraekt.is/frodleikur/

18/06/2026

Í samfélaginu okkar er árangur gjarnan mældur í tölum. Verkefnum sem klárast, kílóum sem tapast, tekjum, gráðum eða afrekum. Allt getur þetta skipt okkur máli en margt af því sem skiptir mestu máli í lífinu verður ekki mælt með þessum hætti.

Því hvernig mælum við aukið hugrekki? Hvernig mælum við það að standa af sér tímabil sem við vissum ekki hvernig við myndum komast í gegnum? Hvernig mælum við meiri sjálfsþekkingu, aukna sjálfsvinsemd eða betri tengingu við eigin líkama og líðan?

Tengill á grein í athugasemdum.

Ég sat með einstakling í markþjálfun fyrir nokkru síðan sem sagði við mig: „Mér finnst ég vera fastur. Mér líður stundum eins og ég hafi ekkert komist áfram.“

Þannig hefst heilsupistill Hrafnhildar Reykjalín Vigfúsdóttur sem akureyri.net birtir í dag. Pistillinn ber yfirskriftina Hvað ef þú ert að standa þig betur en þú heldur?

16/06/2026

Hvað erum við að gera í Sjálfsrækt? Við stöllur settumst niður í sólinni til að gefa þér smá innsýn í starfsemina okkar.

15/06/2026

KENNARAR ÓSKAST TIL STARFA HJÁ SJÁLFSRÆKT HEILSUMIÐSTÖÐ

Langar þig að starfa í hlýju, faglegu og uppbyggilegu umhverfi þar sem áhersla er lögð á slökun, vellíðan og meðvitaða hreyfingu?

Sjálfsrækt heilsumiðstöð leitar að öflugum og áhugasömum kennurum til liðs við sig.

Við leitum að:
🧘Jógakennara
Til að kenna rólegt og nærandi jóga
Reynsla af kennslu kostur
Áhersla á vellíðan, núvitund og góða nærveru

⚪Kennara í bolta- og bandvefslosun
Til að leiða tíma með nuddboltum og bandvefslosun
Þekking á hreyfingu, líkamsvitund eða endurhæfingu kostur
Geta skapað öruggt og afslappað andrúmsloft

🤸 Kennara í Mobility
Fyrir einstakling sem hefur áhuga á að læra og kenna mobility
Við bjóðum upp á handleiðslu og þjálfun í okkar aðferðafræði
Frábært tækifæri fyrir þá sem hafa bakgrunn í hreyfingu, íþróttum, jóga eða líkamsrækt og vilja þróa sig áfram sem kennarar

Hjá okkur færðu:
✨ Notalegt og styðjandi starfsumhverfi
✨ Tækifæri til að vaxa og þróast sem kennari

Við leitum að fólki sem hefur áhuga á heilsueflingu, hreyfingu og því að hjálpa öðrum að styðja við eigin heilsu og vellíðan.

Áhugasamir eru hvattir til að senda okkur stutta kynningu á sér og reynslu sinni á [email protected].

Við hlökkum til að heyra frá þér!

15/06/2026

Í Sjálfsrækt höfum við skapað nærandi rými þar sem þú getur mætt og hlúð að þér á þann hátt sem þú þarft hverju sinni. Hjá okkur færðu tækifæri til að mæta eins og þú ert, hægja á og hlusta inn á við og næra þig í gegnum slökun og hreyfingu.

12/06/2026

✨ Eydís Arna segir:

Það er mikið lagt upp úr því að fólki líði vel í Sjálfsrækt. Í boði eru virkilega góðir tímar fyrir okkur sem erum ekki íþróttamenn þar sem maður mætir hlýju viðmóti og mikils skilnings á misjafnri stöðu iðkenda.

Ég upplifi bætta líðan, bæði líkamlega og andlega. Mæli með 100%

10/06/2026

20 dagar í sumarfrí 🌿

Það eru aðeins 20 dagar eftir af vorönninni hjá okkur í Sjálfsrækt áður en við förum í sumarfrí.

Ef þú hefur verið að hugsa um að mæta í tíma, prófa eitthvað nýtt eða gefa þér mjúka stund í vikunni þá er þetta góður tími til að byrja.

“En er ekki of seint að koma núna þegar svo stutt er eftir?” Alls ekki! Kannski er það einmitt núna sem við þurfum mest á því að halda að staldra við, hreyfa okkur með meðvitund og hlúa að okkur áður en sumarið tekur við.

Hvort sem þú velur Mobility hreyfiflæði eða styrk, Bolta og bandvefslosun eða Jóga Nidra þá ertu á góðum stað til þess að mýkja þig og efla fyrir sumarið 🌼

Við hlökkum til að taka á móti þér á þessum síðustu vikum fyrir sumarfrí ☀️

08/06/2026

Á síðustu árum hefur skilningur okkar á hreyfingu og heilsu verið að breytast. Í auknum mæli er horft til þess hvernig hreyfing hefur áhrif á líðan okkar, taugakerfið og tengingu okkar við eigin líkama, fremur en að einblína eingöngu á afköst, kaloríubrennslu eða árangur í líkamsrækt. Sú nálgun kallast á ensku somatic movement eða mindful movement og hér í greininni verður talað um meðvitaða hreyfingu. Hún snýst um að auka líkamsvitund með því að hægja á og skynja það sem við erum að gera í gegnum hreyfingu.

Í hefðbundinni líkamsrækt hingað til hefur fókusinn oftast verið á mælanlegan árangur. Hraða, þyngdir, endurtekningar eða tíma. Í meðvitaðri hreyfingu er áherslan önnur. Hún snýst um að auka tengingu við líkamann á meðan hreyfingin á sér stað. Að finna hvernig hreyfing byrjar og endar. Hvar hún er auðveld og hvar hún er takmörkuð. Hvernig hún breytist þegar athyglin er færð inn í hana. Að vera fyllilega til staðar í því sem maður er að gera.

Í umræðunni um meðvitaða hreyfingu er síðan til hugtakið interoception en það vísar til getunnar til að skynja innra ástand líkamans. Innri skynjun eða líkamsvitund. Að skynja andardráttinn, hjartsláttinn, spennu og slökun í vöðvum, tilfinningar, orku eða þreytu.

Í hröðum lífsstíl verður þessi skynjun okkar stöðugt veikari vegna þess að við erum undir álagi, mikið í höfðinu á okkur, förum úr einu verkefni í annað, erum bundin við skjá og upplifum stöðugt upplýsingaflæði. Hreyfing með athygli, meðvituð hreyfing, getur hjálpað til við að endurvekja þessa tengingu við sig með því að efla getuna til að vera á staðnum í því sem maður er að gera, finna og skynja.

Lestu allan pistilinn hér:
https://www.sjalfsraekt.is/frodleikur/

03/06/2026

,,Meðvituð hreyfing snýst ekki um að gera meira – heldur að finna meira. Hún býður okkur að færa athyglina frá afköstum, kaloríubrennslu og mælanlegum árangri yfir í upplifun líkamans á meðan við hreyfum okkur. Með því að hægja á, anda og skynja betur eflum við líkamsvitund og tengingu við okkur sjálf."

Tengill á grein í athugasemdum

02/06/2026

Gefðu þér rými til að hægja á og hvíla 💚