SÊMÊL SPORT CLUB

26/03/2026

ڕاگەهاندنەک ژ کارگێرییا یانەیا وەرزشی یا سێمێل 🚨

ئەڤرۆ پێنجشەمبی، ب ئامادەبوونا سەرۆک و هەمی ئەندامێن دەستەکا کارگێرییا یانێ، کۆمبوونا ئاسایی یا یانەیا سێمێل هاتە ئەنجامدان. تەوەرێ سەرەکی یێ کۆمبوونێ تایبەت بوو ب هەلویستوەرگرتن ل دۆر بریارا دوماهیێ یا ئێکەتییا تەپاپێ یا کوردستانێ سەبارەت یارییا د ناڤبەرا هەردوو یانەیێن (سێمێل و خاک).
کارگێرییا یانەیا سێمێل ئەڤ بڕیارێن ل خوارێ بۆ ڕایا گشتی ڕادگەهینیت:

1. پێشکێشکرنا تانەیێ (اعتراض): کارگێرییا یانەیا سێمێل ب فەرمی تانە ل بڕیارا ئێکەتییا تەپاپێ یا کوردستانێ گرت و نەڕازیبوونا خوە یا تەمام دیار دکەت.

2. مۆڵەتا ٤٨ دەمژمێری: ئەم چاڤەڕێی پێداچوونا جددی د وێ بڕیارێ دا دکەین. ئەگەر د ماوێ ٤٨ دەمژمێرێن بهێت دا چ گوهۆڕین و پێداچوون نەهێنە کرن، کارگێرییا یانێ دێ هەلویستەکێ توند و جدی هەبیت

3. رێکارێن یاسایی و کۆنگرێ ڕۆژنامەڤانی: ئەگەر پشتی بڕینا ماوێ دیارکری ئێکەتییا تەپاپێ بێدەنگ بیت، یانەیا سێمێل دێ ب رێکێن یاسایی مافێن خوە پارێزیت و ب ڕێکا سازکرنا کۆنگرەکێ ڕۆژنامەڤانی یێ بەرفەرهـ هەمی ڕاستیان و هەلویستێ خوە یێ دوماهیێ بۆ ڕایا گشتی و دەستەکا گشتی یا یانەیێ و جەماوەرێ خوەشتڤی دیارکەت

25/03/2026

بەیاننامەک ژ یانەیا وەرزشی یا سێمێل
ئەم وەک کارگێڕیا یانەیا سێمێل، ب توندی بڕیارا لیژنا پێشبڕکێیان سەبارەت ب تەمامکرنا یارییا مە بەرامبەر یانەیا (خاک) د گەڕا 14ێ یا خولا پلا ئێک یا کوردستانێ دا ڕەت دکەین.

ئەڤ بڕیارە ب چ ڕەنگەکێ نینە د بەرژەوەندیا دادپەروەرییا وەرزشێ دا، پشتی کو هێرش هاتینە کرنە سەر دادڤانی و گەفێن بەردەوام ل ناڤ یاریگەهێ هاتینە کرن و دادڤانێ یاریێ ژبەر گەفێن کۆشتنێ نەشییا بهێتە دناڤ یاریگەهێدا و یاریێ ب دۆماهیک بینت یانەیا مە نابتە قوربانییا سەرپێچیێن یانەیەکا دی و تێکدانا ڕەوشا یاریگەهێ.

ئەم داخوازێ دکەین:

1. پێداچوونەوکا بلەز د ڤێ بڕیارێ دا بهێتە کرن، چونکی تەمامکرنا یاریێ د ڤێ ڕەوشێ دا زیانێ دگەهینتە مافێن یانەیا مە.

2. پێدڤیە یاسا ل سەر هەمی لایەنان وەکی ئێک بهێتە جێبەجێکرن و هەر یانەیەکا توندوتیژیێ ئەنجام بدەت، سزایێ وێ دۆڕاندنا یاریێ بیت، نەک تەمامکرنا وێ.

3. سۆبەهی کارگێرییا یانەیا مە دێ کۆمبوونەکێ ئەنجامدەت و دێ بریارێ ل سەر ڤێ بریارا ئێکەتییا تەپاپێ یا کوردستانێ دەت ئەرێ کا دێ تیما مە یاریێ ئەنجامدەت یان نە

4. بەلگە ل سە ڤێ بریارا شاش یا ئێکەتییا تەپاپێ یا کوردستانێ ئەوە کۆ ئەڤ روویدانا ل یاریا یانەیا سێمێل و یانەیا خاک دا روویدایی هەر وەک روویدانێن یارییا یانەیا دناڤبەرا یانەیا شەقلاوە و بازیان دا بوون ل گەرا دووێ کۆ نیڤا دووێ ژ یاریێ نە هاتە تەمامکرن و ئێکەتیا تەپاپێ یا کوردستانێ یانەیا بازیان ب سەرکەفتی هژمارت ب ئەنجامێ 3-0

5. مە دڤێت ئەم لژنا پێشبڕکێیان ل ئێکەتییا تەپاپێ یا کوردستانێ ئاگەهدار کەین کۆ هووین دشێن تەماشەی کوراسێ بکەن لاپەرا 20 بەندێ یارییان ل خالا 9 ئاماژە ب سزایێ ڤێ روویدانێ دایە .

یانەیا سێمێل ب چ ڕەنگەکێ بێدەنگ نابیت بەرامبەر ڤێ نەدادیێ و دێ هەمی ڕێکارێن یاسایی و کارگێڕی گریتە بەر بۆ پاراستنا مافێن یانێ و جەماوەرێ خۆ یێ وەفادار.

کارگێڕییا یانەیا وەرزشی یا سێمێل

20/03/2026

نەورۆز ل مللەتێ کورد و وەرزشڤانان پیرۆز بیت

ب هەلکەفتا هاتنا سەرسالا کوردی و جەژنا نەورۆزێ، دەستەکا کارگێڕیا یانەیا سێمێل گەرمترین پیرۆزباهیان ئاراستەی گشت خەلکێ دەڤەرا سێمێلێ و کوردستانێ ب گشتی دکەت.

هیڤیخوازین ئەڤ سالە ببیتە سالا خێر و خۆشیێ و بدەستڤەئینانا ناسناڤ و سەرکەفتنێن مەزن بۆ یانەیا مە د هەمی بوارێن وەرزشی دا.

19/03/2026

جەژنا هەوە پیرۆزبیت 🩵💛🩵

ب هەلکەفتنا هاتنا جەژنا رەمەزانا پیرۆز، کارگێڕی و یاریزانێن یانەیا سێمێل گەرمترین پیرۆزباهییان ئاراستەی تەڤایا موسلمانێن جیهانێ ب گشتی و یێن هەرێما کوردستانێ بتایبەتی دکەن پشتەڤانێنن خوشتڤی یێن یانەیا سێمێل جەژنا هەوە هەمییان پیرۆزبیت.

خودێ بکەت ئەڤ جەژنە ببیتە ئەگەرێ خێر و خوشی و ئاشتیێ بۆ هەمییان هەر ساڵ ب خێر و خوشی بن هیڤی خوازین ژ یەزدانێ مەزن ئەڤ جەژنە ببیتە هێڤێنێ سەرکەفتن و دەستکەفتان بۆ یانەیا مە .

13/03/2026

بتنێ د ١٠ چرکاندا سەربەستێ مە بلەز ترین گۆڵا ڤی وەرزی تۆمارکر 💛🩵💛

13/03/2026

13/03/2026

ئەنجامێ نیڤا ئێکێ ب گۆڵا سەربەستی یا ئێکانە ب دۆماهیک هات 🩵💛🩵

13/03/2026

تەپاپێ مە کۆم دکەت، نەکو ژ ئێک جودا دکەت

ب مەرەما توندکرنا پەیوندیێن برایەتی و نەهێلانا تۆندوتیژیێ ل یارییا دووماهییێ رویداین، شاندەکێ یانەیا مە سەرەدانا کارگێرییا یانەیا بەردەرەش و هندەک ژ پشتەڤانێن وێ یانێ کر.

د ئەڤێ سەرەدانێ دا، رێزدار هاریوان عابد سەرۆکێ یانەیا سێمێل دیار کر کو ئەوا د یاریێ دا روویدایی چەند کەسک بوون ژ هەردوو پشتەڤانێنن یانەیان چو جاران ناکەڤیتە د بن خزمەتا وەرزشێ دا. ئارمانجا مە یا ئێکێ ئاڤاکرنا نفشەکێ وەرزش دۆست و پاراستنا پەیوەندیێن دیرۆکی یێن ناڤبەرا هەردوو دەڤەرانە.

ژ لایێ خۆ ڤە، کارگێری و جەماوەرێ یانەیا بەردەرەش ب گەرمی پێشوازی ل شاندێ مە کر. ئەڤ دلفرەهی و مێڤانپەروەرییا خەلکێ بەردەرەش سەلماند کو وەرزش دێ هەر مینیتە هێمایێ تەباییێ.

12/03/2026

سوپاس و پێزانین بۆ خەمخورێن وەرزشێ

ب ناڤێ دەستەیا کارگێری و یاریزانێن یانا مە، سوپاس و پێزانینێن خۆ ئاراستەی هەردوو کەسایەتیێن نیشتیمانپەروەر و دلسۆز دکەین، بەرێز (سەردار ئالانی) بەرپرسێ لژنا دووبان یا پارتی دیموکراتی کوردستان، و بەرێز (داود شەمو) کەسایەتیێ هەرێما کوردستانێ و ناحیا خانکێ.

سوپاس بۆ هەلویستێ وان یێ جوامێرانە ب ستۆ گرتنا هەمی تێچوویێن شاندێ یانێ بۆ یارییا ل هەمبەر یانا خاک. ئەڤ پاڵپشتییە نیشانا خەمخوریا وانە بۆ گەنج و وەرزشکارێن دەڤەرێ و پالدەرەکێ مەزنە بۆ مە دا کو ب باشترین ئەنجام ڤەگەرین

12/03/2026

سۆبەهی ژڤانێ مە یێ گەرا 14ـێ یە ژ خولا پلە ئێکا کوردستانێ لهەمبەر یانەیا خاک ل کەرکوکێ 🩵💛🩵

05/03/2026

⁨ دەمەک بۆ خوشییێ دگەل دێلایی دوویر ژ کەش و هەوایێ ڕاهێنانێ ⚔️⁩