26/09/2024
#منقول
بالعشرينات چان اكو فلاح فطير و من اهل الله عنده زمال ( مكرم القارئ ) يحمل عليه ويكرب عليه بقرية بعيدة …
فد يوم الحكومة بدت تبني مدارس بالارياف ، و مر صاحبنا الفلاح على العمال ، جاي يبنون بمدرسة ، سألهم بوية شتبنون شنو هاي البنايه ؟؟گالوله عمي نبني مدرسة ، گال وعود شنهي هاي المدرسة ؟؟؟،
گلوله هاي المدرسه فد شي تسوي الزمال آدمي ،، گاللهم هاااا ، گالوله مثل ما نگلك عمي ،،
گال زين.، يعني.هسه ، هذا ابو صابر المْطَيْ( تكرمون) مالتي من أخليه يمكم يصير آدمي !؟؟؟ لان مدوخني يعض ويزگط وصعب فرد نوب ،،
ذولة العمال شياطين ، واحد ندس الثاني ، گاله ، ولك خلي يجيبة نحمل عليه ونگضي بيه شغلنا ، ونستفاد براسه…..
گاله اي عمي خلي المطي مالتك يمنه وانت روح ،
عافه يمهم وراح ، ذوله خلصو شغل بابو صابر وكملت المدرسة وبعدين باعوه و أكلوا فلوسه وراحوا ،
وره خمس سنين ، ستة ، صاحبنه اتذكر الزمال مالته ، گال خلي اروح اشوف ابو صابر صار آدمي بعده؟ ،
وصل للمدرسة لگه هالمدرسة مليانه بشر ، بيها طلاب و معلمين و بالصدفة كان مدير المدرسة اسمه استاذ ابو صابر ، كالهم عمي وين الزمال مالتي ابو صابر ، گالوله المعلمين عمي احترم نفسك ولاتغلط…. ابو صابر هذا مدير المدرسة ،
گال هااا والنوب صاير مدير. فوگاها….،
صيحولياه ، إجه المدير كاشخ و لابس قاط ورباط ، گاله تفضل عمي ، گاله ها ولك ابو صابر ما عرفتني نسيت شگد چنت أُحمِّل عليك ، واترسلك العليجة شعير ، گاله عمي انت مخبل شبيك ، گاله ولك ابو صويبر شنهي هذا الغاط والرباط خلنّك تحچي وياي هيچ بعده جلالك عندي ،
المدير. استغرب..من هالكلام …وانفعل وصار عصبي ، گاله عمي روح منا لا ابتلي بيك ، گاله خايب كلش سويت روحك ما تعرفني ، ولك موش حتى رشمتك بعدني ضامها الك ، المدير انحرج وضاج ، حط على صاحبنا وطگه بدفرة على صدرة ، فقد الوعي ، اجوه المعلمين ذبوا عليه ماي و فرچوله ، گعد ، گالهم والله هو صويحبي ، صحيح هندامه متبدل لابس قاط ابدال الجلال ، بس اعرفه من زگطته هيه هيه......
فياعمي رباط سالفتنا ...
اگللگم على كيفكم وإذا لبستوا قاط واخذتوا مناصب تره نعرفكم من الزگطه ……حتى لو بدلتو الجلال بالقوط
ابو صابر يبقى ابو صابر حتى لو بدل ( إجلاله )
وسلامتكم
