05/06/2026
सेमिफाइनलमा ओमानसँग नेपालको भेट, आइतबार बिहान प्रतिस्पर्धा हुने
सिंगापुरमा जारी एसियन गेम्स छनोट प्रतियोगिताको सेमिफाइनलमा नेपालले ओमानसँग प्रतिस्पर्धा गर्ने भएको छ। नेपाल र ओमानबीचको खेल आइतबार बिहान ७:१५ बजे हुनेछ।
शनिबार सम्पन्न समूह ‘बी’ अन्तर्गतको खेलमा हङकङले ओमानलाई १५४ रनको फराकिलो अन्तरले पराजित गर्दै समूह विजेताको रूपमा सेमिफाइनलमा स्थान सुरक्षित गर्यो। पराजित भए पनि ओमान समूह उपविजेताका रूपमा अन्तिम चारमा पुग्न सफल भयो।
समूह ‘ए’ को विजेताका रूपमा सेमिफाइनलमा पुगेको नेपालले अब फाइनल प्रवेशका लागि ओमानको चुनौती सामना गर्नेछ। यस्तै, दोस्रो सेमिफाइनलमा हङकङ र मलेसिया आमनेसामने हुनेछन्।
नेपालले समूह चरणमा उत्कृष्ट प्रदर्शन गर्दै चीनलाई २२१ रनको विशाल अन्तरले तथा मलेसियालाई १६७ रनले पराजित गरेको थियो।
सेमिफाइनलमा पुगेका नेपाल, मलेसिया, हङकङ र ओमान चारै टोलीले आगामी एसियन गेम्सका लागि यसअघि नै छनोट सुनिश्चित गरिसकेका छन्।
