09/08/2025
मल्लखांब फेडरेशन ऑफ जपानचे सचिव श्री. विवेक साबळे यांच्या पुढाकाराने भारत व जपान यांच्यामध्ये खेळाडू विनिमय कार्यक्रम राबवला जात आहे. या उपक्रमांतर्गत जपानी खेळाडूंना महाराष्ट्रातील तज्ज्ञांकडून मल्लखांबचे कौशल्य आत्मसात करण्याची संधी मिळत आहे. याचाच एक भाग म्हणून महाराष्ट्रातील प्रशिक्षक आणि खेळाडू टोकियोला जाऊन तेथील जपानी खेळाडूंना मल्लखांबचे प्रशिक्षण देत आहेत.
अलीकडेच जपानमधील खेळाडू श्री. शिनया हिरातसुका यांनी पुणे जिल्ह्यातील शिव छत्रपती पुरस्कार विजेते श्री. पंकज शिंदे यांच्याकडून विराज स्पोर्ट्स अकॅडमी मध्ये सात दिवस मल्लखांबचे प्रशिक्षण घेतले. श्री पंकज शिंदे हे स्वतः अनुभवी प्रशिक्षक असून त्यांनी जपानी खेळाडूंना मल्लखांबचे मूलभूत प्रशिक्षण दिले.
श्री. शिनया हिरातसुका यांनी श्री. विवेक साबळे यांच्या समवेत पुणे जिल्ह्यातील विविध मल्लखांब संस्थांना भेट दिली. यामध्ये
विराज स्पोर्ट्स अकॅडमी
क्रिएटिव्ह स्पोर्ट्स फाउंडेशन
आर. एस. स्पोर्ट्स अकॅडमी
स्वधा स्कूल
विद्यांचल स्कूल यांचा समावेश होता.
या भेटीदरम्यान माजी आमदार श्री. दीपक पायगुडे यांनी जपानमध्ये मल्लखांबचा होत असलेला विकास आणि तेथील संस्कृतीविषयी उत्सुकतेने विचारणा केली. त्यांनी जपानी समाजात मल्लखांबला मिळणारा प्रतिसाद, तेथील प्रशिक्षण पद्धती, आणि भारतीय क्रीडापरंपरेची जपानमधील ओळख या संदर्भात सविस्तर माहिती जाणून घेतली.
जपानी विद्यार्थ्यांसाठी अशा प्रकारच्या संधी उपलब्ध करून दिल्याबद्दल श्री. विवेक साबळे यांनी पुणे जिल्हा मल्लखांब संघटनेचे अध्यक्ष श्री. सत्यजित शिंदे, कार्याध्यक्ष श्री. विनायक बापट, सचिव श्री. योगेश येवले, सदस्य डॉ. श्री. तुषार गुजर, आणि तांत्रिक समिती सदस्य श्री. पंकज शिंदे
यांचे मनःपूर्वक आभार मानले.
सदर उपक्रम भारत आणि जपान यांच्यातील सांस्कृतिक व क्रीडा संबंध अधिक दृढ करणारा ठरला असून,भविष्यात जपानमधील मल्लखांबचा प्रचार आणि प्रसार करण्याच्या उद्देशाने लवकरच पुण्यातील प्रशिक्षक व खेळाडूंचा जपान दौरा आयोजित करण्याचा मानस असल्याचे श्री. विवेक साबळे यांनी सांगितले.
