04/02/2021
#राज्य_अजिंक्यपद_निवड_चाचणी_कबड्डी_स्पर्धांचा_कार्यक्रम_जाहीर.
महाराष्ट्र राज्य कबड्डी असो.च्या विद्यमाने प्रतिवर्षी वरिष्ठ गट पुरुष/महिला, कुमार गट मुले/मुली, किशोर गट मुले/ मुली राज्य अजिंक्यपद निवड चाचणी कबड्डी स्पर्धेचे आयोजन करण्यात येते. २०२०-२१ यावर्षीच्या सदर स्पर्धा कोरोना महामारीमुळे झाल्या नव्हत्या. पण मा.मुख्य सचिव यांनी जारी केलेल्या दि.१४/०१/२०२१ च्या आदेश क्र.DMU/2020@CR92/DosM-1 अनुसार महाराष्ट्र शासनाने सर्व खेळाच्या स्पर्धा आयोजित करण्यास परवानगी दिली आहे.
महाराष्ट्र राज्य कबड्डी असोसिएशनचे कार्याध्यक्ष खास.गजानन कीर्तिकर यांच्या अध्यक्षतेखाली राज्य संघटनेच्या कार्यालयात झालेल्या सभेत राज्य अजिंक्यपद स्पर्धेच्या अनुषंगाने चर्चा होऊन निर्णय घेण्यात आले. २०२०-२१ या वर्षाच्या राज्य अजिंक्यपद निवड चाचणी कबड्डी स्पर्धांचा कार्यक्रम जाहीर केला आहे. सदर स्पर्धा ५ मार्च २०२१ ते ४ एप्रिल २०२१ च्या दरम्यान जळगांव, सांगली व नाशिक या शहरात होणार आहेत.
३२ वी किशोर-किशोरी राज्य अजिंक्यपद निवड चाचणी कबड्डी स्पर्धेचा यजमान पद जळगांव जिल्हाकडे देण्यात आलं आहे. ५ मार्च ते ८ मार्च २०२१ दरम्यान सदर स्पर्धा होईल. तर ४७ वी कुमार-कुमारी राज्य अजिंक्यपद निवड चाचणी कबड्डी स्पर्धा १६ मार्च ते १९ मार्च २०२१ दरम्यान सांगली जिल्ह्यात होईल. किशोर व किशोरी गटासाठी खेळाडूंचा जन्म ३१ मार्च २००५ नंतर, कुमार व कुमारी गटांसाठी ३१ मार्च २००१ नंतर झालेला असणे गरजेचे आहे.
६८ वी वरिष्ठ गट राज्य अजिंक्यपद निवड चाचणी कबड्डी स्पर्धा १ एप्रिल ते ४ एप्रिल २०२१ दरम्यान सिन्नर-नाशिक येथे आयोजित करण्यात येणार आहे. सदर स्पर्धां मधून विविध गटाच्या राष्ट्रीय स्पर्धेसाठी महाराष्ट्राचे संघ निवडले जातील.
