17/03/2026
IPL തുടങ്ങാൻ ഉള്ള വഴി വന്നത് എങ്ങനെ ആണെന്ന് നിങ്ങൾക്ക് അറിയാമോ 💯💯
ഐപിഎൽ എന്ന ഇന്നത്തെ ക്രിക്കറ്റ് ലോകത്തിലെ ഏറ്റവും വലിയ ലീഗ് തുടങ്ങുന്നതിനും ഒരു വർഷം മുൻപേ ഇന്ത്യയിൽ ട്വന്റി-20 ക്രിക്കറ്റിന്റെ വിത്തുകൾ പാകിയ ലീഗായിരുന്നു ഐസിഎൽ (Indian Cricket League). സീ എന്റർടൈൻമെന്റ് ഗ്രൂപ്പിന്റെ തലവൻ സുഭാഷ് ചന്ദ്രയാണ് 2007-ൽ ഇത്തരമൊരു പുതിയ ആശയവുമായി മുന്നോട്ട് വന്നത്. അന്ന് ബിസിസിഐയുടെ എതിർപ്പിനെ മറികടന്ന് മുൻ ഇന്ത്യൻ നായകൻ കപിൽ ദേവിനെ ഇതിന്റെ എക്സിക്യൂട്ടീവ് ബോർഡ് ചെയർമാനാക്കി കൊണ്ടാണ് ലീഗ് പ്രവർത്തനം ആരംഭിച്ചത്. അന്ന് ബിസിസി ഐ ക്ക് സ്വന്താമായൊരു ലീഗ് എന്നൊരു പ്ലാനൊന്നും ഇല്ലാത്തതിനാൽ ഇന്ത്യൻ താരങ്ങൾ എല്ലാം ഈ ലീഗിൽ കളിക്കുമെന്ന് ന്യൂസ് വന്നിരിന്നു. സച്ചിനൊക്കെ ഈ ലീഗിൽ കളിക്കുന്ന കാര്യം ഒക്കെ തീരുമാനമാക്കാൻ തുടങ്ങുമ്പോഴാണ് ബിസിസി ഐ അപകടം മണക്കുന്നതും, ഐപിൽ തുടങ്ങാനുള്ള പരിപാടികൾ ആരംഭിക്കുന്നതും.
തുടക്കത്തിൽ ചെന്നൈ സൂപ്പർസ്റ്റാർസ്, ചണ്ഡീഗഡ് ലയൺസ്, ഡൽഹി ജെറ്റ്സ്, ഹൈദരാബാദ് ഹീറോസ്, കൊൽക്കത്ത ടൈഗേഴ്സ്, മുംബൈ ചാംപ്സ് എന്നീ ആറ് ടീമുകളാണ് ഉണ്ടായിരുന്നതെങ്കിലും പിന്നീട് അഹമ്മദാബാദ് റോക്കറ്റ്സ്, ലാഹോർ ബാദ്ഷാസ്, ധാക്ക വാരിയേഴ്സ് എന്നീ ടീമുകൾ കൂടി ഈ ലീഗിന്റെ ഭാഗമായി. വരും സീസണുകളിൽ എല്ലാ രാജ്യത്ത് നിന്നും ഇതേ പോലെ ഓരോ ടീമുകളെ എങ്കിലും പങ്കെടുപ്പിക്കാനുള്ള പ്ലാനൊക്കെ ഐസിഎല്ലിന് ഉണ്ടായിരുന്നു.
ക്രിക്കറ്റ് ലോകത്തെ അന്നത്തെ വമ്പൻ താരങ്ങളായ ബ്രയാൻ ലാറ, ഷെയ്ൻ വോൺ, ഇൻസമാം ഉൾ ഹഖ്, ഷെയ്ൻ ബോണ്ട്, ക്രിസ് കെയ്ൻസ്, അബ്ദുൾ റസാഖ് എന്നിവർക്കൊപ്പം ഇന്ത്യൻ താരങ്ങളായ അമ്പാട്ടി റായുഡു, സ്റ്റുവർട്ട് ബിന്നി, രോഹൻ ഗവാസ്കർ എന്നിവരും അന്ന് ഐസിഎല്ലിൽ പാഡണിഞ്ഞിരുന്നു. ലീഗിലെ ആദ്യ സീസണായ 2007-ൽ ചണ്ഡീഗഡ് ലയൺസിനെ തോൽപ്പിച്ച് ചെന്നൈ സൂപ്പർസ്റ്റാർസ് കിരീടം ചൂടിയപ്പോൾ, 2008-ലെ രണ്ടാം സീസണിൽ ഹൈദരാബാദ് ഹീറോസിനെ പരാജയപ്പെടുത്തി പാകിസ്ഥാൻ താരങ്ങൾ അണിനിരന്ന ലാഹോർ ബാദ്ഷാസ് ആണ് ചാമ്പ്യന്മാരായത്.
പിന്നീട് ബിസിസിഐയുടെ കടുത്ത എതിർപ്പും ഈ ലീഗിൽ പങ്കെടുക്കുന്ന കളിക്കാർക്ക് ഇന്ത്യൻ ദേശീയ ടീമിൽ വിലക്ക് ഏർപ്പെടുത്തിയതും ഐസിഎല്ലിന് വലിയ തിരിച്ചടിയായി. അമ്പാട്ടി റായിഡുവിനൊക്കെ ഈ കാരണം കൊണ്ട് രണ്ടോ മൂന്നോ വർഷം ഇന്ത്യൻ ക്രിക്കറ്റിന് നഷ്ടമായിട്ടുണ്ട്. കൂടാതെ ബിസിസിഐ തന്നെ ഐപിഎൽ എന്ന പേരിൽ ഔദ്യോഗിക ലീഗ് ആരംഭിച്ചതോടെ സ്പോൺസർമാരും കാണികളും അങ്ങോട്ടേക്ക് മാറുകയും ഐസിഎൽ സാമ്പത്തിക പ്രതിസന്ധിയിലാവുകയും ചെയ്തു. ഒടുവിൽ 2009-ഓടെ ഈ റിബൽ ലീഗ് ക്രിക്കറ്റ് ചരിത്രത്തിന്റെ ഭാഗമായി മാറി.
Copied