27/07/2026
ലോകക്കപ്പ് കഴിഞ്ഞു... കട്ട് ഔട്ടുകൾ അഴിച്ചു... ആരവം ഒഴിഞ്ഞു
ലോകക്കപ്പ് തീർന്നു.
നാല് വർഷം കൂടി കാത്തിരിക്കണം എന്ന ബോർഡ് മനസ്സിൽ ഒട്ടിച്ചുകൊണ്ട് നമ്മൾ തിരിച്ചുനടന്നു.
ഒരു മാസം നീണ്ട ആ പനി ഇപ്പോൾ ഇറങ്ങി എന്ന് തന്നെ നിസംശയം പറയാം . രാവിലെ 3 മണിക്ക് അലാറം വെച്ച് എഴുന്നേറ്റിരുന്നത്, അബദ്ധത്താൽ പ്രൊജക്ടർ കുറച്ചു നേരത്തേക്കെങ്കിലും കളി മുടക്കിയത് , കട്ടൻ ചായയും മിച്ചറും, ഷവർമ്മക്ക് വേണ്ടിയുള്ള പന്തായവും... അങ്ങനെ കുറെ കുറെ ഓർമ്മകൾ..
"ഓഫ്സൈഡ് ആയിരുന്നു..!അല്ല..!വാർ- റഫറിയുടെ ചില അബദ്ധങ്ങൾ "
ഇതൊക്കെ പറഞ്ഞ് വഴക്കുണ്ടാക്കിയത്... എല്ലാം ഒരു ഓർമ്മ മാത്രം.
നാട്ടിലെ കാഴ്ചകൾ
നമ്മുടെ നാട്ടിലെ തെരുവുകൾക്ക് എന്ത് പറ്റി?
ദിവസങ്ങളോളം 10 അടി ഉയരമുള്ള കട്ട് ഔട്ടുകൾക്ക് മുന്നിൽ നിന്ന് ഫോട്ടോ എടുത്തിരുന്ന ചെറുപ്പക്കാർ ഇപ്പോൾ അവയെ അഴിച്ചുകെട്ടുന്ന തിരക്കിലാണ്.
പ്ലാസ്റ്റിക് കവറിൽ പൊതിഞ്ഞ ജേഴ്സികൾ അലമാരയുടെ അടിയിലേക്ക്.
പന്ത് ഉരുണ്ടപ്പോൾ നമ്മൾ കുടുംബമായിരുന്നു. ബ്രസീൽ ഫാനും, കൂടെ നടക്കുന്നവൻ പോർച്ചുഗൽ, ഫ്രാൻസ്, അർജന്റീന ഫാനും, ആയിരുന്നിട്ടും, ഗോൾ വീണാൽ ഒരേപോലെ കയ്യടിച്ചു. ഇപ്പോൾ ആരവം ഒഴിഞ്ഞപ്പോൾ വീണ്ടും നമ്മൾ "ഞാൻ" ആയി.
എന്നിട്ടും ബാക്കിയാവുന്നത്
ലോകക്കപ്പ് തരുന്നത് കപ്പ് മാത്രമല്ലല്ലോ.
ആ 90 മിനിറ്റ് നമ്മളെ പഠിപ്പിച്ചു - തോറ്റിട്ടും എഴുന്നേൽക്കാൻ, അവസാന സെക്കന്റ് വരെ പ്രതീക്ഷ കൈവിടാതിരിക്കാൻ, ഒരൊറ്റ ഗോളിന് വേണ്ടി ഒരു നാട് മുഴുവൻ ഒരുമിച്ച് നിലവിളിക്കാൻ.
കട്ട് ഔട്ടുകൾ അഴിച്ചുമാറ്റും. ബാനറുകൾ കീറും. പക്ഷേ ആ രാത്രികളിലെ ഉറക്കമൊഴിക്കലും, ഗോളടിക്കുമ്പോഴുള്ള കൂട്ടക്കരച്ചിലും, "നമ്മുടെ ടീം" എന്ന് പറഞ്ഞ ആ അഭിമാനവും... അതൊന്നും ആരും അഴിച്ചുമാറ്റില്ല.
അടുത്ത ലോകക്കപ്പ് വരുമ്പോൾ വീണ്ടും നമ്മൾ കാണും. പുതിയ കട്ട് ഔട്ടുകൾ, പുതിയ ജേഴ്സികൾ, പുതിയ ആരവങ്ങൾ.
ബ്ലാക്ക് ക്യാപ്സ് ആർട്സ് & സ്പോർട്സ് ക്ലബ്ബ്, പാലരിഞ്ഞാൽ ♥️
