17/05/2026
যোৰহাট জিলা ক্ৰীড়া সন্থা আৰু উত্তৰ যোৰহাট উপ ক্ৰীড়া সন্থাৰ যুটীয়া উদ্যোগত কল্যাণী খেলপথাৰত অনুষ্ঠিত হোৱা বিনয় শইকীয়া সোঁৱৰণী আন্তঃক্লাব 'চি' ডিভিজন ফুটবল লীগৰ ফাইনেল মেচত বুঢ়ীদিহা ফুটবল ক্লাবে (ঢেকীয়াখোৱা) চূড়ান্ত বিজয়ীৰ খিতাপ অৰ্জন কৰিছে। এক শ্বাসৰুদ্ধকৰ ফাইনেল খেলত বুঢ়ীদিহা ক্লাবে চটাই চাহ বাগিচা ফুটবল ক্লাবক ৩-১ গ'লৰ ব্যৱধানত পৰাস্ত কৰে। এই সুন্দৰ জয়েৰে বুঢ়ীদিহা ক্লাবে ২০২৭ বৰ্ষৰ বাবে 'বি' ডিভিজন ফুটবল লীগত নিজৰ স্থান সুৰক্ষিত কৰিবলৈ সক্ষম হয়।
আক্ৰমণ আৰু প্ৰত্যাক্ৰমণেৰে ভৰপূৰ এই খেলখনত আৰম্ভণিৰে পৰাই বুঢ়ীদিহা ক্লাবে আধিপত্য বিস্তাৰ কৰে। খেলৰ প্ৰথম ৫ মিনিটতেই বুঢ়ীদিহাৰ খেলুৱৈ কিৰণ বাউৰীয়ে এটা সুন্দৰ গ'ল দি দলক ১-০ ৰ অগ্ৰগতি প্ৰদান কৰে। ইয়াৰ পিছতে ৩৫ মিনিটত মনজিৎ কৰ্মীয়ে আন এক গ'ল দিয়াৰ ফলত প্ৰথমাৰ্ধৰ অন্তত দলটোৱে ২-০ ব্যৱধানত আগবাঢ়ি থাকে। দ্বিতীয়াৰ্ধৰ ৬৮ মিনিটত দলটোৰ অভিজ্ঞ খেলুৱৈ গৌতম তেলেংগাই তৃতীয়টো গ'ল দি বুঢ়ীদিহাৰ বিজয় প্ৰায় নিশ্চিত কৰে। অৱশ্যে তাৰ ঠিক পিছতেই, অৰ্থাৎ ৬৯ মিনিটত চটাই চাহ বাগিচাৰ পৱন মুম্বাই এটা গ'ল পৰিশোধ কৰি ব্যৱধান ৩-১ লৈ হ্ৰাস কৰে যদিও সেয়া পৰাজয়ৰ পৰা হাত সাৰিবলৈ যথেষ্ট নাছিল।
কৱিন্দ্ৰ শৰ্মাই উদ্বোধন কৰা এই চূড়ান্ত খেলখনৰ আৰম্ভণিতে জিলা ক্ৰীড়া সন্থাৰ প্ৰয়াত কাৰ্যনিৰ্বাহক বীৰেন বড়া আৰু বিনয় শইকীয়াৰ আত্মাৰ সদগতি কামনা কৰি এক মিনিট সময় মৌন প্ৰাৰ্থনা কৰা হয়। খেলৰ অন্তত ফুটবল বিভাগৰ সম্পাদক হেমিদুৰ ৰহমানে আঁত ধৰা বঁটা বিতৰণী অনুষ্ঠানত বিজয়ীসকলক পুৰস্কৃত কৰা হয়। ফাইনেল খেলৰ শ্ৰেষ্ঠ খেলুৱৈ হিচাপে বিবেচিত হোৱা বুঢ়ীদিহা ক্লাবৰ গৌতম তেলেংগাক ফুটবল বিভাগৰ চেয়াৰমেন দ্বিজেন শইকীয়াই বঁটা প্ৰদান কৰে। আনহাতে, সৰ্বোচ্চ গ'লদাতাৰ বঁটা লাভ কৰা কিৰণ বাউৰীক পুৰস্কৃত কৰে কৱিন্দ্ৰ শৰ্মাই। জিলা ক্ৰীড়া সন্থাৰ সভাপতি শান্তনু পূজাৰী আৰু দাতা পৰিয়ালৰ সদস্য বিপুল শইকীয়াই চেম্পিয়ন দলক বঁটা প্ৰদান কৰাৰ বিপৰীতে, সাধাৰণ সম্পাদক জুল খাউণ্ড আৰু জ্যেষ্ঠ উপ-সভাপতি ললিত চন্দ্ৰ বড়াই ৰানাৰ্ছ-আপ দলটোক বঁটা প্ৰদান কৰে।
ফাইনেল মেচখন পৰিচালনা কৰে ৰেফাৰী আমিৰ হুছেইনে। এই গুৰুত্বপূৰ্ণ খেলখন উপভোগ কৰাৰ বাবে যোৰহাট জিলা পৰিষদৰ প্ৰাক্তন সভাপতি ৰঞ্জন শইকীয়া, জিলা পৰিষদৰ সদস্য চিদানন্দ ভূঞা, পঞ্চায়ত সদস্যা মৌচুমী শৰ্মা, লক্ষী বড়া, প্ৰাক্তন খেলুৱৈ বাবুল দত্ত, নিৰ্মল শইকীয়া, সমাজকৰ্মী ৰাজীৱ নাজীৰ লগতে জিলা ক্ৰীড়া সন্থা আৰু উত্তৰ যোৰহাট উপ ক্ৰীড়া সন্থাৰ বহুসংখ্যক গণ্য-মান্য বিষয়ববীয়া খেলপথাৰত উপস্থিত থাকে।
