29/08/2026
যোৰহাটৰ ক্ৰীড়া ক্ষেত্ৰৰ বাবে এক ঐতিহাসিক ক্ষণ। যোৰহাটত ক্ৰিকেটৰ ঐতিহ্য আৰু গৌৰৱোজ্বল ইতিহাস বৰ্তাই ৰাখিবলৈ যোৰহাট জিলা ক্ৰীড়া সন্থাৰ উদ্যোগত, পশ্চিম যোৰহাট খেলপথাৰত স্থাপন হ'ল যোৰহাট ক্ৰিকেট একাডেমীৰ আধাৰশিলা।
যোৰহাটৰ পৰা ধাৰাবাহিকভাৱে ৰাজ্যিক, ৰাষ্ট্ৰীয় আৰু আন্তঃৰাষ্ট্ৰীয় খেলুৱৈ সৃষ্টিৰ লক্ষ্যৰে যোৰহাট জিলা ক্ৰীড়া সন্থাই পশ্চিম যোৰহাট খেলপথাৰত স্থাপন কৰিছে যোৰহাট ক্ৰিকেট একাডেমী। যোৰহাট জিলা ক্ৰীড়া সন্থাৰ সভাপতি শ্ৰী শান্তনু পূজাৰীয়ে স্থাপন কৰে যোৰহাট ক্ৰিকেট একাডেমীৰ আধাৰশিলা।
আধাৰশিলা স্থাপন অনুষ্ঠানত উপস্থিত থাকে প্ৰাক্তন ৰঞ্জী ট্ৰফী খেলুৱৈ নৰেন সভাপণ্ডিত, পংকজ শ্ৰুতিকৰ, ধ্ৰুৱজ্যোতি সভাপণ্ডিত, প্ৰাক্তন ক্রিকেট খেলুৱৈ অৰূপ বৰঠাকুৰ, যোৰহাট জিলা ক্ৰীড়া সন্থাৰ সম্পাদক জুল খাউণ্ড, পশ্চিম যোৰহাট ক্ৰীড়া সন্থাৰ সভাপতি অৰুণ বৰপাত্ৰগোহাঁইকে প্ৰমুখ্যে কৰি বহু বিশিষ্ট ব্যক্তি আৰু যোৰহাট জিলা ক্ৰীড়া সন্থা আৰু পশ্চিম যোৰহাট ক্ৰীড়া সন্থাৰ বিষয়ববীয়াসকল।
যোৰহাট জিলা ক্ৰীড়া সন্থাৰ তত্বাৱধানত অভিজ্ঞ আৰু স্বীকৃতিপ্ৰাপ্ত প্ৰশিক্ষকৰ দ্বাৰা যোৰহাট ক্ৰিকেট একাডেমীত খেলুৱৈসকলক প্ৰশিক্ষণ প্ৰদান কৰা হ'ব আৰু প্ৰতিভাৱান খেলুৱৈ সৃষ্টিত গুৰুত্ব দিয়া হ'ব। যোৰহাটত স্থাপন হ'বলগীয়া ক্ৰিকেট একাডেমীখনৰ প্ৰতি যোৰহাটবাসী আৰু ক্ৰীড়াপ্ৰেমীসকলৰ সহায়, সহযোগিতা আৰু সমৰ্থন কামনা কৰিছে যোৰহাট জিলা ক্ৰীড়া সন্থাই। Santanu Puzari Jul Khound
