09/08/2025
North Garo Hills a·jani Nikman G. Momin, Guwahati o ong·atanggipa 2nd Guwahati Smart City International Open FIDE Rating Chess Tournament 2025 – Chief Minister Cup o U-14 ba bilsi 14 ni ning·o ong·gipa bako 2-gipa biapko man·e Garo Hills na mikkim rasongko ra·baaha.
Ia ong·atanggipa Chess kal·susaanio North Garo Hills, Lower Dilma Apal ni Nikman G. Momin, chess kal·susani a·bao India a·songni aro gipin a·songrangoni susagiparangni gisepo an·tangni gisik nangani, changa sapani aro ka·dongbee ia sal 5 na ong·anggipa chess kal·susaanio on·kange kalenba U-14 ba bilsi 14-ni ning·o kal·susagiparangni gisepo gnigipa biapko man·angaha. Uni cheanina tangka gong 3,500, trophy aro certificate rangko on·angaha.
Marshal K. Sangma aro Dimse G. Momin ni degipa ni indake chu·sokani aro jat tangna rasongko ra·baanichi Garo Hills o Chess kal·na gisik nangiparangna ka·donganiko on·an baksana chadamberangna didianikoba on·anggen ine Garo Hills ni Chess kal·aniko ma·sigiparang aganangaha.Guwahati o ong·atgipa ia chess kal·susaaniko sal bongana FIDE niamrango pangchake round 10 rangko Swiss league format kal·anio pangchake ong·atangaha. Ia susaaniko All Assam Chess Association, State Level Advisory Committee for Students and Youth Welfare baksa Assam sorkarini dakchakanichi ong·atangaha jeon boksis rangna chu·gimik tangka gong Lakh 5.10 ko donangaha.
Nikman G. Momin ni indake bilonggen chubegipa gadango aro kal·na sapbatgiparangni gisepo namgipa bimingko ra·baaniara Garo Hills osan ka·donganiko ong·aigija state, national aro international gadangrango susana sapgiparang Meghalaya a·dokoba chadamberang donga ineba ka·dongdapaniko mesoka.
