Chiplun Cycling Club

08/06/2026

अल्पावधीतच नावारूपास आलेल्या आणि प्रत्येक सायकलपटूच्या बकेट लिस्टमध्ये स्थान मिळवलेल्या चिपळूण सायकलिंग क्लब आयोजित "कुंभार्ली घाटाचा राजा" राष्ट्रीय सायकल स्पर्धेच्या लोकप्रियतेची दखल घेत,
आम्ही सायकलप्रेमी फाउंडेशन, ठाणे–मुंबई यांच्या वतीने कुंभार्ली घाटाचा राजा सायकल स्पर्धेची संकल्पना, स्वरूप आणि वैशिष्ट्ये याविषयीची एक विशेष मुलाखत घेण्यात आली.

ही मुलाखत ज्येष्ठ पत्रकार मकरंद जोशी यांनी घेतली असून, संबंधित संस्थेने ती खाली दिलेल्या लिंकवर प्रसारित केली आहे.

आपल्या सर्वांचे प्रेम, पाठिंबा आणि वाढत्या सहभागामुळेच या स्पर्धेला मिळालेले हे यश अधिक प्रेरणादायी ठरत आहे.त्याबद्दल आपल्या सर्व सायकलस्वार चे आभार 🚴‍♂️🏆

Welcome to Aamhi Cycle Premi Foundation!We are a passionate Non-Go...

09/05/2026

‘कुंभार्ली घाटाचा राजा 2026’ ईश्वर पाटील तर ‘कुंभार्ली घाटाची राणी 2026’ श्रावणी परिट : ‘किंग ऑफ कुंभार्ली 2026’ राष्ट्रीय स्पर्धेला देशभरातून उत्स्फूर्त प्रतिसाद.

सह्याद्रीच्या कुशीत रंगलेल्या अत्यंत रोमहर्षक आणि चित्तथरारक, प्रतिष्ठेच्या आव्हानात्मक ‘किंग ऑफ कुंभार्ली 2026’ या चिपळूण सायकलिंग क्लब आयोजित राष्ट्रीय सायकलिंग स्पर्धेत यंदा जवळपास 400 स्पर्धक देशाच्या कानाकोपऱ्यातून सहभागी झाले होते. या वर्षीच्या पर्वात पुरुषांमध्ये ईश्वर पाटील याने दमदार कामगिरी करत ‘कुंभार्ली घाटाचा राजा’ हा मानाचा किताब पटकावला. अटीतटीच्या या स्पर्धेत अवघ्या 01:01:13 या आजपर्यंतच्या विक्रमी वेळेत स्पर्धा पूर्ण करत त्याने या स्पर्धेत अव्वल स्थान मिळवले. तर महिलांमध्ये पुण्याची श्रावणी परिट हिने 1:26:34 या वेळेत ही स्पर्धा पूर्ण करत ‘कुंभार्ली घाटाची राणी’ हा किताब पटकावला.

यंदाही प्रत्येक गटात तुफान चुरस पाहायला मिळाली. अवघ्या काही मिलीसेकंदांच्या फरकाने क्रमांकांमध्ये बदल दिसून आले.

सकाळी सहा वाजता सावरकर मैदान, डॉ. बाबासाहेब आंबेडकर चौक इथून साहिल डेव्हलपर्स चिपळूणचे श्री. सचिन कदम तसेच रत्नागिरी ट्रायथलीट क्लबचे संस्थापक व रत्नागिरी जिल्हा सायकल गौरव पुरस्कार प्राप्त श्री. अमित कवितके यांच्या हस्ते फ्लॅग ऑफ करून सुरू झालेली ही स्पर्धा कुंभार्ली घाट माथ्यावर संपवून, स्पर्धकांनी चिपळूणमध्ये इंदिरा गांधी सांस्कृतिक केंद्रामध्ये पारितोषिक वितरण समारंभासाठी हजेरी लावली.

माननीय आमदार शेखरजी निकम यांच्या प्रमुख उपस्थितीमध्ये, श्री. अनिरुद्ध निकम, श्री. जयेंद्रशेठ खताते, श्री. दशरथ दाभोळकर, श्री. नितीन ठसाळे, श्री. मंगेश पेढांबकर या मान्यवरांच्या हस्ते तर प्रमुख देणगीदार श्री. सचिन कदम, विनती ऑरगॅनिक्सचे प्रतिनिधी श्री. सुमेर तारे, कृष्णा केमिकल्सचे प्रतिनिधी श्री. सुयोग चव्हाण, सारस्वत बँकेचे प्रतिनिधी श्री. कल्पेश महाडीक व उपस्थित मान्यवर यांच्या उपस्थितीत दिमाखदार सोहळ्यात बक्षीस वितरण समारंभ पार पडला.

चिपळूण सायकलिंग क्लबच्या प्रत्येक उपक्रमासोबतच या स्पर्धेसाठी देखील हरसंभव मदत करणारे मा. आमदार शेखर सरांनी आपल्या मनोगतात सर्व सहभागी स्पर्धकांचे आणि विजेत्यांचे मनापासून अभिनंदन केले. सोबत अल्पावधीतच लोकप्रियतेचे शिखर गाठलेली आणि राष्ट्रीय स्तरावरील स्पर्धेचे स्वरूप प्राप्त झालेल्या या स्पर्धेच्या नेटक्या आयोजनाबद्दल चिपळूण सायकलिंग क्लब आणि उत्स्फूर्त स्वयंसेवकांची मनस्वी प्रशंसा करीत, स्थानिक नेते आणि उद्योगांना या स्पर्धेसाठी आणखी सढळ हाताने मदत करण्याचे आवाहन केले. तसेच देशभरातील उत्साही स्पर्धकांना दरवर्षी वाढत्या सोयी आणि सुविधा पुरवण्याचे आश्वासन दिले.

किंग ऑफ कुंभार्ली 2026, आवृत्ती पाचवी, स्पर्धेचा गटनिहाय निकाल खालील प्रमाणे.

महिला मास्टर (३६ वर्षांवरील).
प्रथम : अंजली भलिंगे (पुणे).
द्वितीय : रुपाली गिरमकर (पिंपरी पुणे).
तृतीय : ब्लांशे थेमुडो (गोवा).

महिला एलिट (१६ ते ३५ वर्षे).
प्रथम : श्रावणी कृष्णात परिट (पुणे).
द्वितीय : योगेश्वरी महादेव कदम (सांगली).
तृतीय : श्रावणी उमेश घोडेस्वार (कोल्हापूर).

पुरुष किड्स (१० ते १७ वर्षे).
प्रथम : आर्यन सुनील मालगे (कोल्हापूर).
द्वितीय : आर्यन संदीप जाधव (पलूस).
तृतीय : साईराज तुषार भोईते (सातारा).

पुरुष ज्येष्ठ (५१ वर्षांवरील).
प्रथम : महेश किणी (ठाणे).
द्वितीय : प्रशांत तिडके (पुणे).
तृतीय : संतोष पवार (पुणे).

पुरुष मास्टर (३५ ते ५० वर्षे).
प्रथम : अनुप पवार (मुंबई).
द्वितीय : संजीव कुमार शर्मा (दिल्ली).
तृतीय : श्रधीर सागर शिरझेम (नोएडा).

पुरुष खुला गट (१८ ते ३५ वर्षे).
प्रथम : ईश्वर पाटील (धाराशिव).
द्वितीय : निहाल नदाफ (सांगली).
तृतीय : सिद्धेश पाटील (कोल्हापूर).

विजेत्यांचे आणि सहभागी सर्व स्पर्धकांचे चिपळूण सायकलिंग क्लबकडून अभिनंदन करण्यात आले. स्पर्धकांकडून मिळालेल्या उत्स्फूर्त आणि सकारात्मक प्रतिसादामुळे क्लबचे सदस्य आणि चिपळूणमधील स्वयंप्रेरणेने सहभागी झालेले स्वयंसेवक यांनी भविष्यातील उपक्रमांच्या आयोजनासाठी हुरूप आल्याचे मत व्यक्त केले.

या स्पर्धेच्या यशस्वी आयोजनासाठी पोफळी वीज मंडळाचे सिक्युरिटी गार्ड्स आणि ऑफिसर्स, तसेच राष्ट्रीय महामार्ग अधिकारी व त्यांचे कंत्राटदार यांचे मोलाचे सहकार्य लाभले. आपात्कालीन परिस्थिती हाताळण्यासाठी क्लबतर्फे चार वैद्यकीय पथकं तयार ठेवण्यात आली होती. यासाठी अवनीश हॉस्पिटल, अपरान्त हॉस्पिटल, वालावलकर हॉस्पिटल व परशुराम हॉस्पिटल यांनी सुसज्ज व अद्ययावत रुग्णवाहिका पुरविल्या होत्या. सह्याद्री शिक्षण संस्थेच्या सती चिंचघरी हायस्कूलमधील 25 विद्यार्थ्यांनी स्वयंसेवक म्हणून उत्कृष्ट काम पाहिले. शिरगाव हायस्कूलच्या मुलांनी ढोल-ताशांच्या गजरात सायकलिस्टचा उत्साह वाढवला. स्थानिक पातळीवर श्री.सतीश पोद्दार, डॉ.पाटील, भरत माने, आणि सहकारी यांनी शिरगांव पुलापलिकडे क्लबचा अधिकृत हायड्रेशन पॉईंट सांभाळून आपला खारीचा वाटा उचलला तर श्री भरत लब्धे यांनी शिरगाव तिठ्ठा येथे पाणी वाटपासाठी मोलाचे सहकार्य केले. तसेच स्थानिक प्रशासन, स्थानिक नेते, स्थानिक उद्योग आणि चिपळूणमधील नागरिकांनी केलेल्या हरसंभव सहकार्याबद्दल आणि वेळोवेळी दिलेल्या सबळ पाठिंब्याबद्दल चिपळूण सायकलिंग क्लबने मनस्वी कृतज्ञता व्यक्त केली.

चिपळूण सायकलिंग क्लब

06/05/2026

https://youtu.be/EfY2e9DnnJk?si=yNcDk4lu0dx95Cj5

*Content of video*Full video of event.Men elite full coverage.Men master final 2km top 3 finishMen senior top 3 finishMen kids top 5 finishWomen elite top 4 ...

23/04/2026

चिपळूण सायकलिंग क्लबची S3 Duathlon स्पर्धेत दमदार कामगिरी

4 पोडियम आणि 3 टॉप-5 स्थानांमध्ये बक्षिसे पटकावत चिपळूण सायकलिंग क्लबने S3 Duathlon स्पर्धेत मानाची चॅम्पियन ट्रॉफी जिंकली.

क्लबच्या स्थापनेपासून गेल्या सुमारे सहा वर्षांत सदस्यांनी विविध स्पर्धांमध्ये सातत्याने दरवर्षी उल्लेखनीय कामगिरी नोंदवली आहे. BRM इव्हेंट, राष्ट्रीय व राज्यस्तरीय सायकल स्पर्धा, Ironman स्पर्धा, धावण्याची स्पर्धा तसेच Duathlon स्पर्धांमध्ये क्लबच्या खेळाडूंनी आपली छाप उमटवत सर्वीकडे पोडियम मिळवले आहेत. तर काही महिला सदस्यांनी सायकलिंग क्षेत्रात जागतिक विक्रमांच्या दिशेनेही उल्लेखनीय प्रयत्न केले आहेत.

क्लबचे सदस्य उच्च दर्जाचा खेळ सादर करत जिल्ह्याचे आणि क्लबचे नाव उंचावत आहेत. हीच यशाची परंपरा कायम राखत चिपळूण सायकलिंग क्लबचा दबदबा दिवसेंदिवस वाढत असून, या यशाचा सर्व चिपळूणकरांना सार्थ अभिमान वाटत आहे.

22/04/2026

कुंभार्ली घाटाचा राजा – पर्व ५ : देशातील नावाजलेली सायकलिंग स्पर्धा ३ मे रोजी

चिपळूण : चिपळूण सायकलिंग क्लबतर्फे आयोजित “कुंभार्ली घाटाचा राजा” या देशातील नावाजलेल्या सायकलिंग स्पर्धेचे पाचवे पर्व यंदा ३ मे २०२६ रोजी पार पडणार आहे. स्पर्धेच्या पाचव्या वर्षानिमित्त यंदा मोठ्या उत्साहात आयोजन करण्यात आले असून, सुमारे ४०० स्पर्धकांनी सहभाग नोंदवला आहे.

या स्पर्धेत ४ परदेशी खेळाडू, ७ शिवछत्रपती क्रीडा पुरस्कार विजेते, १७ राष्ट्रीय स्तरावरील, २० राज्यस्तरीय खेळाडू, तसेच २५ हून अधिक आयर्नमॅन आणि २० हून अधिक पोलीस व शासकीय अधिकारी स्पर्धक म्हणून सहभागी होत आहेत.

गोवा, महाराष्ट्र, पश्चिम बंगाल, उत्तराखंड, उत्तर प्रदेश, मध्य प्रदेश, दिल्ली, गुजरात, राजस्थान आणि कर्नाटक अशा विविध राज्यांतून स्पर्धक चिपळूणमध्ये दाखल होणार आहेत.
दरवर्षी खेळाडू ची नोंदणी ची संख्या वाढत आहे यावरून स्पर्धेची वाढती लोकप्रियता आणि उच्च दर्जा अधोरेखित होतो.

या स्पर्धेमुळे चिपळूण सायकलिंग क्लबच्या माध्यमातून चिपळूण, रत्नागिरी जिल्हा आणि कोकण प्रदेशाचे नाव देशभर पोहोचले असून, देशातील एक प्रतिष्ठित आणि आव्हानत्मक सायकलिंग स्पर्धा म्हणून या स्पर्धेकडे पाहिले जात आहे.

तरी सर्व क्रीडाप्रेमींनी ३ मे २०२६ रोजी सकाळी ६ वाजता कुंभार्ली घाट येथे उपस्थित राहून खेळाडूंना उत्साहाने प्रोत्साहन द्यावे, असे आवाहन आयोजकांकडून करण्यात आले आहे.

चिपळूण सायकलिंग क्लब

20/04/2026

चिपळूण सायकलिंग क्लबच्या उपाध्यक्षा सौ. निशा आंबेकर यांची आंतरराष्ट्रीय ॲथलेटीक्स स्पर्धेत तिहेरी सुवर्ण कामगिरी

World Masters Sports Championships 2026 अंतर्गत श्रीराचा, थायलंड येथे दि. 17 ते 20 एप्रिल 2026 दरम्यान आयोजित इंटरनॅशनल अॅथलेटिक्स आणि स्विमिंग स्पर्धांमध्ये चिपळूणच्या राष्ट्रीय खेळाडू सौ. निशा आंबेकर यांनी भारताचे प्रतिनिधित्व करत उल्लेखनीय कामगिरी केली.
त्यांनी खालील स्पर्धांमध्ये सहभाग नोंदवून तिहेरी यश संपादन केले —
🥇 थाळीफेक — सुवर्णपदक
🥇 गोळाफेक — सुवर्णपदक
🥇 भालाफेक — सुवर्णपदक

अशा प्रकारे 3 सुवर्णपदकांची भरघोस कमाई करत त्यांनी आंतरराष्ट्रीय स्तरावर चिपळूणचे नाव उज्ज्वल केले. 🌍✨

सौ. निशा आंबेकर या प्रसिद्ध करसल्लागार श्री गजानन आंबेकर यांच्या पत्नी असून, त्यांनी आपल्या या यशाचे श्रेय पती, कुटुंबीय, जिवाभावाचे मित्र-मैत्रिणी तसेच हितचिंतकांना दिले आहे.
त्यांच्या या यशामुळे चिपळूण सायकलिंग क्लबच्या क्रीडा परंपरेत आणखी एक सुवर्ण अध्याय जोडला गेला आहे.

चिपळूण सायकलिंग क्लब तर्फे सौ. निशा आंबेकर यांचे मनःपूर्वक अभिनंदन आणि पुढील वाटचालीसाठी हार्दिक शुभेच्छा!

त्यांच्या या यशामुळे क्रीडा क्षेत्रात चिपळूणचा नावलौकिक अधिक उंचावला आहे. त्यांच्या या उल्लेखनीय कामगिरीबद्दल विविध स्तरातून त्यांचे अभिनंदन होत आहे.

20/04/2026

🏃‍♀️ 🚴‍♀️ चिपळूण सायकलिंग क्लबचे सांगली S3 ड्युअथ्लॉन स्पर्धेत घवघवीत यश 🏃‍♂️चॅम्पियन्स ट्रॉफीवर नाव कोरले

दिनांक 19 एप्रिल 2026 रोजी सांगली येथे S3 अकॅडमी तर्फे ड्युअथ्लॉन स्पर्धेचे आयोजन करण्यात आले होते. स्पर्धेचे स्वरूप 5 किमी रनिंग, 20 किमी सायकलिंग आणि 2.5 किमी रनिंग असे आव्हानात्मक होते.

या स्पर्धेत चिपळूण सायकलिंग क्लबच्या एकूण 14 स्पर्धकांनी सहभाग नोंदवत सर्वांनी यशस्वीरित्या स्पर्धा पूर्ण केली. विशेष म्हणजे विविध कॅटेगिरीमध्ये क्लबच्या सदस्यांनी पोडियम फिनिश करत क्लबचा गौरव वाढवला.सदर स्पर्धेचे रेस अॅम्बॅसिडर म्हणून श्री.प्रशांत दाभोळकर आणि रेस मोटिवेटर म्हणून श्री. हेमंत भोसले यांना विशेष सन्मान मिळाला होता

🏆 विशेष अभिमानाची बाब
या स्पर्धेत उत्कृष्ट एकूण कामगिरीबद्दल चिपळूण सायकलिंग क्लबला Champions Trophy प्रदान करण्यात आली.
हा संपूर्ण क्लबच्या सातत्यपूर्ण प्रयत्नांचा आणि टीम स्पिरिटचा सन्मान आहे.

🏆 विशेष कामगिरी :
मेल मास्टर कॅटेगिरी
🥈 अहमद अली शेख- द्वितीय क्रमांक
🏅 प्रशांत दाभोळकर — पाचवा क्रमांक
शासकीय अधिकारी राखीव प्रवर्ग (मेल)
🥉 प्रसाद आलेकर — तृतीय क्रमांक
फिमेल 55+कॅटेगरी
🥇 ज्योती परांजपे — प्रथम क्रमांक
शासकीय अधिकारी राखीव प्रवर्ग (फीमेल)
🥈 रमा करमरकर — द्वितीय क्रमांक
फीमेल 45–55 कॅटेगिरी
🏅 डॉ. मनीषा वाघमारे — पाचवा क्रमांक
🏁 फिनिशर्स :
✔️ हेमंत भोसले
✔️ स्वप्निल गायकवाड

🔁 रिले स्पर्धा
🏁 माधवी गांगण+ डॉ.सुश्मिता विखारे— फिनिशर
🌟 बाल गटातील उल्लेखनीय सहभाग :
🏆 कु. युवराज्ञी वर्षाराणी स्वप्निल गायकवाड
🏆 कु. स्वराज्ञी वर्षाराणी स्वप्निल गायकवाड
(लहान वयात उत्साहपूर्ण सहभाग नोंदवत रिले स्पर्धेत फिनिशर ट्रॉफी प्राप्त)

चिपळूण सायकलिंग क्लबचे सर्व स्पर्धकांनी दाखवलेली जिद्द, सातत्य आणि फिटनेसबद्दलची बांधिलकी ही निश्चितच प्रेरणादायी आहे.

चिपळूण सायकलिंग क्लबकडून सर्व विजेते व फिनिशर्स यांचे मनःपूर्वक अभिनंदन आणि पुढील स्पर्धांसाठी हार्दिक शुभेच्छा!

29/03/2026

श्री मयूर देसाई सर हे रत्नागिरीतील प्रचिलीत सायकलपटू आणि उत्कृष्ट स्विमर असून रत्नागिरी ट्रायथलीट क्लबचे ते सक्रिय सदस्य असून सध्या कामानिमित्त ते चिपळूण येथे वास्तव्यास आहेत.

दोन वर्षांपूर्वी कोल्हापूर लोहपुरुष ट्रायथलीट स्पर्धेत 1.9 किमी स्विमिंग काही कारणस्तव अर्धवट सोडावी लागल्याने त्यांना संपूर्ण स्पर्धा सोडावी लागली.
त्यावेळी काही सहभागी खेळाडू कडून त्यांना जिव्हारी लागणारे नकारात्मक बोलणेही ऐकावे लागले. पण त्यांनी त्याच नकारात्मकतेला प्रेरणेत बदलत, सलग 2 वर्षे कठोर आणि सातत्यपूर्ण सराव केला व त्याजे सकारात्मक उर्जेत रूपांतर करत जिद्द व सरावाच्या जोरावर त्यांनी गोवा सी प्राईड 2026 ही 10 किलोमीटर ची आव्हानत्मक स्विमिंग स्पर्धा अवघ्या 4 तासांत पूर्ण केली. याच स्पर्धेत त्यांचे सुपुत्र कु
ब्रविम मयूर देसाई याने देखील 5 किलोमीटर स्पर्धा निर्धारित वेळेत पूर्ण करत दोघं पिता पुत्र यांनी रत्नागिरी जिल्ह्याचे नाव रोशन केले

1.9 किलोमीटर स्विमिंग स्पर्धा अर्धवट सुटत 10 किलोमीटरची स्विमिंग यशस्वी रित्या पूर्ण करण्या पर्यंतचा हा प्रवास त्यांच्या आत्मविश्वास, इच्छाशक्ती आणि जिद्दीचे ज्वलंत उदाहरण आहे.
अशा प्रेरणादायी कामगिरीस चिपळूण सायकलिंग क्लब चा मानाचा सलाम व आपल्या पुढील वाटचालीस खूप साऱ्या शुभेच्छा.

चिपळूण सायकलिंग क्लब

01/03/2026

👑 *KING OF KUMBHARLI*👑
5th Edition – 2026

Conquer the Ghat. Earn the Crown.
━━━━━━━━━━━━━━━━━━━━━━
We chiplun cycling club proudly invites you to the 5th edition of most popular cycling event to conquer the mighty kumbharli ghat climb.
Push your limits, test your endurance, and earn your crown on one of Maharashtra’s most iconic and scenic ghat.
━━━━━━━━━━━━━━━━━━━━━━
*EVENT DETAILS*
📅 Date: Sunday, *03 May 2026*
📍 Location: Chiplun, Maharashtra
⏰ Start Time: 05:30 AM
🚴 Distance: 29 KM
⛰️ Elevation Gain: 750 Meters
🔥 Includes the legendary 12 KM Kumbharli Ghat climb
━━━━━━━━━━━━━━━━━━━━━━
*CATEGORIES*
• Men Kids (10–17)
• Men Elite (18–35)
• Men Master (36–50)
• Men Senior (51+)
• Women Elite (14–35)
• Women Master (36+)
━━━━━━━━━━━━━━━━━━━━━━
*PRIZES & REWARDS*
💰 Total Prize Pool: ₹2,00,000+
🎖️ Recognition:
Top 10 riders in each category will receive:
• Cash Prizes 💰
• Metal Trophies 🏆
(T & C apply)
━━━━━━━━━━━━━━━━━━━━━━
*REGISTRATION FEE INCLUDES*
💧 Hydration
🍴 Breakfast & Dinner
📜 E-Certificate
📸 HD Event Photos
🚑 Medical Support
🏅 Finisher Medal
🏆 Trophy & Cash Prizes to winner
🚚 On route support
🏨 Free stay for first 100 riders
━━━━━━━━━━━━━━━━━━━━━━
*REGISTRAION LINK*
https://www.chipluncyclingclub.in/events/king-of-kumbharli/register

Use *FIRST100* coupan code for flat 25% discount (For only first 100 entries).
No hidden charges on registration.

For complete event details, past results, route information, previous editions archives.
Please visit our official website.
━━━━━━━━━━━━━━━━━━━━━━

*CHIPLUN CYCLING CLUB*

16/02/2026

*पन्नास हजार किमी सायकलिंग : जिद्दीचा सुवर्णटप्पा*

काही टप्पे केवळ अंतर पूर्ण केल्याची नोंद नसतात, तर ते माणसाच्या जिद्दीची, शिस्तीची आणि सातत्याची साक्ष असतात. श्री. प्रशांत दाभोळकर यांचा पन्नास हजार किलोमीटरचा सायकल प्रवासही असाच आकड्यांपलीकडे जाऊन व्यक्तिमत्त्व घडवणारा. अडीच वर्षांच्या अखंड प्रयत्नांतून गाठलेला हा टप्पा म्हणजे रोजच्या छोट्या-छोट्या प्रयत्नांची साठवण, स्वतःवर ठेवलेला विश्वास आणि “थांबायचं नाही” हा घेतलेला निर्धारच होय.
प्रत्येक पहाटेची सुरुवात, प्रत्येक चढाचा सामना, प्रत्येक थकव्यावर केलेला विजय आणि प्रत्येक पूर्ण झालेला किलोमीटर या सगळ्यांनी मिळून घडवलेली ही यशोगाथा आहे.

केवळ अडीच वर्षामध्ये गाठलेला तब्बल पन्नास हजार किमींचा हा सुवर्णटप्पा बरंच काही सांगून जातो. ही अशी अद्वितीय कामगिरी एकाच दिवशी किंवा रात्रीतून घडत नाही; ती रोज सातत्याने थोडं थोडं पुढे जाण्याच्या सवयीमधून घडते.

या प्रवासात त्यांनी केवळ अंतरच पार केले नाही, तर अनेक उल्लेखनीय यशांची शिखरेही गाठली. दोन वेळा सुपर रँडोनिअर ही मानाची पदवी, १०००,१२०० किमी एलआरएम पूर्ण करण्याचा पराक्रम, ७०.३ हाफ आयर्नमॅनसारखी कठीण स्पर्धा यशस्वीरीत्या पार करणे, सह्याद्री चार घाट स्पर्धेतील यशस्वी सहभाग या सर्वांनी त्यांच्या जिद्दीची व्याप्ती अधिक ठळक केली. विशेष म्हणजे ‘टूर दि हंड्रेड’ या स्पर्धेत संपूर्ण देशातून द्वितीय क्रमांक मिळवत त्यांनी ‘चॅम्पियन ऑफ चॅम्पियन’ हा किताबही पटकावला. हा सन्मान त्यांच्या सातत्यपूर्ण मेहनतीचा आणि उत्कृष्ट कामगिरीचा ठसा उमटवणारा आहे.
‘सायकल सम्राट’ ही त्यांची ओळख आज केवळ उपाधी नाही, तर त्यांच्या चिकाटीची आणि कार्यतत्परतेची साक्ष आहे.

महाशिवरात्रीच्या शुभ मुहूर्तावर गाठलेला हा ५०,००० किमी चा टप्पा त्यांच्या परिश्रमांना आणि श्रद्धेला साजेसा आहे.
शिव म्हणजे शक्ती, शिव म्हणजे साधना, शिव म्हणजे समर्पण.
सायकलिंगबद्दलची त्यांची निष्ठा पाहिली की ही सर्व शिवतत्वे सहज जाणवतात. प्रत्येक राईड त्यांनी मनापासून जगली आहे ,जणू ती एक तपश्चर्या आहे.
महाशिवरात्रीच्या पवित्र दिवशी पूर्ण झालेला हा ५०,००० किमींचा टप्पा त्यांच्या परिश्रमांना, सातत्याला आणि अंतर्मनातील श्रद्धेला खरोखरच साजेसा आहे.

अडीच वर्षांच्या निष्ठावान साधनेचा हा सुंदर परिपाक म्हणावा लागेल. प्रत्येक दिवसाची शिस्त, प्रत्येक आव्हानाला सामोरे जाण्याची तयारी आणि न थकता पुढे जाण्याची वृत्ती यांनी मिळून हा सुवर्णक्षण घडवला आहे.
ही कामगिरी केवळ वैयक्तिक यश नाही; ती आजूबाजूच्या प्रत्येकाला प्रेरणा देणारी आहे. ध्येय ठरवून, त्यासाठी सातत्याने प्रयत्न केले तर कोणताही टप्पा दूर नसतो, याचा हा जिवंत पुरावा आहे. त्यांच्या या प्रवासातून अनेकांना नव्या स्वप्नांची दिशा आणि प्रयत्नांना नवी ऊर्जा मिळत राहो.
त्यांची वाटचाल अशीच जोमाने, आनंदाने आणि आत्मविश्वासाने पुढे सुरू राहो,त्यांच्या या यशामुळे केवळ चिपळूण सायकलिंग क्लबच नव्हे, तर संपूर्ण सायकलिंग परिवार प्रेरित झाला आहे.
त्यांची वाटचाल अशीच जोमाने, आनंदाने आणि आत्मविश्वासाने अविरत सुरू राहो हीच सदिच्छा.