16/01/2026
#सुप्रीमसंभावना #अमृतानुभव
अज्ञानात स्वतःला घातलेल्या बेड्या अलगद गळून पडत आहेत.
मी विरघळतेय माझ्या खोल अस्तित्वामधे !
चहूबाजूंनी अखंड अपरिमित शांती,
हृदयात कोणत्याही कारणाशिवाय आनंदाच्या लहरी!
तृप्तीची, पूर्णतेची दाटून आलेली भावना,
डोळ्यातून वाहणारे अश्रू या आनंदाची साक्ष देत आहेत!
शोधिसी मानवा राउळी, मंदिरी
नांदतो देव हा आपुल्या अंतरी..
या गाण्याची प्रचिती अनुभवातून उतरत आहे!
कोणत्याही शब्दाशिवाय,
निःशब्द अवस्था तिच्या असण्याची जाणीव करून देत आहे.
रोज नवीन सकाळ, सगळेजण धावताना दिसतात.
आपापल्या कामामध्ये व्यस्त होऊन जातात.
मी मात्र स्तब्ध, तशीच तिथेच स्थित!
काहीच हालत नाही, काहीच कुठेच जात नाही येत नाही.
जसं अथांग पसरलेल्या समुद्रात लाटा निर्माण होतात आणि विलीनही होतात.
समुद्र मात्र स्थिर !
अगदी तसंच जीवन प्रवाहित होताना दिसतं लाटांसारखं !
पण जीवन मात्र स्थितप्रज्ञ, फक्त स्वतःचं साक्षी!
एक क्षण थांबून, थोडं विसावून ,
एक मोकळा श्वास भरून सोडताना
होईल जाणीव तुम्हाला पण
एका स्थिर बिंदूमध्ये सर्व काही सामावलं आहे.
या स्थिर बिंदूची अनुभूती म्हणजेच अमृतानुभव आहे !
जो सतत थेंब थेंब पडतोय हृदयाच्या कोषात अशी जाणीव होते.
जसं शिवलिंगावर पाण्याचे थेंब पडत राहतात.
निरंतर अभिषेक!
शून्य अवस्थेची जाणीव!
ही जाणीव सतत रहावी म्हणून होणारा तो अभिषेक!
शिवलिंगावर धूळ बसू नये म्हणून !
शून्यावर पुन्हा कोणताही नंबर येऊ नये म्हणून !
शिवलिंगावरच्या त्या अभिषेकाची अशी उकल व्हावी ?
आंतरिक निराकार, निःशब्द, निर्मोह अवस्थेत,
हा क्षण भरून राहिला आहे प्रत्येक क्षणात!
प्रत्येक श्वासात त्याचा सुगंध पसरला आहे .
"याहून वेगळं सुख असूच शकत नाही", असं म्हणत
जगातील सर्व सुखे , या सुखाला साष्टांग दंडवत घालत आहेत !
नमस्कार म्हणजे काय ते ही कळतंय,
नमस्कार शुद्ध अस्तित्वाला घातला जातो,
हा निर्माणाचा निर्मलतेला नमस्कार आहे.
ज्याच्या गर्भातून जन्म झाला त्याला,
आजन्म्याला जन्माचं नमन !
निराकाला आकाराचा प्रणाम !
जो निश्चल आहे, निराकार आहे, आजन्मा आहे, अविनाशी, अनंत, आदि, अस्पर्शित शून्य आहे तो स्वतः आरसा बनून स्वतःचं दर्शन करतो.
या एका दिव्य अनुभूतीसाठी,
निर्माणाचा आविष्कार करतो ,
आणि दर्शन करून पूर्णत्वाची प्रचिती घेतो!
जो आधीच पूर्ण आहे ,
हे तो जाणतो .
ही चेतनता त्याला भरून पावल्याचं समाधान देते,
जो आधीच समाधानी आहे!
हीच तर लीला आहे आहे आणि तो या लिलेचा साक्षी!
आणि हे गूढ सत्य अनुभवातून जाणणं ही मानव देहाची सुप्रीम संभावना आहे!
सुप्रीम संभावना
9623459196
