05/10/2026
ਸ਼੍ਰੀ ਆਨੰਦਪੁਰ ਸਾਹਿਬ ਹੋਲਾ ਮਹੱਲਾ ਕਬੱਡੀ ਚੈਂਪੀਅਨਸ਼ਿਪ 2014 ਦਾ ਬੈਸਟ ਜਾਫੀ ਅੰਮ੍ਰਿਤਪਾਲ ਸਿੰਘ #ਸ਼ੇਰੂ_ਧਨੌਰੀ
ਜ਼ਿਲ੍ਹਾ ਰੋਪੜ ਪੂਰੀ ਦੁਨੀਆਂ ਵਿੱਚ ਕਬੱਡੀ ਕਰਕੇ ਬਹੁਤ ਮਸ਼ਹੂਰ ਹੋਇਆ। ਸਵ: #ਭੀਮੇ_ਸਹੇੜੀ ਵਾਲੇ ਨੇ ਪੰਜਾਬ ਵਿੱਚ ਵੀ ਤੇ ਪੂਰੀ ਦੁਨੀਆਂ ਦੇ ਵੱਖਰੋ ਵੱਖਰੇ ਮੁਲਕਾਂ ਵਿਚ ਜਾਕੇ ਵੀ ਤਕੜੀ ਕਬੱਡੀ ਖੇਡੀ। ਸਵ: ਭੀਮੇ ਸਹੇੜੀ ਨੇ ਫਿਰ ਕਬੱਡੀ ਖੇਡਣ ਤੋ ਬਾਅਦ ਰੋਪੜ ਇੰਟਰਨੈਸ਼ਨਲ ਕਬੱਡੀ ਕਲੱਬ ਦੀ ਸਥਾਪਨਾ ਕੀਤੀ। ਜਿਸ ਵਿਚ ਬਹੁਤ ਸਾਰੇ ਖਿਡਾਰੀ ਤਿਆਰ ਕੀਤੇ ਤੇ ਜਿਨ੍ਹਾਂ ਨੇ ਪੂਰੇ ਪੰਜਾਬ ਦੇ ਕਬੱਡੀ ਕੱਪਾਂ ਤੇ ਬੱਲੇ ਬੱਲੇ ਕਰਵਾਈ।
ਅੱਜ ਅਸੀਂ ਜਿਸ ਖਿਡਾਰੀ ਬਾਰੇ ਗੱਲ ਕਰਨ ਜਾ ਰਹੇ ਹਾਂ। ਉਹ ਬਹੁਤ ਹੀ ਸਾਊ ਸੁਭਾਅ ਦਾ ਮਾਲਕ ਫੱਕਰ ਦਿਲ ਇਨਸਾਨ ਹੈ। ਜਿਸ ਦਾ ਨਾਮ ਹੈ ਅੰਮ੍ਰਿਤਪਾਲ ਸਿੰਘ #ਸ਼ੇਰੂ_ਧਨੌਰੀ
ਅੰਮ੍ਰਿਤਪਾਲ ਸਿੰਘ ਸ਼ੇਰੂ ਦਾ ਜਨਮ 5 ਅਕਤੂਬਰ 1989 ਨੂੰ ਪਿਤਾ ਸਰਦਾਰ #ਅਮਰਜੀਤ_ਸਿੰਘ ਚੱਠਾ ਤੇ ਮਾਤਾ #ਜਸਵੀਰ_ਕੌਰ ਦੇ ਘਰ ਪਿੰਡ ਧਨੌਰੀ ਨੇੜੇ ਮੋਰਿੰਡਾ ਜ਼ਿਲ੍ਹਾ ਰੋਪੜ ਵਿਖੇ ਹੋਇਆ। ਆਪ ਜੀ ਨੇ ਪ੍ਰਾਇਮਰੀ ਤੋਂ ਦਸਵੀਂ ਦੀ ਸਿੱਖਿਆ ਸਰਕਾਰੀ ਹਾਈ ਸਕੂਲ ਧਨੌਰੀ ਜ਼ਿਲ੍ਹਾ ਰੋਪੜ ਤੋ ਪ੍ਰਾਪਤ ਕੀਤੀ। ਸਕੂਲ ਪੜ੍ਹਦੇ ਸਮੇ ਸ਼ੇਰੂ ਨੂੰ ਕਬੱਡੀ ਖੇਡਣ ਦਾ ਸ਼ੌਕ ਸੀ। ਉਸਤਾਦ #ਕੁਲਦੀਪ_ਸਿੰਘ ਧਨੌਰੀ ਤੋ ਕਬੱਡੀ ਦੀਆਂ ਬਰੀਕੀਆਂ ਬਾਰੇ ਜਾਣਕਾਰੀ ਲਈ ਕਿਉਂਕਿ ਧਨੌਰੀ ਪਿੰਡ ਨੂੰ ਪੰਜਾਬ ਵਿਚ ਕਬੱਡੀ ਦੀ ਨਰਸਰੀ ਵਜੋਂ ਜਾਣਿਆ ਜਾਂਦਾ ਸੀ। ਫਿਰ ਕੁਲਦੀਪ ਧਨੌਰੀ ਕੋਲ ਦਿਨ ਰਾਤ ਸਖ਼ਤ ਮਿਹਨਤ ਕਰਨੀ ਸ਼ੁਰੂ ਕਰ ਦਿੱਤੀ। ਕਿਉਂਕਿ ਸ਼ੇਰੂ ਦੇ ਸਰੀਰ ਦੀ ਬਣਤਰ ਭਲਵਾਨਾਂ ਵਰਗੀ ਸੀ। ਉੱਚਾ ਲੰਮਾ ਕੱਦ ਗੁੰਦਵਾਂ ਸਰੀਰ ਇਕ ਤਕੜਾ ਖਿਡਾਰੀ ਬਣਨ ਦੀ ਗਵਾਹੀ ਭਰਦਾ ਸੀ। ਸਭ ਤੋਂ ਪਹਿਲਾਂ ਸ਼ੇਰੂ 2008 ਵਿੱਚ ਸਵ: ਭੀਮੇ ਸਹੇੜੀ ਦੀ ਖੇਡ ਕਲੱਬ ਰੋਪੜ ਇੰਟਰਨੈਸ਼ਨਲ ਕਬੱਡੀ ਕਲੱਬ ਲਈ ਖੇਡਣਾ ਸ਼ੁਰੂ ਕੀਤਾ। ਜਿਸ ਟੀਮ ਵਿਚ ਮਨੀ ਧਨੌਰੀ, ਪਰਦੀਪ ਰੌਲੂਮਾਜਰਾ, ਪਿੰਦਰੀ ਕੋਟ ਗੰਗੂਰਾਏ, ਤੋਤਾ ਬੀਬੀਪੁਰ, ਕਿਰਨਾ ਸ਼ਾਤਪੁਰ ਵਰਗੇ ਸੁਪਰ ਸਟਾਰ ਖਿਡਾਰੀ ਖੇਡਦੇ ਸੀ। ਪੰਜਾਬ ਦੇ ਵੱਡੇ ਵੱਡੇ ਕਬੱਡੀ ਕੱਪਾਂ ਤੇ ਬੱਲੇ ਬੱਲੇ ਕਰਵਾਈ। ਫਿਰ ਉਸ ਤੋਂ ਬਾਅਦ ਆਪਣੇ ਪਿੰਡ ਧਨੌਰੀ ਦੀ ਟੀਮ ਤਿਆਰ ਕੀਤੀ। ਜਿਸ ਵਿਚ ਸ਼ੇਰੂ ਦੇ ਨਾਲ ਮਨੀ ਧਨੌਰੀ, ਭੋਲਾ ਧਨੌਰੀ, ਗੱਬਰ ਧਨੌਰੀ, ਹੈਰੀ ਧਨੌਰੀ ਨੇ ਮਿਲਕੇ ਪੰਜਾਬ ਦੇ ਵੱਡੇ ਵੱਡੇ ਕਬੱਡੀ ਕੱਪਾਂ ਤੇ ਚੋਟੀ ਦੀਆਂ ਪੰਜਾਬ ਤੇ ਹਰਿਆਣਾ ਦੀਆਂ ਟੀਮਾਂ ਨੂੰ ਹਰਾਇਆ। ਪੂਰੇ ਪੰਜਾਬ ਵਿੱਚ ਕਬੱਡੀ ਕੱਪਾਂ ਤੇ ਧਨੌਰੀ ਦੀ ਟੀਮ ਦੀ ਮੰਗ ਵੱਧਣ ਲੱਗੀ। ਧਨੌਰੀ ਦੀ ਟੀਮ ਪੰਜਾਬ ਦੀ ਨੰਬਰ ਵਨ ਟੀਮ ਬਣ ਉਭਰੀ। ਜਿੱਥੇ ਵੀ ਖੇਡਦੀ ਪਹਿਲੇ ਜਾ ਦੂਸਰੇ ਨੰਬਰ ਤੇ ਆਉਂਦੀ। ਹਰਿਆਣੇ ਦੇ ਕਬੱਡੀ ਕੱਪਾਂ ਤੇ ਵੀ ਧਨੌਰੀ ਦੀ ਟੀਮ ਦੀ ਤੂਤੀ ਬੋਲਣ ਲੱਗ ਪਈ। ਫਿਰ 2011 ਵਿੱਚ ਸ਼ੇਰੂ ਧਨੌਰੀ ਨੇ ਕਬੱਡੀ ਪ੍ਰਮੋਟਰ ਸਰਦਾਰ ਕੇਵਲ ਸਿੰਘ ਘੋਲੂਮਾਜਰਾ ਤੇ ਮਿੰਦਰ ਸਿੰਘ ਸੋਹਾਣਾ ਉਹਨਾਂ ਦੀ ਅਕੈਡਮੀ ਅਮਰ ਸ਼ਹੀਦ ਜਥੇਦਾਰ ਬਾਬਾ ਹਨੂੰਮਾਨ ਸਿੰਘ ਜੀ ਮੋਹਾਲੀ ਵਲੋ ਨੋਰਥ ਇੰਡੀਆ ਕਬੱਡੀ ਫੈਡਰੇਸ਼ਨ ਦੇ ਬੈਨਰ ਹੇਠ ਖੇਡਣਾ ਸ਼ੁਰੂ ਕੀਤਾ। ਸਾਲ 2011 ਵਿੱਚ ਹੀ ਆਪਣੇ ਪਿੰਡ ਧਨੌਰੀ ਦੇ ਕਬੱਡੀ ਕੱਪ ਤੇ ਕਬੱਡੀ ਪ੍ਰਮੋਟਰ ਸਰਦਾਰ ਕੇਵਲ ਸਿੰਘ ਘੋਲੂਮਾਜਰਾ ਵਲੋਂ ਪਹਿਲਾ ਸਨਮਾਨ ਮੋਟਰਸਾਈਕਲ ਪ੍ਰਾਪਤ ਕੀਤਾ।ਉਸ ਤੋ ਬਾਅਦ ਫਿਰ ਸ਼ੇਰੂ ਨੇ ਪਿਛੇ ਮੁੜਕੇ ਨਹੀਂ ਵੇਖਿਆ। ਸ਼ੇਰੂ ਆਪਣੀ ਸਭ ਤੋ ਵੱਡੀ ਪ੍ਰਾਪਤੀ ਸ਼੍ਰੀ ਆਨੰਦਪੁਰ ਸਾਹਿਬ ਹੋਲਾ ਮਹੱਲਾ ਕਬੱਡੀ ਚੈਂਪੀਅਨਸ਼ਿਪ 2014 ਵਿਚ ਬੈਸਟ ਜਾਫੀ ਬਣ ਬੁੱਲਟ ਮੋਟਰਸਾਈਕਲ ਦਾ ਜੇਤੂ ਬਣਿਆ ਦੱਸਦਾ ਹੈ। ਸ਼ੇਰੂ ਨੇ ਹੁਣ ਤੱਕ ਬੈਸਟ ਜਾਫੀ ਬਣ 44 ਮੋਟਰਸਾਈਕਲ, ਜਿਨਾਂ ਵਿੱਚ 4 ਬੁੱਲਟ ਮੋਟਰਸਾਈਕਲ, 1 ਫੋਰਡ ਟਰੈਕਟਰ ਦੇਧਨਾਂ ਦੇ ਕਬੱਡੀ ਕੱਪ ਤੋ, 2015 ਵਿੱਚ 10 ਐਲ ਸੀ ਡੀ, 25 ਸੋਨੇ ਦੀਆਂ ਮੁੰਦਰੀਆਂ, 1 ਵਾਸ਼ਿੰਗ ਮਸ਼ੀਨ, ਨਕਦ ਰਾਸ਼ੀਆ 11000 , 21000, 31000, 51000, 75000 ਕਈ ਵਾਰ ਜਿੱਤੀਆਂ। ਸ਼ੇਰੂ ਹੁਣ ਤੱਕ ਵਿਦੇਸ਼ੀ ਧਰਤੀ ਤੇ ਥਾਈਲੈਂਡ, ਮਲੇਸ਼ੀਆ, ਦੁਬਈ, ਯੂਰਪ, ਵਿਸ਼ਵ ਕਬੱਡੀ ਕੱਪ ਆਸਟ੍ਰੇਲੀਆ ਭਾਰਤੀ ਟੀਮ ਵਲੋਂ 2017 ਵਿੱਚ ਤੇ ਹਰਜੀਤ ਤਲਵਾਰ ਕਬੱਡੀ ਕਲੱਬ ਕਨੇਡਾ ਵਲੋਂ ਕਨੇਡਾ 2018 ਵਿੱਚ ਖੇਡਿਆ। ਸ਼ੇਰੂ ਦਾ ਵਿਆਹ 2018 ਵਿੱਚ #ਮਨਜੀਤ_ਕੌਰ ਦੇ ਨਾਲ ਹੋਇਆ। ਆਪ ਜੀ ਦੇ ਘਰ ਪੁੱਤਰ #ਦਿਲਸ਼ਾਨ_ਸਿੰਘ ਚੱਠੇ ਨੇ ਜਨਮ ਲਿਆ। ਅੰਮ੍ਰਿਤਪਾਲ ਸਿੰਘ ਸ਼ੇਰੂ ਆਪਣੇ ਇਸ ਮੁਕਾਮ ਤੇ ਪਹੁੰਚਾਣ ਲਈ ਜਿਥੇ ਆਪਣੇ ਪੂਰੇ ਪਰਿਵਾਰ ਦਾ ਵੱਡਾ ਯੋਗਦਾਨ ਮੰਨਦਾ ਹੈ। ਉੱਥੇ ਹੀ ਆਪਣੇ ਉਸਤਾਦ ਸਰਦਾਰ ਕੁਲਦੀਪ ਸਿੰਘ ਧਨੌਰੀ, ਕਬੱਡੀ ਪ੍ਰਮੋਟਰ ਕੇਵਲ ਸਿੰਘ ਘੋਲੂਮਾਜਰਾ, ਮਿੰਦਰ ਸਿੰਘ ਸੋਹਾਣਾ, ਕਬੱਡੀ ਕੋਚ ਜਗਤਾਰ ਸਿੰਘ ਧਨੌਲਾ ਤੇ ਕੋਚ ਪ੍ਰੀਤਾ ਧਨੌਰੀ ਜੀ ਦਾ ਵੱਡਾ ਰੌਲ ਮੰਨਦਾ ਹੈ। ਸਫਲਤਾ ਦੇ ਇਸ ਮੁਕਾਮ ਤੇ ਪੁੱਜਣ ਦੇ ਬਾਵਜੂਦ ਵੀ ਅੰਮ੍ਰਿਤਪਾਲ ਸਿੰਘ ਸ਼ੇਰੂ ਹਰ ਕਿਸੇ ਨਾਲ ਹੱਸ ਕੇ ਗੱਲ ਕਰਦਾ ਹੈ। ਸਾਡੀ ਵਾਹਿਗੁਰੂ ਅੱਗੇ ਅਰਦਾਸ ਹੈ ਕਿ ਵਾਹਿਗੁਰੂ ਅੰਮ੍ਰਿਤਪਾਲ ਸਿੰਘ ਸ਼ੇਰੂ ਨੂੰ ਹੋਰ ਤਰੱਕੀਆ ਬਖਸ਼ੇ ਸਦਾ ਚੜ੍ਹਦੀ ਕਲਾ ਵਿੱਚ ਰੱਖੇ।
(ਲਿਖਤ ਕੁਮੈਂਟੇਟਰ ਬੀਰਾ ਰੈਲਮਾਜਰਾ)
