06/11/2026
prije 5 minpetak, 6. studeni 2026. u 21:545 min
·
Podijeljeno s publikom Javno
Murphy's law
Davnih dana na moj upit „Ki že kvešto Đovani Antikvario numero tre?“ (Meštar za ime ulice pita Duju ko je taj Giovanni Antiquario) naime ča oće reć oti Marfijev zakon dobija san slikovito objašnjenje. Kaže Joke na fetu kruva namažeš paštetu oli marmeladu i ako ta feta ti ispadne iz ruke uvik će ti past na onu namazanu bandu. I bi tako. Sve ča se ni tribalo dogodit sinoć nan se dogodilo. Užežin jučerašnjih utakmic malo ko bi stavija ruku u vatru da se Ajduk neće popet na Heraklove stupe, a dinamo krpit mriže od ingleške flote tamo nidir u Sounderlandu. Još san se bija zareka Gospe moja daj nan force da pasamo ove Crvene Lincolne, a ja ti dajen besidu da neću zajebavat ovega moga purgera. Ali .. a, e. Na baaki! Kaš opet? Kurbin sin Marfi je učinija svoj posal. U zadnju Ingleži su krpali svoju mrižu, a nama su ovi Mladost Ždralovi sa Gibraltara na ote stupe obisili staru parolu iz grčke mitologije Non plus ultra. Ča oće reć Nima dalje! Opet san se opeka ka onda ka se govorilo da ćemo prin vidit NLO nego poraz Ajduka. Ruku na srce najgore su ove utakmice ča se bodovi pišedu unaprid. Jutros me našla di kopan po kanti. – Ča činiš? Oli si ča izgubija? – Tražin listopad. – Koji listopad? – Ženo Božja! Tražin otrgnuti list iz kalendara. Otija bi ga vratit na zid. – Ti si lud čovik. Gospe moja za koga san se ja odala?! – Lud, lud. Ali neka znaš u listopadu smo dobili i dinamo i Ajax. A sinoć smo izgubili kontra Gzire. Molala me na miru. Svitu moj! Ma nisan idan vengo san nikako dišperan. Evo govoridu da se ovo prvin put dogodilo u Evropi. Nisu zapucali, a dobili utakmicu. Eto kakove smo ti mi sriče. Kako je ono reka bivši igrač Goran Milović : "Uvik ka su nike vele fešte u gradu oli na stadionu, mi sve, škužajte na odrazu, useremo." Eto jušto tako. To smo mi. Ča bi sve išlo glat kad ne moremo mi brez adrenalina? Je da su još tri utakmice odisprid nas ali ovin smo sebi zagorčali život. Dobit utakmicu i bit miran. A ko zna? Reka je pokojni Gabrić: „ Nikad ne znaš zašto je ovo dobro.“ More bit da je u pravu. Da samo dobili ove sigurno bi već pasali u drugi krug i ondak more bit bi se opustili. I sad budi ti pametan! Valjda je i Garcia naučija lecijun kako je kasnija sa izmjenama i da u ovakovin utakmicama orilo – gorilo mora butat Ćaću od prve. HŽV
Sliku ispod san dobija i zalipija, a autor mi je nepoznat. Valjda se neće idit. ❤️💙💪
