George Ho's Running-Page

29/11/2020

今朝跑咗個10k time trial~

自疫情起本地所有比賽取消，一直都只係默默練習，但冇機會去檢驗成果。。。呢一年改變好大，首先係練習量提升，但咁樣並唔足夠。應該點去安排自己嘅練習呢？每個月400k？每次一定要跑4分披？最後搵到嘅就係睇心率跑。上堂就衝速度課，其餘日子就跟心率慢跑，適當時候加一啲變速去刺激自己身體。為咗支持咁大嘅訓練量，閒時亦都需要加插體能訓練和大量嘅拉筋，從而減少自己受傷嘅機會~ 不得不提及嘅係八月龍sir嘅姿勢改良班真係對我影響好大，佢令我更多咁去思考點樣可以令身體跑得更慳力~

自問自己為跑步都付出咗一定嘅心機，所以到最後起跑前心情好平靜~ 好似大迫傑所講，如果該做嘅事都已經做咗，站在起跑線上就可以比較看得開~ 最後10k跑41'17"，比舊記錄快咗3′08”~ 時間就中間啦，比上不足比下有餘，下次應該都係會繼續以一個鐘內完成十公里為主要目標~~~

#唔跑唔知身體好

21/10/2020

上堂啫，點解會去到咁盡㗎？同學們唔係應該相親相愛㗎咩？點解會變到好似屍殺列車咁互相廝殺㗎？太多嘅疑惑，太多嘅問號，喺頭7k練習裡面竟然5k PB咗！雖然只係得5秒。。。休息過後嘅極速2k仲未做到under 4分，從時間上嚟睇見到自己距離10k sub 40仲有一段好遙遠嘅距離。。。冇嘅，接受自己係一隻慢腳繼續練習就可以啦~ 😗

#我係慢腳仔

01/09/2020

又來到月尾~

八月突然比上個月跑多咗19k。。。🙈 月初其實都係維持平常嘅訓練，但到月尾為咗跑會個排行榜要排第一開始發癲 (虛榮心發作 😛)，尤其是八月最後兩日分別跑咗20k & 23k。。。呢類行為真係不可一不可再，九月我要做番一個明鏡止水嘅跑手~ 😗

但跑多咗我又唔覺自己快咗反而仲退步咗，始終練跑步機同跑街相差太遠，心肺功能跌咗好多，所以月中嘗試帶口罩跑街發現自己慢咗。。。所以呢，里數其實只係一堆數字，練習冇質素最終都係冇好處~

但跑步機都有佢嘅優點，就係可以方便自己拍片觀察自己跑姿~ 呢方面要感謝龍sir，佢為我嘅姿勢提出咗好多意見，希望疫情早日平息之後可以親身上姿勢改良班啦~

01/08/2020

又到月尾，本來有諗過唔出月結，因為始終今個月對香港嚟講真係太難受太壓抑。。。或者就寫得簡短啲唔咁長篇大論啦~

月初覺得好攰，身體好似一直都回唔到氣，所以普巴sir建議我跑少啲或者轉練其他嘢~ 其實跑得耐好易有心魔出現，對我嚟講我嘅心魔就係月結400k。但諗深一層其實好無謂，因為跑得快嘅關鍵其實係練習嘅質素而唔係你月結有冇400k，諗通咗之後就跑少咗好多 (379k回落至367.8k)，個人輕鬆咗，而且多咗嘅時間仲可以放落去做體能訓練，感覺身體強壯咗~

跑到月尾有少少腳痛，終於又到咗換鞋嘅日子。。。粉紅 ZoomFly 3 差唔多陪我跑咗1800k，係時候要講bibi啦，之後會用 ZoomFly 3 箱根驛傳版接替~

因為疫情關係所以困咗自己喺屋企跑機而冇落街，始終屋企有兩個老人家所以唔想冒險，亦都令我好耐冇同我偶像同埋其他同學仔一齊練跑。。。😢 希望疫情早日穩定然後再同大家見面啦~

30/06/2020

一個月又過去了，長大後總覺得時間過得好快，臨瞓前嚟個月結啦~

今個月又比上個月跑多咗少少，最主要係跑步機對我幫助好大~ 當初買部機放屋企主要係因為唔想訓練受天雨影響，但原來天氣熱可以幫助更多，令我可以更靈活咁去安排我嘅練習~ 有好多同學問我跑機唔會覺得悶咩？的確係悶嘅，平時跑街唔聽歌嘅我喺屋企跑機一定要放音樂~ 😂 而且兩者跑步腳感始終都有分別，但其實跑機都有佢嘅好處，就係喺練習途中我可以更仔細去留意自己嘅身體狀況：身體有冇歪斜？每一步落地如何？呼吸會否過份急促？擺手姿勢是否理想？跑機可以令我更靜心去留意自己身體係點運作~

里數方面我冇特別去留意，我俾自己嘅最低要求係每日跑12k，星期三上堂星期日跑長課，冇其他了~ 關於練習我堅持重質不質量，如果身體跟得上就跑多啲，攰嘅就繼續維持呢個訓練量~ 唯獨是今個月嘅體能練習時數減少了，下個月要安排一個更好嘅時間表去加插體能訓練環節~ 😛

31/05/2020

一個月又過去了~

疫情好似緩和咗，二班亦終於重新開始上課，好開心可以再次同大家一齊練跑~ 還記得五月第一日就已經俾偶像捉咗入荃灣跑青公長課。五月初嘅天氣異常炎熱，所以頭幾日練習好唔適應，每次練習後嘅記錄都顯示心跳率高咗，亦都即係代表練習辛苦咗，尤其是月初第一次速度課跌速嚴重，都有小小擔心。。。之後立刻上網搵資料，話我嘅情況好正常，只係因為未習慣炎熱天氣導致狀態下跌。所以我決定調整訓練，以relax run為主，等身體可以慢慢適應夏天嘅天氣，而且亦增加咗肌肉訓練和拉筋嘅次數和時間，最後感覺到五月中身體狀態開始慢慢回升~

除此之外，今個月最最最重要嘅就係買咗一部跑步機俾自己~~~ 😛 自此我唔使再擔心落雨冇得訓練，亦可以嘗試更多不同嘅練習組合，例如一日兩課，總之就係唔好俾身體習慣單一嘅練習方法，要俾身體多啲唔同嘅刺激~

經過由二月開始嘅自主訓練，期間我不停上網去搵唔同嘅跑步資料，只要係有用嘅就立刻記低再加入去自己嘅練習內容，終於到跑班重開，好似發現自己真係有變強了，其中一課練習仲PB咗5k時間~~~ 😆 坦白講以前我對自己跟AA組跑心入面係有質疑，覺得自己能力未夠。現在雖然我和前面嘅神跑手還有大概10秒距離，但至少我會覺得自己係夠實力去完成每一次嘅AA組program~ 😙

最後要講嘅係我對Turbo 2。。。當我仲以為對鞋好襟著，點知鞋嘅兩邊原來已經爛咗。。。😢 唔制吖！Turbo 2 你不如陪我跑多1000k先退役啦~~~

P.S. 雖然361k係月跑量新高，但距離我偶像嘅400k仲有好遠距離。。。所以話Elite就係Elite，勁到我心服口服~ 🙇

30/04/2020

因為最近沒有比賽，所以唯有寫一點月結的心情吧~

這個月跑了341k，比上個月多了40k~ 上月尾已經有想過四月的練習方向應該如何處理，簡單來說就是由每天的10k訓練增加至12k，一星期跑六天。訓練內容增加了很多變速跑，星期日跑帶點速度的長課，月尾也有跑過我最怕的intervals 400m x16。。。但大部分時間都是以4:50-5:12之間的easy run為主~ 因為訓練量增加了所以自己也附加了”非常多”的體能訓練和拉筋來避免身體受傷~

在這段不正常的日子一切的活動處於停擺狀態，但沒有比賽好像令我練得更起勁，因為我知道自己有更多時間去準備未來的各個挑戰~ 當然，疲倦一定會有，但我沒有失去前進的動力~ 我自小已經花很多時間去練習小提琴，不敢說自己琴技有多好，但自問練習的苦悶我早已經挨過麻木了。所以如果渴望把一件事情做好，練習絕對是必須的，而當中的辛苦疲倦寂寞下雨炎熱沒有比賽目標 (下刪一千個理由)，對我來說這些從來都不是問題。我關心的只有我自己有沒有做好每一次練習，有甚麼我還可以加進練習內容裡令自己變得更好~

在這個增加訓練量的四月，伴隨我的還有這兩本新書~ 當中有一些句子對自己有很大啟發，有一些就會有”哦原來他們想的跟我也一樣”的感覺。書中的內容令我精神更加強大去應付各種安排給自己的訓練~

明天就是五月了，夏天炎熱的氣息悄悄逼近，我希望可以維持今個四月的訓練里數就好了~

P.S. 最後呢句係我偶像逼我說的。。。

#其實今個月都唔係跑咗好多啫😝

31/03/2020

有一陣子沒有更新這個跑步專頁，因為疫情的影響這個本來忙碌的世界好像靜止了，用了一年時間準備的第一次全馬比賽也宣告取消。。。但坦白說對於渣馬因為疫情取消我自己並不是太失望，在收到官方訊息的那一刻起我就跟自己說可能我人生第一次跑全馬的時機還沒到，在這段時間我可以繼續好好的鍛煉自己~

我用了整個二月來放鬆身體和思考之後的練習方法，調整過後三月就開始重新認真練習~ 其實也不是說有甚麼特別練習發明，主要是兩點：一星期跑六天和自己平常的練習強度要提升~ 其實類似的要求去年十二月做過一次，我從十一月的280k到十二月一下子提升到356k，但那時候的我跌入了”儲里數”的死胡同裡，只顧跑而不理質量，所以到一月身體就承受不住生病了，最後街馬32k成績也不理想~

有個這次經驗，今次練習就不會再那麼蠢只是跑，每一天我也會仔細感受自己身體狀態從而調整當天的練習力度，而且除了跑步也增加了很多的體能訓練~ 剛開始的時候的確覺得練體能很辛苦，但當發現身體肌肉力量增強而回饋於每一天的跑步練習當中，就會覺得體能訓練辛苦得很值得~ 最後數據上看不到的是我增長了拉筋的時間，早晚各一課的三十分鐘拉筋時間對身體回復和避免受傷有非常非常大幫助~

雖然沒有比賽可以檢驗我的練習成果，但我確信身體比以前更好了~ 明天就是新一個月的開始，我希望可以保持這個三月的訓練質量，也衷心希望這次的肺炎疫情可以早日平息~

12/01/2020

終於嚟到新一年嘅第一個比賽 - 香港街馬2020啦~~~

呢個係暫時我參加過最長嘅比賽，好耐之前就已經打算借呢個比賽寓賽於操，以準備下個月嘅渣打全馬(人生第一次全馬)~ 果然計劃趕不上變化。。。首先賽前一星期秉承住我近年嘅傳統，一定會喺年頭病~ 今次係傷風，因為病要食藥所以令我今個星期操練減少，連堂都上唔到~ 終於趕及比賽前好番，起步後頭1/3路程順利，但過咗東隧之後竟然開始肚痛。。。之後就開始跌速同喺度諗去唔去廁所，去到23k喺觀塘海邊終於決定都係要去。。。之後嘅步速先叫做穩定番~

返到終點，時間叫做還可以啦，但中途要去廁所真係咁耐比賽以來第一次~ 另外，賽後檢討時間，都仲係發現自己有速度不穩嘅毛病，希望下個月渣打全馬控速可以做好啲~

P.S. 對於我偶像🦁放棄做我pacer決定自己走去玩仲上埋電視，本人對此深表遺憾~

#香港街馬

31/12/2019

終於到咗2019年嘅最後一日lu~

月初問過威sir我今個月應該跑幾多，然後佢話比我十一月(280k)再多少少。。。我冇我偶像🦁咁優秀啦(一個月400k。。。)，所以我就自訂350k做我十二月嘅目標~

本來今日只要跑多8k就順利達標啦，但點知今朝喺whatsapp group收到教練嘅除夕最後課表：Tempo 10k + intervals 300m x 8。左思右想，反正都係要跑一於照跟教練program啦~

將軍澳嘅逆風好恐怖，完全係可以吹郁一個人。。。唯有用意志去堅持~ 10k tempo算跑得唔錯，我好耐都冇迫過自己跑10k under 50分鐘，跑到肺都甩；Intervals雖然之前tempo run已經消耗咗一定嘅體力，但慶幸自己最後都完成到~

356k暫時係我跑步練習最多嘅一個月，中間有參加一個pb咗18分鐘嘅半馬比賽，我唔清楚呢啲訓練最後會帶到咩成績俾我，但我會繼續跑落去，希望可以見到自己嘅極限~


#其實練跑之後身體好咗已經好感恩
#今年竟然可以減咗18磅真係好痴線

17/12/2019

15/12/2019

按住自己定落嘅全馬準備計劃，今個月希望可以參加一個半馬比賽去測試自己狀態，香港從來不缺比賽，最後選擇皇者之戰半馬2019，不為其他，只為慕名已久嘅梅子林路~ 😆

賽季去到中間同學有好多唔同嘅備戰方法，所以今日參加皇馬嘅同學唔多，今朝亦都只有我自己一個去比賽場地，喺車途中有時會閉目養神，有時就會喺腦海入面幻想比賽嘅情況~ 到咗馬鞍山，拉筋，熱身，寄行李，做足一切準備功夫就上線準備出發lu~

雖然上星期日比較凍，但其實相比之下我比較喜愛今日嘅天氣，暖番少少但有厚雲幫手遮太陽~ 到咗梅子林有種"噢，原來係咁嘅"嘅感覺，之後就繼續跑。。。到咗終點，時間有少少。。。只係少少唔滿意，因為本來我目標係想跑1:35內，但其實1:37已經比我上一個半馬比賽快咗18分鐘，成績已經幾滿意，但更喜出望外嘅係我竟然攞到組別第八！我都係第一次喺跑步比賽攞獎，雖然個杯好bb~~~ 😂

回想返轉頭，今年算係我第一年開始認真練跑，中間學識好多唔同嘅跑步知識，要特別多謝威🐍，普巴🐍，🐟miss，水🔮🔮嘅教導~ 仲有⭐⭐班長，RMAC永恆嘅偶像原野🦁同其他同學仔陪我每星期日一齊跑長課~ 冇咗佢地我係一定唔會跑到呢個時間~

冇嘢好得過用一個獎杯去為2019作總結，半馬跑1:37未必係啲咩特別時間，但我會繼續練習，尋找自己嘅極限~~~

P.S. 下一次半馬繼續都係以sub 3做目標就ok了~ 😆


#皇者之戰半馬2019
#比賽完之後當然要跑番我最愛嘅630披啦