04/08/2026
U型傳球只係一個現象，唔係一個問題。當一支球隊刻意利用邊路去波，由翼鋒去take risk而非中場中路，好自然就會出現U型傳球呢個現象。一邊突破不成，經由中場或中堅過渡至另一邊再嘗試突破，其實係好正常好合理嘅事。
點解用邊路去冒險而唔用中路，有兩個好簡單嘅原因。第一係喺邊路失去控球冇中路咁危險，減低被反擊嘅機會。第二係現今球壇有能力喺block入面保護皮球、再交出致命傳送嘅中路球員少之又少，倒不如出多個工兵或者box crasher。
Iraola正正就係一個強調利用邊路去波嘅教練，亦解釋到點解般尼茅夫嘅翼鋒會有突出嘅表現（如Semenyo、Rayan）。黎到利物浦佢貫徹同樣風格，著重喺邊路用翼鋒、閘位、中場形成三角形去進攻，中路只係駁腳為主。
對列斯聯呢場熱身賽，大部分攻勢都係由Rio嘅盤扭、Kerkez同Frimpong嘅前插策動，其中Rio有好大自由度、好多機會同球權嘗試突破。喺呢個踢法入面，有一對個人能力強嘅翼鋒至關重要，所以紅軍正喺轉會窗積極為呢個位置尋覓目標。
失去控球後，球員好積極執行Iraola嘅快速反搶 (counterpress) 理念，對位亦非常清晰。唯獨中堅位置用上一對小將，制高同上搶較弱被對手用長波解壓。利物浦開季似乎只得Jacquet同van Dijk兩位中堅，後防陣容深度有改善嘅空間。
同去年一樣，利物浦來季嘅成績好大程度取決於squad building。Iraola嘅game model冇明顯問題，但假若好似上季經常要球員客串其他位置、被逼出四個中場中，就好難收到理想效果。如果翼鋒表現不濟，出現U型傳球都唔會感到驚訝。
