20/09/2026
One at a time，不過呢個small step真係有啲太過small。
富咸同熱刺係榜尾未贏過波嘅難兄難弟，曼聯除咗中柱同OG有得賴運氣唔好之外，整場波嘅表現的確唔好得過富咸幾多，係唔值得贏嘅。
上季季尾氣勢唔錯令到球迷對今季都好有憧憬，但係卡斯米路離隊同烏加達受傷所帶嚟嘅三位中場新兵，都唔足以解決曼聯多方面嘅漏洞：後防人手不足、前線欠侵略性，呢啲弱項仍然有待解決。
先講下進攻，錫斯高傷癒復出未有狀態，相信阿默特好返都要啲時間上力，所以曼聯進攻欠銳利呢個問題冇辦法從人選調動呢方面去解決，繼續用呢幾位球員攻堅唯有就係改變位置。拉師傅唔識打中間，但問題佢打左邊就霸咗Cunha個最佳位置搞到Cunha都廢埋。當然Cunha個位唔啱踢都唔係淨係就拉師傅嘅問題，另一個原因可能係泰利文斯令到B費多咗機會打前啲，變咗唔多插前嘅Cunha同B費一齊喺禁區頂徘徊隊波反而冇咗target man。小編覺得最理想係阿默特好返就由佢打右、保姆打最前、Cunha打左，拉師傅打後備，但阿默特未有態之前，小編真係會寧願左中右係Cunha、保姆、Lacey，起碼保姆唔使淨係喺右邊拖返入中間射大位可以插前一腳，打啲更加直接嘅波。
後防方面，原本今年大家對佢期望高咗嘅希雲，相信上一場已經露曬餡兼崩盤，同發曬夢嘅瑪莎拉奧都有一排企唔返起身。依家唯有就係Shaw唔掂嘅話多古幫下手頂左邊、大碌唔點嘅話就Yoro幫手頂下右邊，求神拜佛屠夫同埋麥隊唔好受傷(對De Ligt真係冇乜期望)。
最後，辛苦拉文斯。小編諗佢可能都仲係治療緊世界盃嘅傷痕，而佢開季呢幾場表現都算搵，但係球隊仍然冇表現，最有機會「習得無力感」嘅可能就係佢。
#英超 #曼聯
