03/08/2026
兩年一屆的世界毽球錦標賽將於8月25至29日在德國哈根隆重舉行！今屆賽事備受矚目，同時亦凝聚了港隊過去兩年的訓練成果與拼搏精神。
回顧上屆賽事，中國香港隊表現亮眼，勇奪2面銀牌及4面季軍，為港隊寫下難忘佳績。
踏入新一屆，港隊將派出7男7女，由新力軍與經驗豐富的選手攜手出戰，實力與鬥志兼備，準備在世界舞台上全力以赴、爭取更佳成績。
比賽開始前，我們將陸續為大家介紹港隊每位運動員的背景與特色，讓你更了解他們的故事。敬請密切留意，一起為港隊打氣！
賽前介紹
運動員:張駿明（Bee/Anthony)
踢毽年資：35年
入選港隊：26年
入選世界賽：11次
沒有跨不過的圍牆
今次世界賽男生最後一位我地要介紹嘅運動員係毽壇長青樹Bee。Bee踢毽生涯已經35年。入選港隊26年，而今屆更係 Bee 由2000年（第2屆）至今，參加第11次世錦賽。呢份經驗唔單止係年數，更係一種「由比賽學到自己」的韌性與底蘊。Bee 今次賽場想證明嘅事就一句直擊人心： 「沒有跨不過的圍牆。」
Bee 用一句話介紹自己喺運動場上的風格：穩定輸出。因為對佢嚟講，真正嘅強唔係只出現喺單一時刻，而係喺每一次回合都能夠保持輸出、保持節奏。喺場上，Bee 最重視的態度係：主攻手的責任與到位球的執行力。佢會處理第四腳：「到位球——殺！不到位球——也要成功殺！」因為這就係佢對主攻手崗位嘅態度。而隊伍中，Bee 嘅角色更係主攻手：只要球升得起，就相信我吧！當壓力湧上來，Bee 會用方法把它轉成能量：Cheer Up帶動士氣，令佢更容易感到隊友一條心，從而忘卻壓力。
至於 Bee 嘅習慣與儀式感，佢分享得好實在：
- 進攻時會自我暗示「要最高輸出」
- 防守時會用擊掌提醒自己「要集中」，因為佢相信自己可以守住自己負責嗰一區
而當佢想對過去的自己講一句話，Bee 會講：「早d聽教練講，花多d時間做gym。」因為佢已經用比賽和訓練證明：體能唔係加分題，而係能夠把想法變成技巧嘅關鍵基礎。佢坦言最辛苦、但也最關鍵的訓練內容係：體能訓練。 因為呢一環相對係自己最弱一環，練完往往累到星期一要靠意志去頂住；但同時，體質變強之後，佢亦能夠把更多想法落實成真正做得到的技巧。
Bee 亦講咗一次「看起來不順，後來反而變關鍵」嘅經歷：2017年香港舉辦世錦賽，當時遴選狀態滿意，但越接近賽期越容易把比賽放在心上變成壓力，狀態一路下滑，小組賽亦未能自如發揮。直到四強遇上中國，知道係越級挑戰，Bee 反而收斂心態，專注找位置突破；亦多得教練與隊友提醒，加上香港觀眾支持，終於成功走出低谷，先勝一局。之後季軍戰亦正常發揮，順利奪季——當刻的感受係如釋重負。
而 Bee 最有意義的成就，佢分享係：第十五屆全運會決賽不敵廣東。當下佢曾經懷疑自己「係咪錯了一兩個決定」，但最終得到教練、隊友同資深前輩嘅欣賞和肯定，令佢釋懷；佢得出嘅結論係——自己還可以再做得更好；如果仲有機會，就會繼續全力以赴。
Bee 也分享一個難忘轉折瞬間：2015年世錦賽小組對戰匈牙利。當時不利因素眾多，甚至只剩三人撑下餘下賽事，但 Bee 提到關鍵係——訓練其實沒有預備到呢組合。最後季軍戰更因為判斷問題而落入拉鋸戰；但三人重新調整傳球與擊球線路，連番得分，順利奪季。呢段經歷，正正印證 Bee 的信念：沒有跨不過的圍牆。
Bee一路走來，想要感謝既人很多，佢既隊友仲有幾個同佢到處征戰既隊友晉升成既教練，對得仲多過屋企人，佢地都是一直一齊訓練，分享經驗。同隊員一齊競賽係會見到佢地既進步追上黎，然後每次我都要再諗方法想要打贏番佢地。感謝港隊內既兄弟姐妹。多謝豪哥幾年來對我體能上既訓練與改善，我先實踐到更多想法。仲有多謝朋友同事屋企人既全力支持。
Bee 對「成功」嘅定義亦非常清晰： 「我相信是過程。」佢期望能挑戰高水平隊伍，把自己同隊伍發揮得淋漓盡致，並相信到時會成為佢未來最寶貴的回憶。
問到今次世界賽最主要目標，Bee 希望再次打入決賽，挑戰自己。而佢最大的動機來源，亦好有畫面感：期望能一嘗巔峰對決，想睇下自己個山頂既風景。賽前 Bee 最想跟觀眾說：「最好聽既聲音，係你地既歡呼聲！！！」。今次世界賽，讓我們記住 bee 的一件事：佢對踢毽的熱情，會用叫喊把它傳到全場。
#張駿明
#支持港隊
#世界賽
worldchampionships
