Twenty & One Darts

Twenty & One Darts Twenty & One Darts Limited是以香港為本位的飛鏢創新媒體，透過比賽報道、鏢手?

【PDC Qualifying School 直擊】龍仔狀態大勇，局局都差不多係見光死，一埋鏢就結，壓倒性姿態以 5-1 取得Q School 2022 第一場比賽嘅勝仗。woooohoooo，希望之後嘅賽事佢會繼續大勇啦，大家記得繼續支持...
09/01/2022

【PDC Qualifying School 直擊】
龍仔狀態大勇，局局都差不多係見光死，一埋鏢就結，壓倒性姿態以 5-1 取得Q School 2022 第一場比賽嘅勝仗。woooohoooo，希望之後嘅賽事佢會繼續大勇啦，大家記得繼續支持龍仔呀😎
#龍仔

25/12/2021

【聖誕節快樂】
Twenty & One Darts 祝各位飛鏢友，聖誕節快樂! Santa Claus is Coming to (Twenty & One) Darts☃️ #小編夾硬押韻 #聖誕節快樂

【2022年度世界飛鏢冠軍爭奪戰正式開始】從今往後，小編會注意冬至來臨，今日準備暫時退出工作，留出時間出Po。飛鏢界年度最大盛事William Hills世界飛鏢冠軍賽日前喺倫敦展開，雖然倫敦仍受新冠肺炎嘅影響，但不減飛鏢迷踴躍參與，每場比...
21/12/2021

【2022年度世界飛鏢冠軍爭奪戰正式開始】
從今往後，小編會注意冬至來臨，今日準備暫時退出工作，留出時間出Po。飛鏢界年度最大盛事William Hills世界飛鏢冠軍賽日前喺倫敦展開，雖然倫敦仍受新冠肺炎嘅影響，但不減飛鏢迷踴躍參與，每場比賽都全場爆滿，氣氛一流。今屆賽事由上屆冠軍、世界第一嘅Gerwyn Price作1號種子領銜世界列強開賽。小編留意到最近各大賽中除左前列高手外，其他選手表現都漸漸提升，有幾位小編覺得需要關注吓，例如巡迴賽排名首位嘅Callan Rydz，依位世界排36嘅年輕選手今年成績出眾，今年已拿下兩個選手賽錦標，更打入格蘭披治嘅決賽圈，值得留意。另外小編比較關注奧地利Rodriguez兄弟，一直於發展系列賽表現超卓嘅佢哋，今次走上世界冠軍舞台究竟會打成點呢？不竟阿哥喺世界盃打入決賽，實力不容忽視。當然要注意兩位打入決賽圈嘅女鏢手，特別係最近上曬身嘅Fallon Sherrock，前屆佢喺同一賽場曾打入第三圈並創造咗首位女子選手喺世界冠軍賽擊敗男子選手嘅創舉。另外一定要留意香港代表Royden Lam同埋新加坡代表Paul Lim嘅演出啦！

講返首兩日賽事，多場難分高下嘅比賽同埋經典對陣令氣氛非常熾熱。首場由Ritchie Edhouse對戰候補嘅Peter Hudson，兩位英格蘭鏢手表現緊張，臨場埋鏢出現失誤，雙方激戰至決勝局最後由Edhouse取勝。第二場世界排名40 Ricky Evans對戰印度代表Nitin Kumar就比較一面倒，Evans憑經驗壓倒對手3:0勝出。第三戰兩屆世界冠軍Adrian Lewis出場，近年狀態不佳嘅佢最近攞番唔少狀態，3:1輕取Matt Campbell。最後一場衛冕冠軍Gerwyn Price對戰剛出線嘅Ritchie Edhouse，本來以為Price會輕取對手，點知事與願違，Price首局多次犯錯，喺落後0:2嘅時候錯失D20埋鏢，讓對手爆冷以3:0取得第一局，全場大跌眼鏡。第二局Price手感回升，但Edhouse再度施壓喺落後2:1時打出106埋鏢追平2:2。但冰人畢竟係世界冠軍，抗壓能力超強，一記86埋鏢追平1:1。第三局局勢逆轉，Price再次失誤被Edhouse打破先手領先2:0，Price無放棄連追三Leg，以一記T20 S20 Bull埋鏢取得第三局，大分領先2:1。此時Price回到100分平均嘅水平，勢不可擋。Edhouse多次失誤被Price拋開，最後Price輕鬆3:0取勝，大分3:1反勝晉級第三圈。

次日中午巡迴賽選手Steve Lennon對戰北歐代表Madars Razma，Lennon開賽激烈進攻，以3:1勝出。西歐代表Chris Landman爆冷3:0橫掃巡迴賽前列Scott Mitchell。第三場巡迴賽代表Chas Barstow 3:1輕取加拿大代表John Norman。中午最後一戰為中午出線嘅Ricky Evans對戰22號種子Daryl Gurney，Evans一開局第3Leg以一記146埋鏢嚇一嚇對手，號稱Rapid嘅佢完全唔怕對手，趁對手埋鏢失敗以72分埋先取第一個大分。第二局雙方出現失誤，尤其第4Leg，Gurney D10埋鏢失敗，Evans跟手失咗個15度埋鏢，最後Gurney取得第二局。第三局Evans再次犯錯被Gurney把握反超2:1。第4局Evans領先下再次被Gurney反勝，細分打成2:2後Gurney喺大幅落後下以Ton 80將分數壓到96，Evans 147埋鏢先中一個T17再中一個T20但係失咗隻D18。Gurney之後96埋鏢都失敗，Evans以為可以輕取依局竟然36埋鏢失敗，最後被對手三鏢埋成功，Gurney反勝出線，Evans 狀態其實大好，不過小失誤令到佢失去出線資格，非常可惜。

黃昏賽事開端由愛爾蘭代表William O'Connor對戰美國代表Danny Lauby，開手O'Connor以絕對優勢大幅領先對手2:0，不過以快見稱嘅年輕選手Lauby狀態回勇連取兩局追平，可惜最後都係由經驗比較深嘅O'Connor取得出線資格。另外兩場第一圈賽事都係一面倒嘅，分別由Ryan Meikle同埋Ron Meulenkamp各自3:0橫掃Fabian Schmutzler以及女子代表Lisa Ashton。最後一場第二圈賽事竟然係兩屆世界冠軍Gary Anderson對戰老對手同為兩屆世界冠軍嘅Adrian Lewis。第一局戰況緊張，Adrian穩定發揮令佢取得先手埋鏢嘅機會，並成功以D20埋鏢先取第一局。不過此後幾局Lewis多次犯錯，不斷只能命中Single被對手大幅拋離，甚至出現跌鏢等情況，Anderson則表現穩定，第二局尾端更有85同92埋鏢，領先大分2:1。第四局差距更加明顯，Anderson輕取2 Legs後，被Lewis以先手埋鏢，但竟然三鏢D10都唔中，最後Anderson以S20 D20埋鏢成功，以3:1取勝出線。

首兩日比賽就交代住咁多先，咁精彩嘅比賽點會比佢停，之後小編會繼續報導吓比賽嘅戰況，大家密切留意啦！

【11月PDC大賽回顧】左思右想，久違嘅小編應該承擔起成個page嘅責任，繼續積極出Post。哈哈，好啦，先講吓剛過去嘅11月，PDC 賽場有兩大聚焦點，一個就係Cazoo Grand Slam of Darts，而另一個就係Ladbrok...
21/12/2021

【11月PDC大賽回顧】
左思右想，久違嘅小編應該承擔起成個page嘅責任，繼續積極出Post。哈哈，好啦，先講吓剛過去嘅11月，PDC 賽場有兩大聚焦點，一個就係Cazoo Grand Slam of Darts，而另一個就係Ladbrokes Players Championship。首先Grand Slam 依個享負盛名嘅大賽於英國狼郡展開，由32名喺之前取得入場卷嘅世界頂尖鏢手競逐依項大賽冠軍嘅殊榮，包括受邀請嘅多個Major Tournament 嘅冠軍選手，以及歐洲大賽冠軍，Players Championship嘅前列選手，PDC Tour Card Qualifier，以及其餘如Development Tour Order of Merit 勝方及女子年度系列賽Order of Merit。

今年得到入場券嘅都係星光熠熠嘅世界前列，因此首回合分組賽已經好戲連場，例如Group C 兩大前世界冠軍James Wade 同Rob Cross 一組，Group E 上屆世界冠軍 Peter Wright 大戰 女子現今最佳鏢手 Fallon Sherrock，Fallon 更加大破紀錄，喺分組賽三戰取得二勝，創造出飛鏢大賽史上首次出線16強嘅女子鏢手，之後佢更加反勝世界杯亞軍奧地利老將Mensur Suljovic打入8強才被世界排名第二嘅Peter Wright 擊敗，可謂打出生涯最夢幻之旅。主賽圈小組賽中，所有種子鏢手都能夠順利出線，同時能夠出線嘅都係大賽常客，例如前世界冠軍Rob Cross、世界排名第9嘅Michael Smith 以及奧地利老將Mensur Suljovic，而最近大熱嘅年輕新一代Rowby-John Rodriguez以及Joe Cullen 都能夠出線，令到16強戲碼非常精彩。經過一輪大戰，包括三屆世界冠軍MVG 擊敗兩屆世界冠軍 Gary Anderson，Peter Wright 擊敗José de Sousa等，排名較佳嘅選手（世界排名前4）都能夠出線，同時包括Fallon Sherrock。8強嘅戲碼更加恐怖，由威爾斯內訌開場，兩位世界杯隊友 現今世界冠軍Gerwyn Price 以及 今季大師賽、格蘭披治、世界聯賽、世界巡迴賽冠軍 Jonny Clayton 狹路相逢，在雙方都能夠打出接近100分嘅情況下，Price 最後以16:12 勝出，出線4強。另外三場賽事都非常緊湊，包括世界排名第4嘅James Wade 16:14險勝Rob Cross，「蛇咬」Peter Wright 以超過100分嘅平均16:13 擊敗Fallon Sherrock，同埋Michael Smith 爆冷16:13擊敗MVG，小編覺得最刺激應該係兩位Michael 嘅對壘，因為作為現今史上前列中出手最快嘅兩位鏢手，迅速而準繩嘅打法每每令人拍案叫絕，精彩絕倫，連個攝影師嘅鏡頭都差d 捕捉唔到就知幾激烈。

入到4強，Price 繼續強勢，打出102.58分嘅絕佳成績，壓倒性以16:9 擊敗James Wade，另一邊廂Peter Wright 亦打出100.7 擊敗Michael Smith。來到決賽，世界頭2名碰頭，絕對係冤家路窄，自19年世界冠軍戰雙方對壘後，6次碰面各自有3次取得勝利，因此今次Grand Slam of Darts 絕對係雙方爭奪下屆世界冠軍嘅前哨戰，不過Price 一直喺Grand Slam 當中保持極高勝率，之前已經在18及19年取得冠軍，隔了一屆後，今次決賽 Price 完全控制大局，頭5 Legs 中有4Legs 都由佢以100%一次埋鏢就能勝出，雖然Wright 之後有嘗試過力追至3:4，可惜Price 嘅威力及狀態實在太強，連取6局領先到10:3，當中包括一個Ten-Darter。Wright 其實都有取得一次Ten-Darter 將局數收窄至6:12，不過Price 再次打出高效嘅 13、14、13 darts 完局取得賽點，就算Wright以86及155埋鏢都難阻Price 以16-8 大比數奪冠，2021 PDC Major 決賽中已取得2個大賽冠軍以及1個亞軍，Price果然保持住作為上年世界冠軍嘅強勢。

但係其實Wright 都不遑多讓，2星期後嘅另一大賽 Ladbrokes Players Championship 中，8強開始爆發首先以穩定嘅埋鏢擊敗爆發力雖強但臨場完局比較差嘅三屆世界冠軍MVG，MVG 作為上屆依個比賽嘅冠軍面對強敵表現得稍為緊張，多次埋鏢失誤被穩定發揮嘅Wright 偷取局勝，最後以6-10 落敗。Wright 嘅強勢延續到四強擊敗近期大勇同時已經奪得三個PDC Major 嘅Jonny Clayton，今年四度打進大賽決賽都取勝嘅Clayton 實力的確無從質疑，但面對狀態頂峰嘅Peter Wright 完全無還擊之力，一直比分帶住對手，最後大勝11-6進入決賽。

決賽面對世界排名第15 嘅Ryan Searle，Searle 能夠打進決賽絕對是有啲爆冷，可能係抽籤運比較好嘅關係，佢整個比賽之路都未遇到前列嘅選手，直到決賽面對Peter Wright，但係其實佢嘅表現絕對不失禮。現場大部分人都比較偏好Ryan Searle，可能觀眾都鍾意鋤強扶弱，又或者係依位第一次打入電視直播決賽嘅Ryan 長髮Heavy Metal 嘅造型同激情。開局雙方都比較手緊，多次埋鏢嘅時候都出現失誤，包括Wright 埋D10 同D5 都失敗，雙方打成2:2。之後多次雙方多次保住自己嘅先發局，直至第11局由Searle 打破，首次領先6-5。不過第12局，Wright 即刻破番Searle 嘅先發，之後更還以一個141嘅埋鏢，領先到8-6。不過Searle 完全無認輸，以比較好嘅埋鏢質素追和8:8。但係Wright 作為前世界冠軍，佢嘅經驗絕對係佢嘅優勝關鍵，佢嘅表現非常穩定，喺關鍵時刻都表現出絕佳質素，再破Searle嘅局數後領先到10-8取得賽點，不過佢其後不行打失咗一隻129埋鏢同埋一個D6，而Searle 打出一隻103埋鏢，令對手錯失直接奪冠機會。Searle 表現出令人敬佩嘅激情，趁住Wright 再次錯失Bulleye 埋鏢嘅機會以D7埋鏢成功，追成10-10。決勝局以為Searle 會乘機追上，不過Wright 起手即刻打出一個Ton80 下Searle 馬威，不過Searle 都即可還以一個Ton40，之後雙方都打出60、100，Wright 先試埋161，以99將分數壓到落62，依個時候Searle 以177度將分數壓到24，為Wright 帶來無比嘅壓力，不過Wright 喺依個緊張時刻能過以S10 S20 D16 順利埋鏢，取得佢今年度嘅第二個冠軍。Searle 雖然落敗，但係已經為一眾飛鏢粉絲帶來無限驚喜，證明新一代嘅鏢手完全有足夠能力作為後浪推前浪，離佢哋承繼近代冠軍鏢手嘅寶座真係指日可待！

好，小編久違了大家咁耐終於回歸，PDC 賽場而家就爭緊世界冠軍，我哋好快會同大家跟進一吓，大家密切留意呀！

【龍仔出戰PDC 世界青年錦標賽】前日龍仔以 International Qualifier 嘅身分參與PDC Youth 賽季中最大嘅一項比賽 PDC World Youth Championship，以往該比賽為未來鏢界世界前列嘅搖籃，...
30/11/2021

【龍仔出戰PDC 世界青年錦標賽】

前日龍仔以 International Qualifier 嘅身分參與PDC Youth 賽季中最大嘅一項比賽 PDC World Youth Championship，以往該比賽為未來鏢界世界前列嘅搖籃，當中贏過該比賽嘅現今前列選手包括 世界排名第5嘅Dimitri Van den Bergh、第9嘅Michael、第19嘅Luke Humphries，而三屆世界冠軍MVG 同世界排名第10嘅Nathan Aspinall 都曾經各自喺2011、2012年（MVG），同埋2015 年（Aspinall）入過該賽事嘅決賽，可謂世界冠軍嘅預選。龍仔能夠代表香港以及亞洲參賽，絕對係實力嘅象徵，佢嘅努力真係不容忽視呀！

講番個比賽，龍仔今次被派入Group E，之前都同大家講過龍仔手籤一直都唔係咁好，今次都無例外，佢竟然抽到同上屆冠軍Bradley Brooks 一組，仲有最近喺Development Tour 中表現出色嘅Lewis Pride。第一場龍仔首先面對小組比較弱嘅Tobias Fischer，比較慢熱嘅龍仔入局唔係咁好，不過埋鏢方面比Fischer 好，第一局更以69埋鏢得手，之後發揮漸入佳境，全場打出5個100+嘅Ton，最後以4:0 橫掃Tobias 取得首勝。

第二場就面對上屆冠軍 Bradley Brooks，其實最近Bradley 已經打緊Player Championship賽事，月頭更加打入World Grand Slam of Darts 嘅決賽對住世界第一嘅Gerwyn Price 都只係輸8:10，實力絕對係有啲超班。龍仔初段對住佢絕對無怯場，雖然第一局Bradley 以84、180、95、142 12鏢完局，以為俾到下馬威我哋龍仔，點知龍仔第二局以140、85、95、65、116 15鏢埋鏢還以顏色，真係睇到小編熱血沸騰。第三局Bradley 以15鏢、50分埋鏢成功，反超前，但係第四局龍仔再次大爆發，連續打出三個100同埋一個165，最後36埋鏢成功，以14鏢完局追平。見到龍仔狀態咁好，小編睇住DartsConnect 嘅文字直播都睇到大叫呀！第五局雙方都錯失多次帶開嘅機會，喺埋鏢階段多次出現失誤，最後Bradley 先埋25 成功，留下16嘅龍仔黯然輸咗依局。第六局Bradley 再次爆發，14鏢 以107.36 勝出，龍仔結果以2:4不敵依位上屆冠軍，但係龍仔遇強越強嘅表現實在值得我哋隔岸鼓掌呀，打得好呀龍仔，下次你就可以KO 佢哋㗎啦！

小組賽最後一場關鍵戰對戰Lewis Pride，初段雙方入局都係比較慢，Lewis 多次7分埋鏢都埋唔到，龍仔執個死雞以40埋鏢先取第一局。第二局Lewis 大爆發，一開局就整咗個Ton80，之後打出60、91、54、100，最後16埋鏢成功，打和1:1。第三局Lewis 繼續強勢，連續打出134、100、122，以32埋鏢成功，反超前2:1。龍仔依個時候並無驚過，遇到壓力反而打得更加好嘅龍仔第四局打出一個135同一個140，面對對手錯失24分埋鏢嘅機會，龍仔54埋鏢得手，追平2:2。不過第五局Lewis 繼續爆發，而龍仔有少少手軟，只打出52.2嘅平均分，結果對方18鏢完局。第六局關鍵局，龍仔收拾心情打出連續100、180、140，Lewis 嘗試力追，當中打出一個Ton80試圖追近，但係分數已經帶開咗嘅龍仔雖然錯失咗首次32埋鏢嘅機會，不過最後都32埋到，追平3:3。決勝局，Lewis 明顯狀態大勇，不斷打出接近100嘅紀錄，龍仔已經盡力打出96、97 分試圖力追，但係都係返魂無術，對手17鏢埋鏢完局，龍仔最後以3:4飲恨出局，無緣16強。

龍仔今次於依項大賽嘅表演已經非常之好，面對住眾多高手都毫無懼色，多次打出平均100+嘅Leg，可惜係對手都打得好好，真係雖敗猶榮。龍仔話下次會再努力啲，好快就會再次做出好成績㗎啦！

另一邊廂，是次比賽最後嘅冠軍屬於Ted Evetts，依位24歲嘅選手今年係最後一次參與Youth 嘅賽事，第七次參賽嘅佢之前已經攞咗世界冠軍ProTour 嘅資格，實力非常之強。一路上淘汰咗Development 系列多個賽事嘅冠軍 Keelan Kay 同埋一樣擁有世界巡迴賽Tour Card 嘅Kevin Doets，決賽面對月初Grand Slam of Darts 中小組出線打入16強最後輸俾Jonny Clayton 嘅Nathan Rafferty。依2位最強年輕新一代大鬥法完全無手軟，雙方都打出90+嘅平均分，絕對係世界大賽嘅水平，Ted 打出19隻100+ 嘅Turn，而Nathan 就打出18隻，非常驚人。當中Nathan 更喺第九局打出12鏢 （125.25）埋鏢嘅成績，非常恐怖。不過Ted Evetts 最後一局打出134、120、96、104、47 嘅表現，完美控制比賽節奏嘅佢最後以6:4勝出，捧起Youth 賽事嘅冠軍，絕對實至名歸。大家之後想睇佢嘅比賽，就應該可以上電視度睇啦，因為佢攞咗ProTour 嘅資格之後就會參加啲大賽面對世界前列嘅強敵㗎啦，大家真係密切留意住依位新星呀！

好啦，報導係咁多，不過其實同一時間係仲有大賽Ladbrokes Players Championship進行，之後小編會再同大家講吓依個比賽，大家唔好走開呀！WoooooHoooooo！

#龍仔出征
#龍仔

【龍仔出戰英國Development Tour】小編發現好多人以為龍仔遊走英國後就只係忙住做我哋嘅特派記者，其實就唔係咁㗎，最近龍仔又再參賽啦，8月嘅時候龍仔打咗幾場Dev Tour 嘅賽事，不過因為有啲抱恙所以不幸都吿落敗。經過依幾個月閉...
10/11/2021

【龍仔出戰英國Development Tour】

小編發現好多人以為龍仔遊走英國後就只係忙住做我哋嘅特派記者，其實就唔係咁㗎，最近龍仔又再參賽啦，8月嘅時候龍仔打咗幾場Dev Tour 嘅賽事，不過因為有啲抱恙所以不幸都吿落敗。經過依幾個月閉關訓練同埋出去打過啲酒吧賽事，龍仔終於抱住十足狀態再次出戰UK Development Tour 嘅賽事。

首日Tour7賽事，龍仔對戰Narberth嘅Mikey Rees 好快已經進入狀態，首Leg 後手壓力下，多次放出Ton勝出，之後更喺第二三Leg 做出100、144、177 同埋Ton80，不過領先3：1嘅時候，對手有番手感，以接近80嘅平均分壓倒龍仔。真係好可惜，不過見到龍仔有咁嘅狀態，小編真係熱淚盈眶。

下午Tour8 賽事龍仔對戰Ryan Humphrey，龍仔繼續發揮高水平，把握對手多次埋鏢失誤，加上重要時刻都能做出關鍵Ton，其中三局 66、69、65 埋標都能順利三鏢埋到，非常穩定，最後首圈4:2勝出出線。次圈面對蘇格蘭嘅 Louis McGregor，龍仔發揮繼續穩定，多次做出Ton，而且對手出現大量失準，龍仔順利勝出打入第三圈。第三圈龍仔同肥美一樣抽籤倒霉，遇上狀態大勇嘅Cameron Anderson，依位對手首日已經2度打入是次比賽嘅16強，對住狀態幾好嘅龍仔更加發揮得高水平，打出92.49分嘅平均分，非常恐怖。第二三Leg 更加以13同14鏢埋，龍仔完全冇還擊之力，結果0:4落敗。

次日Tour9直接打次圈嘅龍仔面對Jack Male，依位曾經贏過British Teenage Open 嘅明日之星狀態亦非常好，喺埋鏢方面壓倒龍仔，雖然龍仔繼續保持放Ton 嘅質素，但係始終都係見光死，多次被對手一埋鏢就完局，再次0:4落敗。

不過下午嘅Tour10龍仔著曬火，首圈以4：0擊敗Jake Fewell，平均做出79.11嘅平均分。次圈對戰直布羅陀嘅Justin Hewitt 再加大馬力，4:3嘅勝利當中，龍仔做出16隻 100+ Turns，比對手多一倍。第5Leg 龍仔更加做出14鏢埋鏢，當中做出4隻Ton，平均分達到107.36嘅世界級水平。雙方梅花間竹咁贏取每一局達成3：3嘅時候，面對壓力嘅龍仔喺決勝局面對壓力下98埋鏢成功，非常厲害。依圈龍仔繼續保持79.58 嘅平均分，非常高質。 第三圈面對威爾斯嘅Cavan Phillips 可謂高手過招，龍仔第一局繼續保持100分以上嘅平均分，依開局就嚟一個Ton80，15鏢完局。不過對手始終狀態一流，連勝4局擊敗龍仔，第三Leg 更加13鏢埋鏢。雙方嘅平均分去到85以上（龍仔87.00；Phillips 88.09），非常高水平。龍仔出局，但係依個咁嘅表現，小編都非常滿意收貨啦，老懷安慰！順帶一提，Cavan Phillips 最後打到入4強，當中更加喺16強擊敗現今Dev Tour 最佳年輕鏢手 Keelan Kay（Tour9 冠軍）。

最後一日嘅Tour 11 龍仔其實保持到良好嘅水平，打出平均77.84，比對手嘅77.77為高，不過喺埋鏢方面有點手緊，尤其喺第5Leg 放出3個Ton再一個95 但係埋唔到鏢失去領先嘅機會，最後以2:4 不敵。下午嘅Tour 12 龍仔依然穩定，再次次圈出發，做出75.63平均分，當中2Leg 更加做出89同92嘅埋鏢，最後以4:1取勝。不過冤家路窄，第三圈遇到Tour9 擊敗過龍仔嘅Jack Male，70幾分嘅平均分絕對未能匹敵對手，對手打出83.5嘅平均分，第一局已經15鏢埋鏢，100.2平均完局。Male嘅95+ Turns 有13隻，比龍仔多5隻，埋鏢方面出色，再次以4:0擊敗龍仔。

6個Tour 完結，雖然龍仔落敗，未能打進32強以上，不過龍仔今次已經好犀利，平均分都達到75分以上，算係訓練有成果，喺放Ton 方面更加出色，之後再打多啲比賽，應該就會攞番曬十足手感做出好成績㗎啦。大家一定要繼續支持龍仔呀，佢之後仲有好多比賽會參加㗎！同時週末就會開始Grand Slam of Darts嘅主賽圈，龍仔再會同大家報導一吓一眾高手嘅表現㗎！大家密切留意！ WooooHoooo！

#龍仔出征 #龍仔

【肥美英國連環出戰系列賽及資格賽】過去嘅週末，肥美喺英國接連完成咗今季最後一個Super Series 系列賽 以及 Grand Slam of Darts 嘅資格賽，承接上個月嘅Super Series 7 後，肥美已經連續參加了三個賽事...
09/11/2021

【肥美英國連環出戰系列賽及資格賽】

過去嘅週末，肥美喺英國接連完成咗今季最後一個Super Series 系列賽 以及 Grand Slam of Darts 嘅資格賽，承接上個月嘅Super Series 7 後，肥美已經連續參加了三個賽事，絕對係非常之勤力呀，咁懶嘅小編真係好佩服。

好啦，講番比賽啦，上個月中嘅系列賽7，一向抽籤運麻麻嘅肥美竟然喺4日賽事中2次早段就遇到前世界冠軍Rob Cross，肥美兩度喺首圈過關都難以抵擋狀態大勇嘅Rob Cross，加上其中兩日賽事中遇到年輕天才鏢手Kevin Doets 同埋Jack Main，就算曾經打出平均90以上嘅表現嘅肥美都黯然落敗，無緣前列，不過肥美賽後都立即振作起嚟，準備今個月嘅餘下賽事。

上週末連續就舉行咗Super Series 系列賽8 同埋 Grand Slam of Darts嘅資格賽，先講系列賽8，首日賽事狀態回勇嘅肥美再次打出高水準表現，喺面對世界排名30嘅Vincent van der Voort 毫不怯場，打成5:5之下決勝一局打出115.62嘅平均分力壓對手以6:5勝出。好可惜次圈遇到老將Eddie Lovely 以5:6飲恨落敗。第二三日賽事於上老將Jim McEwan 以及 世界排名44 嘅 Luke Woodhouse 都吿落敗收場。肥美連日來都打出接近或超過90分嘅平均分表現，但係都吿落敗，證明現今飛鏢界水平都變得好高，無論老將或年輕選手嘅水準都維持喺絕佳嘅水平，飛鏢賽事嘅競爭力比以前都強得多。

接二連三嘅比賽都非常激烈，嚟到剛過去嘅週末肥美立即出戰Grand Slam of Darts Tour Card Holder 資格賽，此賽事係下星期Grand Slam of Darts 主賽圈最後一個席位嘅爭奪戰，可謂不容有失。不過喺面對對手嚟自戰鬥民族、曾代表俄羅斯隊迎戰世界杯嘅 Boris Koltsov 良好發揮下，肥美再次飲恨，無緣主賽圈。其實肥美近月嘅表現都喺度提升緊，因為疫情而缺乏比賽只能個別練習，令到佢之前嘅手感無咁好，見到佢經過多個大賽中攞番曬啲手感，相信佢會喺之後嘅賽事發揮出更加好嘅水平，小編好期待佢衝上世界前列呀！加油呀肥美！

嚟到年尾，年終大賽一浪接一浪，嚟緊就會有Grand Slam of Darts 嘅主賽圈，大家密切留意呀，抽籤已經出咗，小編最期待睇兩組有女子世界代表嘅比賽，分別有靚媽Fallon Sherrock 巧遇 三屆世界冠軍 MVG，同埋 女子多屆世界冠軍 Lisa Ashton 同 前世界冠軍Peter Wright 一組，屆時一定好精彩呀，大家一定要跟實呀！順帶一提，龍仔喺英國積極訓練同埋採訪，終於再次有得比賽啦，聽日就同大家講吓佢比賽成點啦！大家一定要繼續支持！WooooHooooo～

特派記者：龍仔 🐲

#肥美比賽

【CAZOO 歐洲飛鏢錦標賽落幕 Wright首圈爆冷出局 前世界冠軍奪冠】週末舉行嘅 CAZOO 歐洲飛鏢錦標賽完美落幕，當中多場賽事非常矚目，可能最近嘅比賽頻密，所以多位高手都開始上力，所以少有出現爆冷場面，除咗前世界冠軍嘅SnakeB...
22/10/2021

【CAZOO 歐洲飛鏢錦標賽落幕 Wright首圈爆冷出局 前世界冠軍奪冠】

週末舉行嘅 CAZOO 歐洲飛鏢錦標賽完美落幕，當中多場賽事非常矚目，可能最近嘅比賽頻密，所以多位高手都開始上力，所以少有出現爆冷場面，除咗前世界冠軍嘅SnakeBite Peter Wright。歐洲錦標賽喺整個歐洲賽嘅終幕，歐洲賽領先嘅世界第一 Gerwyn Price 喺上個賽事決賽輸俾Jonny Clayton 後，今個賽事雖然表現突出，但係抽籤運不太好8強對戰三屆世界冠軍嘅MVG而落敗。決賽由前世界冠軍 Rob Cross 對戰MVG，最終來自英國嘅 Cross 以絕佳表演成功擊敗MVG 取得久違嘅大賽冠軍。

當中有多場賽事非常值得留意，首先先講吓世界排名第二 Peter Wright 爆冷落敗予首次躋身電視直播賽事世界排名只有91 來自德國嘅年輕鏢手Florian Hempel。9月初雙方其實喺歐洲巡迴賽 Event 1 對壘過，當時 Peter Wright 以6:3 勝出。一個月後再次對壘，Hempel 果然有備而嚟，雖然高分表現不突出，但係50% 嘅Checkouts Rate 絕對係勝出關鍵。而Peter Wright 雖然做出92.13 嘅3鏢平均分，比Hempel 嘅86.94 為好，但係喺checkout方面表現強差人意，同時最高checkout 嘅分數只有 40，非常令人意外。Hempel 甫開始後以穩定發揮，佢喺開局以97、85、68嘅埋鏢成功領先3Leg，非常穩定，小編發現其出色在於情緒控制得好穩定，喺埋鏢關鍵時往往故意停頓抖一啖大氣，然後才瞄準出鏢，令佢埋最後一鏢嘅質素大大提升。雖然之後Wright 攞番手感，追近到3:5，不過落後太多嘅佢因為自己嘅埋鏢差勁返魂乏術，最後由Hempel 依位年輕人40埋鏢成功，爆冷踢走前世界冠軍取得16強資格。Peter Wright 繼世界格蘭披治錦標賽後再次首圈出局，令人覺得最近佢是否出現疲態，令其最近嘅表現失準，希望佢可以快啲攞番手感，打場好賽事俾大家睇啦！而年輕人Hempel 最後就喺8強對戰奧地利老將 Suljovic 時以10:9落敗出局，雖然係咁，佢已經令好多鏢迷都留意到依位後起之秀，小編都對佢好著迷啦（可能佢非常高大同靚仔）！

另外一場矚目當然係8強大戰由世界排名第一 現今世界冠軍 Gerwyn Price 對戰 三屆世界冠軍 現時世界排名第三嘅 MVG Michael Van Gerwen，今年雙方多次對壘互有勝出，近6次對壘都係梅花間竹咁贏，上個月Price 先贏過一次MVG，今場再次對壘結果卻相反。全場雙方火力全開，3鏢平均分超過107分（Price：107.56 ； MVG：107.74），絕對係世界最頂尖高手嘅表現。而Price 更加喺頭5局維持住平均120分以上嘅瘋狂表現，頭9鏢平均更超過128分，令佢初段領先4:1。頭5局雙方嘅埋鏢需要次數為此喺11-13鏢內，非常恐怖。不過MVG 作為三屆世界冠軍當然唔會就咁認輸，喺第6Leg 被Price 以Ton80 壓到66比99時，MVG 以S19 D20 D20 埋鏢成功，追回一局。之後MVG 繼續放出多個Ton80，最後連勝兩局追到4:4，而頭7局雙方以做出8個Ton80，非常精彩。比賽中段Price 明顯有下滑嘅跡象，平均分降到112左右，而MVG保持住109嘅穩定表現。之後嘅局數都係梅花間竹咁贏，其中Price 同MVG做出多過100+嘅埋鏢，雙方打成7:7，而Price 嘅Checkouts Rate 仲係維持住喺88%。不過依個時候Price 嘅平均分再次下跌，而MVG 把握機會T20 T18 D8 130埋鏢成功，反超前8:7，不過Price 再以一個97埋鏢還以顏色。進入尾段，Price 表現繼續下跌，而MVG 穩定表現實在成為咗佢嘅致勝關鍵，佢把握住Price 埋鏢失誤，以56埋鏢先拿下賽點。最後一局72埋鏢，成功以T16 D12 埋鏢勝出，復仇成功取得四強資格。小編覺得依場比賽贏過係今年最精彩嘅直播賽事，兩位高手毫不禮讓，雙方放出12個Ton80、35個140+、85個100+，平均分達到107以上，而雙方Checkouts Rate 都超過五成，Price 更達到72.73%，非常刺激精彩。而臨場發揮方面，MVG 表現出教材式嘅質素，由頭到尾都Keep住高水平，相比起Price嘅頭段爆發後段大幅下滑更加有說服力，相信好多鏢迷都學到嘢啦！真係好期待佢哋喺不久嘅將來再次對壘。

好啦，最後一場要講嘅當然係決賽。先講講4強戰，由Rob Cross 對戰最近火熱嘅年輕鏢手 Joe Cullen，當然Rob Cross 憑經驗以絕大領先幅度（11:3）勝出。而另一邊廂，MVG對戰最近回勇嘅Nathan Aspinall，初段MVG已取得領先，一直帶開一度領先到7:1，不過Aspinall 突然發力多次做出Ton80同140+嘅成績，連追6局到8:6。MVG之後控制住壓力，雖然Aspinall先手埋64，不過失敗後MVG 三鏢90就可以埋到領先到9:6。但係Aspinall 絕無認輸之意並打出高難道埋鏢，成功追平10:10。決勝一局，MVG 連續6鏢T20，做出2個連續嘅Ton80，然後完美地41埋鏢，11鏢完局，以11:10 險勝Aspinall取得決賽資格。決賽面對英國嘅前世界冠軍Rob Cross，開局雙方互有攻守，而大家喺埋鏢上都出現少許失誤下，打成2:2。依個時候Rob Cross 開始發力，喺第五局以T19 S16 InBull 123分埋鏢。MVG即刻還以顏色以T19 T15 D18 138分埋鏢。之後Rob Cross 開始帶離，憑MVG 嘅準繩突然失靈，Cross 領先到9:4。但係之後MVG 再次做出多個Ton80同140+，一度追到10-7，不過喺第16局MVG 三鏢D4 都埋唔到就明顯顯示到佢嘅手感突然無咗。最後決勝Rob Cross 先手埋81並以T19 D12 兩鏢就成功取得，結果以11:8 贏得冠軍。現時世界排名第11嘅Rob Cross 已經好耐無攞過冠軍，不過佢喺European Championship 嘅賽事中嘅表現往往非常突出，尤其佢係該比賽2019年度嘅總冠軍，上屆就俾Peter Wright 攞咗，今屆捲土重來就再次贏出，非常厲害。見到近兩個比賽Rob Cross 嘅狀態大幅回勇，相信之後其他大賽高手都以十足狀態對壘一定會更加刺激精彩，小編好期待呀，不過之後嘅比賽需要等多幾個禮拜先有，之後就只有Players Championship 嘅系列賽，不過大家都要密切留意呀，因為龍仔同肥美喺英國依個禮拜都會有比賽呀，大家Stay Tune 同WooooHooooo一吓啦！



#係咪個頭唔多老黎

【世界格蘭披治錦標賽 Clayton完美表現壓倒世界冠軍小師弟奪冠】月初世界格蘭披治飛鏢錦標賽完美結束，經過數日精彩絕倫嘅賽事，決賽終上演威爾斯內訌，由世界排名第一嘅Gerwyn Price 對戰佢嘅世界盃隊友 Jonny Clayton。...
21/10/2021

【世界格蘭披治錦標賽 Clayton完美表現壓倒世界冠軍小師弟奪冠】

月初世界格蘭披治飛鏢錦標賽完美結束，經過數日精彩絕倫嘅賽事，決賽終上演威爾斯內訌，由世界排名第一嘅Gerwyn Price 對戰佢嘅世界盃隊友 Jonny Clayton。

自2019年開始，大師兄 Jonny Clayton 就從未贏過Price，今次對壘本來大家都睇好Price 可以成功衛冕冠軍，不過如果大家有跟曬成個比賽就知道 Clayton 最近嘅比賽火力全開，多次成功擊敗世界前列對手，如連勝Peter Wright、Jose De Sousa 等。所以甫開賽勢均力敵，第一Leg雖然Clayton先手，但係世界第一嘅Price一入局就發揮到高水平，並喺一局內兩次做出140+嘅高分，最後先手40埋鏢成功先拿下第一Leg。

但係第二Leg開始形勢逆轉，Clayton穩定嘅發揮並做出比較完美嘅埋鏢，連取2Leg，喺最後一Leg 雙方作出3個140+下，再次由Clayton埋鏢成功取下第一Set。第二Set 開局Clayton上力，不停做出140+，就算Price依Set做出咗3個Ton80都於事無補，多次埋鏢失誤令佢喺最後一Leg 以3-2落敗，落後2局。此事顯示，頭2Set 最主要導致Price敗陣嘅問題在於其起鏢發揮比較差，起鏢成功率只達42%（11/26），令佢幾Leg都係開始就落後。

第三Set，Price首先取下第一Leg，但係第二Leg Clayton喺後手情況下，竟然做出完美嘅T20 T20 InBull 170埋鏢，令故意Set Up 咗40俾自己埋嘅Price 當堂呆咗，果然Clayton 當時手感的確比較好，追成1:1。第三Leg Price 本想還以顏色，開局以做出滿分嘅 D20 T20 T20 嘅Ton 60，該Leg平均過百嘅Price 運用一個Ton80 將分數壓倒24:164，大家都以為佢可以穩勝依Leg，點知Clayton 頂得住壓力，再次做出T20 T18 InBull 164埋鏢，非常瘋狂，Clayton即時做出其指向鏡頭嘅招牌動作，鏡頭轉返去Price 度即見其落寞苦笑。最後一Leg Clayton亦成功以D8埋鏢再取一局，大分3:0領先。

落後3:0 嘅Price 攞番手感，喺雙方做出總共4次Ton80及6次140+下，曾經落後2Leg 嘅Price 後追成功，終於44埋鏢成功，追回一Set。第四局Clayton再次發揮好表現，領先2:0，不過之後嘅失誤俾Price 成功24埋鏢，打成2:1。最後一Leg Clayton再次爆發，110埋鏢成功（S20 T18 D18），3:1 勝出，大分4:1 領先，攞到賽點。

第5Set，攞到賽點嘅Clayton更加放開嚟打，一開局就做出140+ 同Ton 80，同時喺埋鏢方面保持水準，先取一Leg 嘅佢，喺第二Leg 尾段爆發，雖然Price 先試148埋鏢，2鏢T18 但係最後嘅D20 失敗，輪到Clayton 152埋鏢，T20 T20 D16 再次3鏢埋到，Price 已知今次決賽凶多吉少，並笑住同大師兄Clayton 碰一碰拳頭，非常有體育精神。之後雖然Price 細分追回一Leg，但係在第4Leg，Clayton 先手埋鏢116，今場比賽埋鏢非常出色嘅Clayton再次做出T20 S16 D20嘅過百分埋鏢，以絕佳嘅表現結束比賽，大分贏5:1 取得今屆世界格蘭披治飛鏢錦標賽嘅冠軍，佢得知自己勝出後雙手掩面而泣，相信佢開賽前都無估到自己可以擊敗世界第一嘅師弟 Gerwyn Price，尤其佢對上數次對壘都係落敗嘅。統計上，Clayton喺今場比賽擁有住絕對優勢，雖然100+ 嘅次數比Price 少，但係44.74%嘅Checkouts Rate 同埋94.44 嘅3鏢平均分，絕對係勝出嘅關鍵，同時其多次做出嘅高難度埋鏢，包括其中一次嘅最高分170埋鏢，的確令佢取得絕大優勢。依名世界排名第8嘅威爾斯老將今年發揮的確非常出色，相信之後其餘嘅多個大賽佢都會繼續大放異彩，大家密切留意啦。




#大師兄教訓小師弟
#著曬火 #威爾斯內訌

Address

Cheung Sha Wan

Website

Alerts

Be the first to know and let us send you an email when Twenty & One Darts posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Twenty & One Darts:

Shortcuts

Share

Category