04/05/2026
🏆✨ გოდერძი მანჯაფარაშვილს ქართული ქორეოგრაფიის სახალხო მოღვაწის საპატიო წოდება მიენიჭა
🇬🇪 საქართველოს ქორეოგრაფიის კავშირმა ანსამბლის ხელმძღვანელსა და ქორეოგრაფს, გოდერძი მანჯაფარაშვილს, ქართული ქორეოგრაფიის სახალხო მოღვაწის საპატიო წოდება მიანიჭა.
🎖️ აღნიშნული წოდება მას ქართული ქორეოგრაფიული ხელოვნების განვითარებაში შეტანილი განსაკუთრებული წვლილისთვის მიენიჭა.
🎓 გოდერძი მანჯაფარაშვილმა 1980 წელს ქორეოგრაფიული სასწავლებელი დაამთავრა, რის შემდეგაც მუშაობა დაიწყო რუსთავის მეტალურგთა კულტურის სასახლეში (ამჟამად დრამატული თეატრის შენობა), ქორეოგრაფიულ სტუდიაში.
📌 1990 წლიდან კი სტუდიის დირექტორი გახდა, მოგვიანებით კი ანსამბლ „ხალიბის“ ხელმძღვანელი.
ცნობილი ქორეოგრაფი უკვე რამდენიმე ათეული წელია რუსთავში მოღვაწეობს და მისი მრავალწლიანი საქმიანობა მნიშვნელოვან როლს ასრულებს ქართული ცეკვის ტრადიციების შენარჩუნებასა და განვითარებაში.
🏅 ანსამბლ „ხალიბს“ ამ წლების განმავლობაში არაერთი ჯილდო აქვს მოპოვებული — მრავალი საერთაშორისო კონკურსის გამარჯვებულია, საქართველოს მასშტაბით კი სხვადასხვა კონკურსისა და ფესტივალის პრიზიორი და გამარჯვებული.
👯♂️ ანსამბლმა არაერთი თაობა აღზარდა, ხოლო „ხალიბის“ მოცეკვავეები შემდგომ წარმატებით აგრძელებენ მოღვაწეობას სახელმწიფო ანსამბლებში.
🎉 აღსანიშნავია, რომ მიმდინარე წელს ანსამბლი „ხალიბი“ 65 წლის იუბილეს აღნიშნავს.
