20/03/2023
001 – 230304 1500 – Tunbridge Wells vs Holmesdale 1:0
自從將近20年前於日本首次入場睇波後 (仍然清晰記得係J2聯賽橫濱FC主場迎戰山形輸0-3 )，每次海外旅行都會盡量遷就行程以便可以去到外國唔同既球場groundhopping，慢慢形成一種習慣，足跡遍及英倫三島、意大利同日本，估計多年累積下來都應該都有超過30場 (話係應該，因為從冇認真整理統計過，但肯定日本頭四級聯賽既賽事都有涉獵過)。
隨著人生下半場在異地展開，數個月前就醞釀一個念頭：不如藉此將呢種興趣於football is still coming home既新天新地好好延續落去並作簡單記錄，是以就誕生左呢個專頁了。
觀戰旅程由Tunbridge Wells開始，原因好簡單：在地人撐本地波，天經地義。
早於落腳前已經透過社交媒體密切關注呢隊現正處身第九級聯賽既中遊球隊 (冇錯係第九級既郡級聯賽，即係英超向下數落八級)，球會本身有過百年歷史，但成績就乏善可陳，最威水都只係十年前FA Vase入過決賽但響Wembley輸波，但身為一個groundhopper，追求既係一種親身體驗，而非著重比賽水平或者強弱勝敗。
比賽當日其實有點急就章，因為本來預計要花上一整天清理新居裝修後堆積響車房既一大堆雜物而冇諗過入場，幸得新認識既香港朋友仗義相助合力快手完成，加上離球場只係十數分鐘車程，咁咪入場囉。
作為業餘球會參與業餘聯賽，球場設備陽春就梗架啦，戰情亦稱不上緊湊，絕大部份時間都係球來球往鮮有具威脅埋門機會 (從在地球迷口中得知我井 (即係the Wells，主隊既暱稱) 今季踢法本來打算以地面組織為主，奈可近來成日落雨場地又爛所以不得不改踢高Q大棍)，直到客軍有球員食紅牌踢少個之後，主隊去到完場前幾分鐘先把握到一個反擊機會由全場不停走動但又帶點獨食既前鋒Festos Kamara打破悶局贏波，亦總算相信係全場286個觀眾入面既兩個東方人面孔 (係呀我幾乎每次都的埋老婆入場多謝內子一直陪我任性仲要個日又凍又大風又未食飯又剩) 不致成為黑腳。
至於全場最享受既地方係咩？就係完場後去到場邊同主隊球員逐個握手打氣，這就是grassroot football最吸引之處，此刻無價。
Let’s kick start and off we go!
入場開支：
門票 - £8
飲食 - 約£20 (Burger同Hot dog以球場水平計算不過不失，但杯咖啡真係平淡如水囉)
見證在地球隊贏波 - priceless
