威利大叔　英倫出征

27/08/2026

上得facebook，好多時都會睇番當年今日。仲記得一年前，經歷咗最荒謬嘅一次考車失敗。當日明明發揮正常，但喺考官吹晒黑哨，狂俾minor嘅情況下，冇衰serious/dangerous都居然會fail。

但係嗰次失敗，反而令自己意志更加堅定，知道好快就會考到牌。亦係嗰次之後，下定決心再轉場考，加上以當時嘅技術嚟講，已經有信心唔需要再聽啲九流師傅老點，可以用自己嘅方法練車。結果兩個月後，終於喺呢個試場考到牌。

今朝心血來潮，舊地重遊，一早見到好多學神去報到準備考試。突然諗起，自己pass嗰日，好似都係大概呢個時段考嘅。不過佢哋今日應該難捱，因為冇幾耐就開始滂沱大雨。仲記得舊年唯一一次喺雨中考車，係災難級嘅演出，事後仲俾個官踩到一棟都冇，批評我表現同合格水平仲有一大段距離。

一年前考完車之後，師傅車我行M1返屋企途中，突然間傾盆大雨。我同師傅講，呢個係天怒人怨嘅象徵。有趣嘅係，考到牌之後，頭兩次揸比較長途嘅車，又係橫風橫雨。不過當時已經學識揸慢少少控制好架車，就算行motorway都冇嘢需要緊張。

為咗準備週末出門，今日再上M1練車，可能有成個幾月冇試過長時間落雨，呢度唔少人仲未識tune番心態揸車。除咗識得著細燈開水撥，仲係當自己好似好天揸車咁，吓吓跟到貼一貼。但只要唔理其他人點，專心堅守自己陣地，揸慢5-10 mile之餘盡量死守慢線，仲有時刻同前車保持四秒距離，有車推尾就再揸慢啲甚至落brake，自然做到來去自如。

練完車，都係時候食番個早餐獎勵自己！

#生活隨筆 #練車 #當年今日

19/08/2026

考四次都肥又唔係世界末日嘅
當年我都考咗唔止四次啦
🙃🙃

本港歌手Gareth T.（湯令山）近日在社交平台公開自己的駕駛考試成績，一口氣上載4張顯示「不及格」的成績單。面對再次失敗，他亦只好引用自己歌曲《早到的U》一句「媽的，又是這樣」自嘲，引起網民熱烈討論。事件更獲得Uber官方親自回應。Uber在Instagram Story轉發，並標註湯令山寫道「坐返後座，對大家都好🙏🏻」。

湯令山今次「四連肥」，最應景的可能正正就是其代表作《早到的U》。歌曲以日常生活中事與願違的「莫非定律」為主題，故事講主角原本打算趁心儀對象上車前向佢表白，事前更算好時間、彩排好對白，偏偏到最需要時間的一刻，車卻提早到達。

歌詞中的「剛要開口，你的uber居然已經在」、「沒見過uber會早來」，令原本精心設計的表白計劃瞬間泡湯；之後再以「帶了傘，雨就不來」、「過隧道，電話就來」等情境，道盡人生總是在最意想不到的時候跟自己作對。

結果今次現實中的湯令山似乎亦逃不過自己筆下的「莫非定律」。洪嘉豪看到好友連續4次考車失敗後，隨即在留言區將《早到的U》改詞：「考了車，牌就不來。肥4次，陸續有來」，完美接上原曲「帶了傘，雨就不來」的格式，隨即引來大批網民加入改詞行列。

由「Uber居然已經在」，到如今「考了車，牌就不來」，湯令山多年後竟親身演繹另一版本《早到的U》。至於第5次考車能否打破「莫非定律」成功合格仍是未知之數，在車牌真正到手之前，至少Uber還是會來。

--------------------
記得Follow埋我哋後備IG .news2 呀！

19/08/2026

有時覺得，可以冇穿冇爛跑完一課，其實已經應該要感恩。噚日朝早，風聞一位當年曾經喺田徑區賽見過面嘅長跑界前輩不幸撞車。據了解，就係因為另外嗰位的士司機睇錯線導致意外發生。好在嗰位前輩並無大礙，唔會影響到佢嘅訓練。

其實呢，考到車牌呢大半年，都見過唔少馬路炸彈。好似片入面中線嗰兩架車咁齊齊衝燈，搞到一位過馬路嘅行人都要避開佢哋。揸車唔睇燈衝燈，其實仲危險過行行吓以為紅燈停低。正如有啲以為自己揸車經驗豐富嘅人，成日滿口歪理，話咩揸車揸得慢一樣危險。但當你同佢講假如超速，自己實大機會炒車；但揸得慢，起碼自己唔會炒。佢哋就一定會荷蘭叻上身，當你啲point睇唔到。

而家唔再係學神，自己揸車嗰陣比以前係大膽咗，開始夠膽盡量追speed limit。但當自己行緊speed limit，仲俾後面推尾嘅話，我會毫不猶豫即刻收番慢啲。正如highway code話齋，後車跟得太貼，最適當嘅做法唔係揸番快啲，而係要拉開同前車距離。咁唯一嘅方法，就梗係再收慢啲啦。你永遠唔知條路盡頭係咪真係冇車，喺假設前面一定仲有車嘅前提下，有理冇理收慢啲就最穩陣！

#生活隨筆 #練車 #人冇事先做到世界冠軍

18/08/2026

[倒數兩個月]

仲有兩個月就要出戰全馬，係時候將訓練升級。上星期summer league跑8K，喺酷熱天氣下仍然可以上返全盛時期八成水平，今日天氣涼番，就試吓走一轉半馬，睇吓仲有幾多狀態。太耐未跑過呢個距離，身體仲需要時間適應。所以一feel到隻腳唔係好對路，就會收一收慢，jog番順咗先再加速。最後無驚無險，sub2跑完隻半馬。

其實揸車同跑步一樣，適當時候就要俾啖油去，適當時候就要收油拖波， 唔駛吓吓大腳油又大腳brake，咁樣個brake皮，甚至係極力子都襟捱啲！

#運動分享 #長跑

18/08/2026

世界盃完結一個月，但相關具爭議嘅話題從來未停止過。由賽事擴大比賽規模後，多咗好多連名都冇人聽過嘅垃圾入去濫竽充數；到賽事進行期間，衛冕冠軍阿根廷喺淘汰賽階段多次被指靠球證幫，保送入決賽；到賽事完結後，國際足協會長一度提出進一步增加決賽週隊伍數目，並且將賽事變得更商業化，引發各大洲部份足協威脅抵制未來包括世界盃在內嘅國際足協賽事，有成員國甚至考慮對會長提出不信任動議。而國際足協部份高層亦公開批評會長獨斷獨行，喺提出呢啲構思前冇徵詢過其他高層意見。

終於，今朝睇到新聞，其中一位曾經批評佢嘅高層已經解僱。所以話，解決提出問題嘅人，問題就唔存在。呢個理論，放之四海皆準！

#運動分享 #足球 #國際足協 #恩芬天奴之亂 #成個足球運動俾你搞彎晒啦

15/08/2026

[工黨又殺到嚟？]

噚晚收到喺英國以嚟第二次全國電話警報，當時喺餐廳食緊嘢，左右隔離都有警報聲響起，有人仲以為係咪餐廳火燭。事實上，警報內容的而且確係提醒公眾，近日高溫容易引致山火，呼籲市民盡量避免一啲「惹火」嘅行為。

可能有啲在英港人覺得當局小題大做，連呢啲嘢都要煞有介事咁出警報。但個人認為，呢啲措施總好過某啲地方嘅政府，最初引入警報系統，首次廣播就講埋晒啲風馬牛不相及嘅嘢。然後一個死咗二百幾人嘅火災，就提都唔提吓。

無論如何，警報響完，今日太陽都係照常升起。所以一早起身去完parkrun做義工，再去打羽毛球，然後又食餐好嘅。記得上一次聽到呢啲廣播，英國仲係保守黨執政，但而家就變咗工黨入主首相府。隨住近日改革黨領袖被指涉及不當行為，辭職之後隨即宣佈參加補選，並且喺噚日再度當選，呢次變相公投，視為選民表態對佢選擇繼續信任。喺現時工賊亂政，保守黨又唔成氣候嘅情況下，話唔定改革黨喺下次大選後，有機會改變二戰之後，兩黨壟斷執政嘅局面！

#生活隨筆 #工黨殺到嚟 #香港人仲有冇得避

13/08/2026

今日英國最受關注嘅議題，莫過於日蝕。朝早睇新聞報道，倫敦街頭甚至有大批群眾排隊搶購太陽鏡，以便傍晚時份欣賞日蝕。不過我就無暇欣賞呢啲多年一遇嘅場面，因為，我早已另有打算。

今年summer league最後一站，正正喺今日黃昏舉行。近日開始加強訓練，已經有初步成果。今季狀態低迷，多次未能喺40分鐘內跑完。今日一戰，更要面對近年英國最酷熱嘅天氣。但既然移英三年，能夠一次又一次化解種種危機，呢個反而係相當好嘅試煉。喺超過三十度高溫下，竟然造出今季首次sub38嘅成績，實在令人振奮。因為呢個成績，亦同上季平均時間差唔多。

經此一役，今日一口氣刷新三項PB，包括今季summer league嘅PB，以及喺英國呢幾年以嚟，最熱嘅一日去參加比賽。當然，仲有喺最熱嘅一日造出最快時間。我終於可以自行宣佈，I AM BACK!!!

賽後按照跑會傳統，跟其他跑友飲嘢，順便慶祝某位跑友生日！

#運動分享 #長跑

08/08/2026

終於達成咗呢個目標。

過去一年，有太多繁瑣嘅事要掛心，拖拖拉拉咗八個幾月，總算突破百次parkrun大關。下一個里程碑，單睇數字都要大約三年先做得到，路途可謂非常遙遠。簡單啲講，就係最快都要入咗籍之後先能夠完成。

點都好，多謝跑會有師兄介紹我嚟呢個場挑戰自己，仲有咁多跑友陪我慶祝完成呢個里程碑。完成之後，自然少不了食個靚早餐慶祝啦！

#運動分享 #長跑

07/08/2026

世界盃已經曲終人散，新球季亦即將展開。但最近收到家鄉寄嚟嘅呢份包裹，又再勾起唔少回憶。

時間返到去2022年12月，當時世界盃進行得如火如荼，美斯帶領阿根廷一路過關斬將，最終喺眾望所歸下擊敗衛冕冠軍法國，完成咗佢職業生涯獎項中最後一塊拼圖。之後買咗呢件波衫，就係為咗紀念呢個歷史時刻。

呢件波衫，帶俾我嘅唔止係回憶，背後仲有唔少人生哲學。話說當年，唔少球迷預計美斯參賽五次，終於圓夢後，會光榮引退，為國家隊生涯劃上完美句號。仲記得嗰個月頭，首次喺田徑區賽5000米登基後，就打算仿傚佢，為自己區賽生涯留個美好回憶。所以之後幾站嘅區賽，只專注其它分齡項目，唔再參加5000米。而呢面金牌，亦成為區賽生涯最後一個冠軍。

除咗運動競技，佢喺人生態度同樣帶俾我一啲啟發。當年決賽前夕，睇咗一啲關於佢鮮為人知嘅私生活嘅新聞文章，令我靈機一觸，套用番當中佢講嘅一啲對白，最後成功追到當時嘅女朋友。而呢件事，正正就係買完波衫嗰晚發生。

可惜嘅係，世事往往唔係我哋預期之中。美斯喺世界盃正式登基後，令人意外地繼續為國家隊上陣。到底係佢真係咁有自信仲可以再攞一次世界盃，抑或所謂面對國民「盛情難卻」，定係好似佢自己所講「想繼續享受足球」，真正原因無從考究，總之佢就係反口。之後佢先帶領國家隊衛冕美洲盃之餘，啱啱嘅世界盃亦關關難過關關過，連續兩屆殺入決賽。

但呢一次，角色徹底對調。阿根廷被指喺淘汰賽唔止一場靠球證幫先贏到波，對英格蘭更加大踢功夫足球，備受爭議。所以到咗決賽，全世界幾乎一面倒支持西班牙。而最終西班牙亦順理成章，粉碎阿根廷衛冕美夢，第二次捧盃。

由始至終，我都係咁分析，阿根廷呢兩屆世界盃決賽嘅結果，唔係因為眾望所歸。而係一切，都係基於天命。阿根廷上屆決賽贏到法國，係天命所歸。因為法國上一屆係以衛冕冠軍身份參賽，根據賽事已經有超過十屆未試過有一隊可以成功衛冕呢個定律，法國由入決賽一刻，已經注定走到盡頭。而阿根廷喺今屆決賽，全場俾西班牙㩒住嚟砌，最終喺加時打少一個情況下輸波，亦只係順應天命。

完場之後雙方嘅衝突，自然令網民對阿根廷甚至係美斯更加大力鞭撻，話佢哋以為有國際足協支持，就可以無法無天，將美斯踩成地底泥。喺全球網民圍攻下，阿根廷政府甚至效法某啲政權，禁止曾經喺網上發表相關言論嘅外國人入境；而喺國內發表呢啲言論會有咩後果，相信都毋須多講。網上講嘢，好多人都慣咗比較口賤，呢樣嘢我唔打算跟風。公道講句，我唔會因為佢同阿根廷今屆賽事備受爭議嘅表現，就一併否定佢過去廿幾年嘅成就同貢獻。我結論係，可能佢覺得自己身為當今球壇其中一位傳奇人物，與別不同，可以憑藉一己之力，逆轉天命，因而未能夠知所進退。最後搞臭自己個朵，著實令人惋惜。

話鋒一轉，又講番件衫。話說身家運到嚟之後，摷勻晒啲箱都搵唔到件衫。向屋企人再三求證，最近證實原來當年真係執漏咗。如今件衫終於重見天日，但恐怕未必有太多機會再著到出街。正如之前講過，原本打算世界盃期間著去睇波，但深入了解過呢度嘅文化後，反而覺得件衫未到，冇得著出街都算係好事。因為英格蘭同阿根廷係世仇，當地人睇波多數會支持阿根廷對家。記得對埃及嗰場，埃及連入兩球領先，酒吧啲人當咗係自己國家隊咁歡呼喝采。到阿根廷追番一球，甚至最後反cup，忍唔住興奮大嗌，就引嚟唔少不友善嘅目光。有個中年女士，甚至對住我嗌get out。所以對英格蘭嗰日，假如著咗呢件衫出街，莫講話可能酒吧都入唔到，分分鐘仲會喺街俾人打。如今阿根廷已經聲名狼籍，就更不在話下。

順帶一提，有啲過往曾經珍而重之嘅波衫，而家發現當中有部份印字已經爛咗，甚至連衫都開始爛埋。所以話，過去嘅美好，就應該留喺回憶之中。比賽係咁，做人係咁，感情都一樣係。或者我哋都應該要向前看，係時候move on啦！

#生活隨筆 #有感而發 #肺腑之言

05/08/2026

仲有唔夠三個月就要再次出戰全馬，開始有種如箭在弦嘅感覺。今日黃昏，再試吓走轉10K，測試狀態回復咗幾多。跑完之後再會合跑會朋友跑多5K當recovery run，然後再去附近間pub飲番杯。聽佢哋講呢間就嚟唔做轉手，所以有機會嚟到一次得一次！

#運動分享 #長跑