04/09/2026
ጋሞ ጨንቻ በአዲስ አበባ ከተማ ዋንጫ መሳተፉ ለፕሪሚየር ሊግ ዝግጅቱ የጎላ አስተዋፆ እንደሚኖረው ተገለፀ
ለ2019 የኢትዮጵያ ፕሪሚየር ሊግ የውድድር ዘመን ዝግጅቱን በይፋ የጀመረው ጋሞ ጨንቻ እግር ኳስ ክለብ፣ በአዲስ አበባ ከተማ ዋንጫ መሳተፉ የቡድኑን ወቅታዊ ቁመና ለመመዘንና ለሊጉ ብቁ ሆኖ ለመቅረብ ከፍተኛ አስተዋፅኦ እንደሚኖረው ተገለፀ፡፡
ከመስከረም 9 እስከ መስከረም 26 ቀን 2019 ዓ.ም በአዲስ አበባ ስታዲየም በሚካሄደው በዚሁ 20ኛው የአዲስ አበባ ከተማ ዋንጫ ውድድር ላይ ጋሞ ጨንቻ እና አዳማ ከተማ በክልል ተጋባዥነት የሚሳተፉ ሲሆን፤ እንደ ቅዱስ ጊዮርጊስ፣ ኢትዮጵያ ቡና፣ መቻል፣ ኢትዮጵያ መድን፣ ኢትዮጵያ ንግድ ባንክ እና ኢትዮ ኤሌክትሪክ ካሉ የዋና ከተማዋ ጠንካራ ክለቦች ጋር የሚፎካከሩ ይሆናል።
የክለቡ ዋና አሰልጣኝ ማቴዎስ ለማ እንደተናገሩት፣ ቡድኑን በፕሪሚየር ሊጉ ጠንካራ ተፎካካሪ ለማድረግ የነባር ተጫዋቾችን ውል ከማደስ ባለፈ ከሀገር ውስጥና ከሀገር ውጭ አዳዲስ ተጫዋቾችን በመቀላቀል በቀን ሁለት ጊዜ አካላዊና ስነ-ልቦናዊ ስልጠናዎችን እየሰጡ ይገኛሉ።
አሰልጣኙ አክለውም ይህ ውድድር የቡድናቸውን ዝግጅት ለማጠናከር መልካም አጋጣሚ እንደሚፈጥርላቸው ጠቁመዋል።
ምክትል አሰልጣኝ አበው ታምሩ በበኩላቸው ለሊጉ የሚመጥኑ ነባርና አዳዲስ ተጫዋቾችን በማቀናጀት ጥሩ ዝግጅት እያደረጉ መሆናቸውን ገልፀው፣ ለክለቡ እየተደረገ ያለው ሁለንተናዊ ድጋፍና ክትትል የሚበረታታ በመሆኑ በቀጣይ የውድድር ዘመን ጠንካራ ጋሞ ጨንቻን ለማሳየት ትልቅ ጉጉት እንዳላቸው ተናግረዋል።
የቡድኑ አንበል ወርቅይታደስ አበበ ከዝግጅቱ አስቀድሞ የተሰጠው የስነ-ልቦና ስልጠና በተጫዋቾች ዘንድ ከፍተኛ ተነሳሽነት መፍጠሩን ጠቅሶ፣ የከተማው ዋንጫ ውድድር የቡድኑን አሁናዊ ደረጃ ለመገምገምና ለፕሪሚየር ሊጉ በቂ ዝግጅት ለማድረግ የሚረዳ መሆኑን ተናግሯል፡፡
ክለቡን የተቀላቀሉት አዳዲስ ተጫዋቾችም በጥሩ ተነሳሽነት ከቡድኑ ጋር በመቀናጀት በቀጣይ የውድድር ዘመን የተሻለ ውጤት ለማስመዝገብ ብርቱ ጥረት እንደሚያደርጉ አረጋግጠዋል።
20ኛው የአዲስ አበባ ከተማ ዋንጫ ውድድር መስከረም 9 በአዲስ አበባ ስታዲም በይፋ ይጀመራል።
GAMO TV
በዮሐንስ ባይሳ
