C.B. Condado Senior

25/05/2023

Sábado de basket 🏀🏀💙

05/05/2023

Sábado de baloncesto🏀💙

Vaia tarde de baloncesto nos espera este sábado no Álvaro Pino!
E para que desfrutedes do mellor basket, teremos cantina! Vén apoiar o deporte, vén apoiar ao CB Condado!
O infantil masculino xoga a SEMIFINAL polo título de liga!


🏀🔥💙

11/04/2023

O encontro entre o CB Condado e Seis do Nadal distou moito do partido de ida, no que os vigueses conseguiron poñer terra de por medio axiña para evitar sustos. E precisamente iso foi o partido, un susto, non soamente polo golpe que levou na faciana un dos xogadores dos visitantes que tivo que abandonar a pista de inmediato (agardamos que se recupere sen máis consecuencias).
O CB Condado conseguiu anotar con facilidade dende os primeiros intres, pero replicaban os visitantes. Ós cinco minutos de partido os locais mostraron unha defensa especialmente sólida que xunto cun asombroso acerto en campo rival lle permitiu abrir diferenzas cando se chegaba á conclusión do primeiro cuarto (que terminou 23-14). Un dos primeiros parciais con maior puntuación do CB Condado en moitos anos.
Estaba sendo un partido moi completo dos locais, e o segundo cuarto seguiu esa senda, no que acadou diferenzas superiores aos dez puntos e que mesmo semellaba que o partido podería romperse definitivamente e asaltar rendas superiores aos 15 puntos en calquera momento. Pola contra, pese á superioridade do xogo, non logrou materializar varios tiros sinxelos e unido a 3 perdas case consecutivas os visitantes lograron chegar ao descanso cun resultado que non deixaba o partido resolto, nin moito menos: 36-28.
Á volta dos vestiarios o partido cambiou de súpeto o seu rumbo, e as condicións físicas do Seis do Nadal asfixiaron moitos ataques dos locais e provocaron precipitación e perdas en moitas xogadas. Este cuarto foi o único no que o CB Condado mostrou certa debilidade defensiva, mais foi suficiente para reverter o partido: 13-25, que deixaba un apertado 49-53 no luminoso.
A propia tendencia do partido, xunto coa superioridade física favorecía aos visitantes que non tardaron en abrir vantaxes próximas aos dobres díxitos. As transicións rápidas, xunto co acerto dende a liña de 3, de dous dos seus xogadores resultaron difíciles de deter (9 triplas anotaron entre ambos xogadores). Pero o equipo tirou de actitude e calidade para manterse vivos e mesmo ter unha posesión para empatar o partido a falta de pouco máis dun minuto. Finalmente todo quedou no susto que os locais lle deron ao Seis do Nadal: 66-70. Unha resolución agridoce, que pese a ser unha derrota ten aspectos positivos como a mellora no acerto ofensivo e principalmente a solidez ofensiva amosada na primeira parte. Ademais hai que destacar o bo ambiente do que se gozou nas gradas, cun bo rexistro de afeccionados e moita entrega por parte dos mesmos.

04/04/2023

Trala mala imaxe dada fóra da casa nos últimos cuartos do partido contra o Seis do Nadal, o Condado voltaba a xogar na casa contra o Salceda a última xornada da primeira Volta.
Dende o comezo do partido o equipo logrou mellorar a defensa, facendo que, aínda que non se anotará con facilidade, o partido sempre estivera competido e se decantase cara o lado local.
No segundo cuarto ambos equipos anotaron con facilidade sabendo aproveitar as súas fortalezas en ataque aínda que sempre con parciais positivos para o equipo local que se foi distanciando pouco a pouco.
Os dous últimos cuartos foron bastante parellos en cuanto a anotación de ambos equipos pero sempre a favor do condado o que fixo que se transitara sempre con diferenzas ó redor de 20 ptos a favor dos locais con máximas de ata 27 ptos.
Aproveitando estas circunstancias o equipo foi recuperando boas sensacións para o partido seguinte fóra da casa mentres o marcador remataba cun abultado 70-48.
Tras esta victoria con boas sensacións o Condado tiña o obxetivo de dar unha boa imaxe tamén fóra da casa e seguir coa boa dinámica presentada nos partidos como local.
O partido contra o Illas Cíes comezou con dous bos cuartos por parte do condado nos cales logrou non perderlle a casa ó partido e competilo a pesar das pequenas vantaxes locais que ameazaban con rompelo partido. Así o encontro chegou o descanso cun marcador a favor do equipo local pero cun Condado moi preto e dando unha boa imaxe.
Todo o acontecido anteriormente viuse abaixo nos últimos cuartos, xa que o equipo foise do partido por falta de concentración e por protestas de diferentes decisións abitrais e, ainda que por momentos defendeu ben, un moi mal ataque durante este tempo penalizou demasiado o equipo visitante no que so anotou 3 e 7 ptos respectivamente. Esto fixo imposible, non só lograr a victoria, senon tamén poder competir ata o final o partido xa que de estar igualado o partido o descanso, o equipo local chegou a ter vantaxes de máis de 30 ptos, rematando o encontro cun estrepitoso 60-30 o favor do Illas Cíes.

24/03/2023

🏀🏀💙

Horarios da xornada! A partir desta finde comaprtiremos tamén os horarios do noso senior masculino!🏀💙

24/03/2023

Despois dun tempo de inactividade votamos para contar como foi ata agora o camiño do noso equipo o longo do que vai de segunda fase.
Esta etapa comezou co enfrontamento a finais de febreiro contra o Illas Cíes na casa.
O partido comezou cun nivel moi alto en ataque por parte de ambos conxuntos, o que fixo que o marcador fora moi parexo durante todo o primeiro tempo con vantaxes mínimas por parte dun e outro equipo que rápidamente voltaban a igualarse, onde o que premiarán eran os bos ataques, xa que por parte de ambos conxuntos a defensa era case inexistente.
O terceiro cuarto foi o punto de inflexión do partido, onde o equipo local logrou manter o alto nivel anotador o mesmo tempo que conseguía encadear boas defensas e robos continuos o que se viu reflexado cun parcial a favor do condado de 29-7 que case deixou sentenciado o encontró con diferenzas máximas de ata 18 ptos.
Ainda que o Illas Cíes tratou de remontar o encontro e o equipo deixou se levar non lograron empatar o partido a pesar de que se aproximaran no tramo final deixando un marcador moi axustado de 68-64 con que o condado logrou a súa primeira victoria nesta fase.
Tras este bo comezo, o equipo tivo que visitar o pavillón sempre complicado do Seis do Nadal.
O condado competiu ben durante os dous primeiros cuartos do partido cuns marcadores moi parexos no que o equipo logrou ir atopando solucións ás diferentes alternativas que lle propuxo o equipo local, así, chegouse o descanso cunha gran igualdade no marcador.
Sen embargo, así coma no partido anterior o equipo saliu concentrado e logrou despegarse no marcador, nesta volta non só non foi capaz de facelo, senon que, entre a presión constante do equipo local e o cansancio, fixeron que se sentenciara o encontro cun parcial de 26-8. O último cuarto foi un mero trámite no que o Seis do Nadal non baixou o ritmo logrando cada vez máis distanza cun marcador final de 78-42.

25/02/2023

O Club de Baloncesto Condado terminou a súa primeira fase da competición cun sabor agridoce.
O equipo retomou a senda da victoria no seu penúltimo partido de liga regular contra Os Sauces, nun encontro moi serio.
Tras un primeiro cuarto bastante igualado con boas accións dos dous equipos, tanto en ataque coma en defensa, os locais lograron despegarse no marcador pouco o a pouco, máis polo mérito das accións defensivas que pola eficacia dos seus ataques. Así logrouse unha pequena fenda grazas ó parcial do segundo cuarto de 13-9 para os locais, que supuxo que o luminoso indicase unha vantaxe de 5 ptos ao descanso.
Despois do descanso o equipo volveu excesivamente relaxado, propiciando a remontada dos Sauces, que se achegaron no marcador gracias a un gran terceiro cuarto que lideraron por 13-16. A presenza tan presto do equipo visitante non fixo temblar ó equipo no derradeiro cuarto e soubo xestionar a súa renta mediante ataques fértiles e defensas sólidas, para acadar o resultado final de 61-52.
Todo grazas a un grande traballo colectivo no que destaca a aportación anotadora do noso xogador Jaime Muñoz con 20 puntos para liderar a victoria.

Despois da boa imaxe deste partido o equipo non soubo manter a boa dinámica acadada a fin de semana anterior coma local e caeu cun marcador contundente no pavillón do Porriño ante o PBB C.
Tras unha primeira metade caracterizada pola baixa anotación visitante, e pola súa incapacidade para frear a ofensiva local, cheguose ó descanso cun parcial xa case listo para sentaza de 41-22.
Pese a que o equipo saíu do descanso con outra cara e tratou de competir, a diferenza xa era insalvable. E tanto o terceiro coma o derradeiro cuarto tiveron parciais moi similares entre ambos equipos, pero sempre agrandando a distancia do marcador. Sen deixar prosperar a mínima sensación de esperanza para achegarse no marcador.
Despois disto tocou descansar aproveitando as festas de carnaval e mentalizarse para afrontar a segunda fase da competición onde se volve a partir de 0. Este sábado as 20h no pavillón de ponteareas terá lugar a primeira xornada desta nova fase. Esperámosvos.

03/02/2023

O CB Condado saíu derrotado da súa visita ó líder da liga. O partido foi disputado durante moitos intres do mesmo, pero o Rías Baixas acabou demostrando o motivo polo que lidera a táboa.

No primeiro cuarto o CB Condado comezou enchufado, especialmente na faceta defensiva e ameazou con dar a sorpresa tras manter unha pequena vantaxe durante case 10 minutos. Só no último minuto puido recortar a diferenza Rías Baixas e concluír o cuarto nun empate a 15 puntos, que os locais sumaron principalmente no rebote ofensivo e os visitantes no lanzamento exterior.

O segundo cuarto transcorreu á inversa do anterior, era o Rías Baixas o que manexou esa pequena vantaxe que rondaba os 5 puntos durante moitos minutos. Pola contra, unha tripla no último minuto e un roubo que finalizou nunha bandexa á contra no derradeiro segundo de posesión, permitiu ós locais encarar o descanso con 10 puntos de marxe: 37 – 27.

Á volta do descanso o CB Condado realizou un intento por meterse novamente no partido, pero os locais abriron máis a fenda. Pola contra, uns bos minutos finais, reducir a diferencia e estabilizala en torno ós 8 puntos. Os derradeiros tres puntos do cuarto foron para os locais, que deixaron un 15-14 á fin dos dez minutos.

O partido estaba aberto, pero no último cuarto os líderes da liga amosaron as armas coas que acadaron tal posición e superaron ó CB Condado sobre todo no aspecto físico. Castigando as perdas dos visitantes e cunha inesgotable presión incluso no ocaso do cuarto.

Finalmente, 74 – 50, que agocha unha intrahistoria ben diferente á comodidade que suxire o luminoso.

O CB Condado saíu con boas sensacións do pavillón do Berbés e intentará prolongar este estado competitivo. Este sábado ten a oportunidade de demostrar a súa progresión fronte Sauces, que visitan ós ponteareáns.

27/01/2023

O CB Condado sofreu unha avultada derrota ante un dos favoritos para o ascenso. A pesar da contundencia do marcador, o equipo ficou contento coa súa posta en escena.

O primeiro cuarto comezou cun intercambio de golpes moi apertado, pero aos locais se lle atragoaron os derradeiros cinco minutos do cuarto, no que soamente conseguiron anotar nunha ocasión. Uns minutos que o Nigrán aproveitou para volver adiantarse e abrir unha vantaxe tranquilizadora: 11 – 22.

O segundo carto supuxo unha reacción, e o partido volveu ao intercambio de golpes do primeiro carto, con bastante acerto e con maior éxito no rebote ofensivo que no defensivo para ambos equipos. 18 – 20 á fin do segundo carto, que deixaba un 29 – 42 ao descanso.

O inicio do terceiro período resultou esperanzador, e o Condado acariñou o peche da brecha psicolóxica dos dez puntos durante moitos minutos. Pero unha decisión allea ós xogadores (decisión que non serve como escusa, mais si como explicativa do devir do partido) acentuou a frustración dos locais, que saíron absolutamente do partido. Despois desta xogada, o Nigrán conseguiu incrementar máis de 25 puntos a súa vantaxe en apenas 10 minutos, e o resultado é incongruente coas sensacións do equipo.

Finalmente, o resultado foi 49 – 86 favorable ao Nigrán, que segue vivo na loita por conseguir o liderado.

20/01/2023

O CB Condado non conseguiu repetir vitoria e sucumbiu en Vigo, nun partido moi disputado fronte Rodaballo.

Os locais xestionaron durante case todo o encontro unha lixeira vantaxe que souberon manexar para controlar o ritmo do partido.

O primeiro cuarto caracterizouse pola intensidade defensiva e a escasa efectividade de ambos equipos. 10 – 7 á conclusión dos primeiros 10 minutos. Exactamente igual transcorreu o segundo cuarto, que tras finalizar 10-9, deixou un marcador de 20-16 no descanso. Un resultado que evidenciaba a falta de acerto dos visitantes, que no primeiro cuarto erraron as primeiras 8 triplas que lanzaron. O ritmo era moi pausado, con ataques largos, sobre todo dos locais, e poucas transicións e puntos ó contragolpe.

No terceiro cuarto, tras un inicio que supuxo unha fenda de 11 puntos para os locais que resultou efémera, o CB Condado comprendeu que debía asumir riscos e acelerar a velocidade do xogo. O partido abriuse e ambos conxuntos atoparon vías de anotación. Tras un bo parcial dos visitantes, o cuarto terminou 19-19, o que significaba que a vitoria pasaba por remontar os 4 puntos de desvantaxe.

O derradeiro asalto comezou de maneira esperanzadora para o CB Condado, que con boas accións defensivas conseguiu adiantarse no marcador sobre o ecuador do cuarto. Pola contra, a partir dese intre, o Rodaballo impuxo novamente o seu ritmo de xogo e controlou os intres finais. 53-44 foi o resultado final.

En conclusión, foi un partido serio, especialmente en defensa. Pero quizais o peor da tempada en canto a acerto. Unha porcentaxe moi pobre na media distancia, e alarmante máis aló do perímetro (incluso en tiros liberados).

Só queda traballar para reverter estes datos e mellorar de cara ó vindeiro desafío, fronte o Nigrán.

13/01/2023

💙🏀

13/01/2023

40 ANIVERSARIO CB CONDADO

O domingo oito de xaneiro celebrouse no pavillón Álvaro Pino o corenta aniversario do CB Condado.
Persoalmente, creo que foi algo máis que un aniversario. Foi unha proba de cambio. Eu xogo no Condado dende cativo, cando comecei debía ter uns 10 anos, eramos a categoría máis pequena da escola e soamente podiamos xogar partidos amigables os venres no pavillón do Porriño contra equipos non federados.
Cumprín anos e transitei categorías, todas, unha por unha, cun fenómeno constante. A xente marchaba. E pouco a pouco, da xeración coa que comecei non quedaba ninguén. O que destacaba quería marchar a outros equipos e o que non marchaba, terminaba a tempada canso do baloncesto e abandonaba o club. Despois de varios anos na escola, o primeiro ano de cadetes quedamos case sen xente e non puidemos federarnos. No meu segundo ano de cadetes emerxeu unha nova xeración, cun par de rapaces que empezaban no baloncesto e subindo incluso algún infantil para facer o equipo. Eu era o único cadete de segundo ano. Nos primeiros compases da tempada semellaba o de todos os anos, un equipo condenado a ocupar os derradeiros postos da táboa clasificadora. Pero non foi tal. Aquel ano ascendemos. É algo que me enche de orgullo. Aquel equipo ascendeu. E os rapaces de primeiro ano (case todo o equipo) e mesmo os infantís poderían xogar en primeira o ano seguinte. Un fito para o noso club. A min non me emocionaba ascender, o que me ilusionaba era facelo no Condado.
O seguinte ano eses mozos desfrutaron a categoría, e ó seguinte marcharon todos. Non quedou ninguén. Coma sempre pasou. Por que marchaban? Porque vían opcións de ser mellores, de xogar en equipos moi competitivos. E eu sempre me preguntei: por que non facelo aquí? Por que non facer do CB Condado un equipo mellor? Por que marchar cada un na procura de obxectivos individuais en vez de unir o noso compromiso para facer do noso club o que buscamos máis aló?
Pasaron os anos e entendín o motivo. Xa sei por que a xente fuxía cando destacaba. Xa o sei. Polo apego, polo sentimento de pertenza a un proxecto. Todos marchaban en busca do que eu vivín por primeira vez en máis dunha década que levo no equipo, o domingo oito de xaneiro.
Unha familia implicada, unha afección entregada, unha morea de nais e pais alentando as motivacións dos seus fillos. Unha chea de nenos orgullosos de pertencer ao CB Condado.
Esta xornada significou para min a proba do cambio. Un club comprometido en evolución, que organizou un evento magnífico que involucrara a todos os responsables deste cambio. O domingo foi máxico, porque xuntou a pais e nenos, adestradores e organismos públicos, a todos os que impulsan ó CB Condado para se converter nunha escola que alimente a paixón de tantos cativos.
E neste ambicioso proceso, dende a posición de xogador do sénior, creo que aínda temos unha conte pendente. Non tratar o sénior como un apéndice da escola, senón como a culminación do proceso formativo. Como unha porta de ilusión que se abre ao completar a viaxe polas distintas categorías do equipo.
En definitiva, síntome orgulloso e agradecido por toda a xente que se achegou a desfrutar e animar o evento. Agradecido por toda esa xente, e tamén pola homenaxeada. Por esa xeración que non se conformou con crear un equipo de baloncesto no pobo, senón que se comprometeu a mantelo, como Pepe. Creo que é vital para a identidade dun club, promover a intrahistoria dos causantes da orixe.
Non se poden recoller froitos sen regar a raíz. As follas caen, as xeracións pasan, pero todos medramos sentíndonos parte dunha mesma árbore.