30/09/2026
COMUNICADO OFICIAL
Despois de moito tempo soportando coaccións, ameazas, denuncias que desaparecen e un constante silencio e desleixo administrativo, a situación alcanzou un novo nivel de gravidade co ataque e os danos ocasionados no noso material de traballo, que empregamos principalmente no desenvolvemento de actividades con nenos e nenas.
A pesar do esforzo, a constancia e a dedicación postos nun proxecto que naceu da iniciativa dunha moza emprendedora e traballadora, comprometida co medio rural e coa creación de actividades para os máis pequenos, parece que esta iniciativa non esperta o interese nin recibe o apoio que merece a nivel local. Pola contra, levamos tempo sufrindo situacións de presión e acoso que dificultan gravemente a continuidade do noso labor e que parecen ter como finalidade o seu desgaste e desaparición.
Ante a gravidade dos feitos e co obxectivo de garantir a seguridade das persoas, así como a adecuada conservación dos nosos recursos materiais, comunicamos que o centro permanecerá pechado ao público ata novo aviso.
Durante este período, unicamente se desenvolverán actividades dirixidas ás persoas socias do club e aquelas que conten con reserva previa, quedando a admisión suxeita ás condicións establecidas pola organización.
Lamentamos profundamente ter que adoptar esta decisión, especialmente polo impacto que supón para os nenos e nenas, as súas familias e todas as persoas que confiaron neste proxecto.
Agradecemos o apoio, a comprensión e a confianza de todas as persoas que, día tras día, contribúen a que esta iniciativa siga adiante.
Seguiremos defendendo o noso traballo, o noso proxecto e o noso dereito a desenvolver unha actividade digna no rural.
Atentamente,
A Dirección do Centro
