03/11/2026
📰Celanova acollerá o I Memorial José Luis Conde de BXL “Un legado que inspira”
A Asociación Cultural e Deportiva Basket X Libros Celanova, en colaboración co Concello de Celanova, organizará o domingo 20 de decembro o I Memorial José Luis Conde. Un torneo que nace coa vocación de repetirse cada ano para honrar a memoria dunha persoa moi querida na vila e que tristemente faleceu o pasado 12 de agosto.
Dende BXL sinalan que José Luis Conde foi unha figura clave na fundación do ACD BXL Celanova, non só polo seu patrocinio, senón tamén pola súa axuda permanente e desinteresada en calquera iniciativa e actividade do club. Dende o Concello, o alcalde Antonio Puga , fixo propios eses mesmos sentimentos e valorou de xeito moi positivo a iniciativa de BXL para honrar e recordar a unha persoa que, ao longo da súa vida, foi exemplo de compromiso desinteresado co todo o pobo de Celanova.
O evento, que contou coa axuda da Federacion Galega de Baloncesto e a implicación da ADCE Diogo Cão (Vila Real Portugal) consistirá nun dobre partido da categoría cadete, en masculino e feminino, que enfrontará os equipos do club celanovés co Diogo Cão.
A cita será o 20 de decembro de 2026, a partir das 16.00 horas, no Pavillón das Triguerizas de Celanova.🏀⛹
