05/12/2025
رسالة من مدرب كاراتيه..
زمان كنت بنبه على أولادي (لاعيبتي) يتجنبوا المشاكل ويبعدوا عنها.. لحد لما المشاكل بقت بتجيلهم لحد عندهم، ومن غير مايعملوا حاجة.
فبدات أطلب منهم يدافعوا عن نفسهم بمجرد انهم يبعدوا الأذى عنهم.
للأسف حتى ده مبقاش كفاية، قصاد عيال (لا يتجاوز أعمارهم ٨ سنوات) مشفوش تربية، لا هما ولا أهليهم، عشان انت لو فكرت تروح تشتكي لأهله هتقوم خناقة هتنتهي بكارثة.
فرسالتي للأهالي المحترمين.. اللي محتارين يعملو ايه لما ابنهم يتعرض لموقف زي ده.. للأسف
كل اللي هتعمله بعد الموقف، ملوش لزوم.. خليك في قبل الموقف هتعمل ايه..
١. هتقعد وتتكلم مع ابنك (من سن ٧ سنوات) عن طبيعة الأولاد اللي بيتربوا في الشارع، وانهم بيخلقو مشاكل مع أي واحد حاسين انه أحسن منهم.
٢. هتفهمه ان بعده عنهم وتجنبهم مش خوف ولكن عشان هوه عنده هدف ومش لازم يعطلوه يوصل لهدفه.
٣. لكن لو حد منهم اتعرضله يحاغظ على مسافة بينه وبينهم، ولو قلت المسافة دية وبدأ يبان عليه تعبيرات المشاكل، أو خرج منه لفظ سيء.. يدفعه بقوة بإيديه الاثنين عشان الولد يخاف منه.
٤. في حالة إن الولد ده مؤذي وماسك حاجه في ايديه، فمينفعش تخلي ابنك يستنى لما يستخدمها، وقوله باللفظ كده، انزل بايدك الاثنين على وشه، ومتخفش مش هيعوره بس خليه ينشف ايده عشان الولد ده يخاف منه.
ضروري قوي تفهم ابنك ان دية خطوات ولازم يتبعها، وتأكد عليه إن طفل الشارع ده (جبان) عشان كده بيعلي صوته وبيشتم وبيمسك في ايده حاجه يعمل بيها مشكلة، ولكنه ضعيف.
وأخيرا مش هقولك ودي ابنك يلعب (كاراتيه) لإن الكاراتيه مبيعلمش الضرب ولكن بيكون شخصية، وده ممكن مش تلاقيه عند أي مدرب، إلا لو سألت عليه وإتأكدت إنه تربوي.
خمس دقايق مع ابنك هتحميه من مصايب الشارع.. وهتحميه من أي اضطراب نفسي هيحصله لو تعرض لبلطجة وعنف الشارع.
توقيع: مدرب وأب خايف ومرعوب على أولادنا.
شادي ثابت سينسيه
