27/08/2026
في فئة قليلة من أولياء الأمور، مشكلتهم مش مع مستوى ابنهم ولا مع طفل تاني
مشكلتهم بتكون معاك أنت شخصيا كمدرب 🙂
تلاقيه في البداية معاك، ومكمل، وبيثق فيك، ومبيقطعش التدريب نهائى
لكن أول ما يشوف طفل تاني بدأ يظهر بشكل أفضل، أو ياخد اهتمام، أو تسمع عنه كلمة حلوة وانضم لنادي … تلاقي معاملته اتغيرت
فجأة تحس إنه متضايق منك أنت، مش من الموقف
تبدأ تلاحظ في كلامه، في نظراته، في تصرفاته وبيكون فيه جواه حاجة مش بيقولها
يبدأ يدور على مدرب تاني، ويسأل هنا وهناك، ويحاول يشوف بديل، وفي نفس الوقت ميسيبكش برده!
ليه؟
علشان يفضل متابع، ويشوف ابنه هيفوته إيه، ومين ممكن يطلع أحسن منه
وفي نفس الوقت يفضل شايل جواه إحساس بالغيرة والضيق منك
وأنا بصراحة أكتر حاجة بستغرب منها إنك ممكن تحس باللي جواه من غير ما يتكلم كلمة واحدة
يفضل موجود معايا، ويبقى من جواه شايل مني لمجرد إن طفل تاني نجح أو ظهر بشكل أفضل
أنا كمدرب دوري إني أشتغل مع كل طفل عندي، وأفرح بتطور كل واحد فيهم، ومش مطلوب مني أضعف طفل علشان ولي أمره يحس إن ابنه مش هو الوحيد اللي لسه فى نفس الظروف او المستوى
نجاح طفل تاني مش تقليل من طفل تاني
وتطور غيره مش معناه إن ابنك فشل
اللي بيدور فعلا على مصلحة ابنه، بيشجع ابنه
مش بيحقد على المدرب علشان شاف طفل تاني بينجح
