11/05/2023
خرافات فـ الدايت والتمرين:
1- طالما بتتمرن يبقي تاكل براحتك!
_ دا غلط، تظبيط الأكل والبرنامج الغذائي أهميته 70% والرياضة 30% عشان توصل للي أنت عايزه.
2- تمارين البطن بتخسس البطن!
_ دا بردو غلط، أي تمرين بيستهدف العضلة وليس دهون المنطقة، يعني عايز أخسس البطن هعمل دايت وكارديو وهتمرن عادي.
3- بلاش تشيل حديد عشان لو بطلت هتتحول لدهون!
_ طبعًا أنسجة العضلات غير أنسجة الدهون
4- مينفعش نشرب ماية فترة التمرين!
_ كذلك دا كمان غلط، لازم إزازة ماية معانا وقت التمرين عشان نعوّض الماية اللي بتخرج أثناء التمرين، دا غير إن 70% م العضلة ماية أصلًا.
5- تمارين تخسس مناطق معينة فـ الجسم!
_ مفيش حاجة اسمها كدا، مفيش تمارين معينة بتخسس منطقة معينة، الدهون بتنزل بالدايت ثم الدايت ثم الكارديو.
6- تيجي بنت تقول لاء مش هشيل حديد عشان ميطلعش عضلات!
_ طبعًا مش محتاجة أقول إن دا كمان غلط، الولاد ذات نفسهم بيطلع عنيهم عقبال ما يطلعلهم عضلات، وطبعًا هرمونات جسم البنات غير جسم الولاد، الأوزان هتخلي جسمها مشدود؛ لإن في فرق بين العضلات وبين البروز العضلي، البنت بتعمل عضلات بسيطة عشان تشد جسمها، لكن الولاد بيحصل بروز عضلي.
