01/02/2021
منقوله من دكتور كان حاضر مجزرة بوريهود 💔
زي النهارده من 9 سنين..كنت واقف فالطواري..كنت خلاص بشطب سنه الامتياز بتاعتي..
الدنيا الوقت ده كانت هاديه علي غير المعتاد فالفتره دي من اليوم..
وقفت ادردش مع كاتب الاستقبال شويه..كان كلامنا كله ان اليوم هادي والشغل قليل
-هو انت ماتعرفس ولا ايه دكتور .النهارده ماتش الاهلي والمصري..البلد كلها فالاستاد هناك م الصبح"
:اه صح..ده انا ناسي خالص انه النهارده! ولا حاحه فكرتني اصلا..انا حتي معدي من ادام الاستاد وانا جاي..مالقيتش الغلاسات والكماين والتقفيل بتاع كل ماتش سمعت بس هيصه جايه من نحيته بس ماركزتش
- انا هروح اتفرج ع الماتش فالكشك اللي قدام المستشفي..لو فيه عيانين جم سيطر بقي اتكتورنا
سابني ومشي..فعلا اتضايقت..انا كنت مستني المتش ده من زمان..كان نفسه حتي احضره فالاستاد..سبحان الله يجيلي نبطشيه وفمعاد المتش بالظبط! ده ايه الحظ ده ياربي!!
فضلت قاعد فالنبطشيه..الوقت عدا..اتبلغت بحاله جايه بالاسعاف..الحاله جايه من الاستاد..
انا قلت حد من اللاعيبه جراله حاجه..اي حاجه من دي
الاسعاف كان داخل باقصي سرعه..رحت عليه..اتسمرت فمكاني..
لقيت شاب صغير..شعره ووشه كلهم لونهم اصفر وجسمه ملان رمل..رجله اليمين مكسوره من تحت الركبه..وجنبه!
رجله مفصوله تماما عن جسمه !! الولد جثه هامده..مافيهوش نفس
: ده جاي منين ده ياخوانا !!
- جاي م الاستاد يا دكتور..الدنيا هناك مقلوبه والاسعاف مالي محيط الاستاد..فيه مصابين بالهبل لسه جايين فعربيات ورانا..
كلمت النايب الاداري ساعتها بلغته..نزل وكلم كل الدكاتره اللي فالمستشفي..كل التخصصات..كله جاهز وواقف مرتبك..منظر الولد ده دليل ان اللي جاي وراه كارثه!!
ماطالش انتظارنا..جه عربيتين اسعاف..وعربيتين وراهم..وعربتين وراهم
الاسعاف بيعوي بشكل يصم الاذان..المسعفين نازلين من العربيات والخوف والذعر مرسوم علي وشهم بشكل مرعب..لدرجه ان ناس فيهم كانت ايديها بترتعش م الانفعال..
كل عربيه جايه شايله اتنين او تلاته..اكبر واحد فيهم كان حوالي عشرين سنه..
الدكاتره مش ملاحقه تجري علي مين..اعمل انعاش قلبي لده واسيب ده..لا ده مات خلاص..ده لسه فيه نفس اجري عليه تشتغل عليه دقايق يموت..
كابوس..
ريحه الموت ماليه المكان..
انا عملت باديا انعاش قلبي لطفل خمستاشر سنه!! يا جماعه حد يفهمنا الناس دي ماتت ليه !!
محدش بيرد عليا..
عملت انعاش لشاب كان جاي متوفي وهدومه كانت متقطعه.بس علم الاهلي كان مابين بطنه وحزام بنطلونه..فضلت اشتغل فالانعاش ده وانا دموعي بتسقط علي جسمه..
مش عاوز يرجع..قلبه رافض يشتغل..الروح رافضه ترجع جسد سابته خلاص..
الملايات خلصت..حطيت علي جسمه علم الاهلي اللي كان جاي بيه
تليفونه كان بيرن..بيىن رن مابينقطعش..
طلعت تليفونه..لقيت المتصل " ماما حبيبتي" فخلفيه امه وهي حضناه"
ارد عليها اقولها ابنك مات !! اقولها ابنك اللي انتي بتتصلي تتطمني عليه تحت ايدي جثته عشان ساب حضنك وراح مع صحابه !! راح ومش هتاخديه قحضنك تاني !!
اديت التليفون لواحده من بنات التمريض..ماقدرتش تمسك نفسها وراحه عيطت جامد ووقعت من طولها..
مين البني الادم اللي قلبه يستحمل موقف زي ده!!
جثث فكل حته..دكاتره عاجزين عن انقاذ اي حياه..مصابين بجروح مختلفه فكل جسمهم اصابات حامده بيتخيطوا وبياخدوا محاليل تعوض نزيفهم..
الجثث من كترها مابقيناش عارفين نوديها فين !.. كنا بنحطهم ع السراير..تلاته واربعه جنب بعض..
شباب زي الورد..تشوفهم تقول ازاي دول ميتين..دول نايمين زي الملايكه..متغطيين بنفس الغطا..
الاعداد بتزيد..الموت محاصرنا من كل نحيه..الجثث ع السراير وع الارض..النشرحه اتملت..ولسه بييجي جثث اكتر واكتر..غير الاخباريات اللي بتجيلنا بالحالات اللي بتروح المستشفيات اللي فمحيط الاستاد
التمريض انهار..الدكاتره مخزونها النفسي خلص..وجسديا انهكوا تماما..
واحد كان قاعد فالركن شايل راس صاحبه علي رجله وحاضنها وبيعيط ومش عاوز يسيبه..وبيكلمه..قوم يا صاحبي..قوم عشان تروح معايا..قوم عشان نشجع سوا..قوم صوتك كان بيهزنا..هروح من غيرك ازاي ياصاحبي..همشي ازاي وانا ايدي مش فايدك !
الوقت عدا..زحف الجثث قل..بدانا فحصر الوفيات والمصابين..فيه ناس صورت الجثث عشان لو حد يتعرف عليها..النيابه جت وبدات شغلها..
مشيت من المستشفي الساعه 13 بليل..وانا مش فاهم حاجه..مصدوم علي خايف علي بعيط..بس اللي كنت متاكد منه..ان دعيت ربنا ماشوفش يوم زي ده تاني..
تاني ابدا..رحم الله ال 74 💔
