28/06/2026
أستراليا 🇦🇺 مش شبه نيوزيلندا 🇳🇿، ومش مجرد أبجريد بسيط هايكون سهل على منتخب مصر 🇪🇬 يتعامل معاه
أستراليا عندها إيرانكوندا (اللي في الصورة ده) عنده ٢٠ سنة من ناشئين بايرن ميونخ وحاليًا في واتفورد 🏴
جناح ويمشي مهاجم كمان، أسمراني، سريع جدًا، ومنزل شرابه طول الماتش، وأظن كلنا عارفين اللي بالمواصفات دي مع تنزيلة الشراب دي بيبقى عامل ازاي، وممكن نرجع لهدفه في تركيا 🇹🇷 ونشوف مثال بسيط
أستراليا عندها خطة هاتخلينا نشوف الفريق ده بنفس القوام ١٠ سنين قادمين على الأقل، لإن معدل أعمارهم مُبهر
🔴 القوام الأساسي كله من ٢٠ لـ٢٢ سنة فقط، باستثناء ٣ لاعبين أعمارهم ٢٦ و٢٧ و٣٠ سنة، يعني فريق نشيط وحيوي وعنده لياقة يروح معاك لـ١٢٠ دقيقة، وميشتكيش
🔴 حارس المرمى ١٩٠ سـم، وقلوب الدفاع من ١٩٠ لـ١٩٨ سـم، واحنا أصلًا عانينا في كرات الهواء ٣ مباريات، يعني مجرد التفكير في أي كرة عالية هايكون عبثي، ألعب معاهم أرضي واتبسط
🔴 فريق لعب ٣ مباريات بـ٣ طرق لعب مختلفة، مرة يدافع بـ٥ ومهاجم وحيد، مرة يدافع بـ٣ مع ٢ مهاجمين، ومرة يدافع بـ٥ و٢ مهاجمين، يعني عنده مرونة وأدوات
لكن على النقيض بقى 👇
أستراليا مش بتحب تستحوذ، نسب استحواذهم ضد تركيا وأمريكا فعلًا كوميدية، لكن رغم ده استقبلوا هدفين فقط في ٣ مباريات، فخد بالك
🔴 من أقل فرق المونديال تمريرًا للكرة (المركز ٣٢ ومصر الـ١٦)، ومن الأقل في دقة التمريرات (المركز ٣٤ ومصر الـ١٥)، لإنه مش بيستحوذ
🔴 من أقل الفرق اللي بتقدر تسترجع الكرة بسرعة (المركز ١٢ ومصر الـ٢٨ وده إيجابي لنا)، ومن أكثر الفرق اللي دفاعها دائما تحت ضغط المركز الـ٧ ومصر الـ٢٨)، وده لإنه مش بيستحوذ بردة
🔴 من أقل فرق المونديال محاولة على المرمى (المركز ٣٣ ومصر الـ٨ بفارق ١٨ محاولة)، لكن عندهم دقة في المحاولات (المركز ٢٢ ومصر الـ١٨ بفارق محاولتين فقط)
بمنتهى البساطة
أستراليا فريق أقوى من نيوزيلندا بشوية حلوين، لكنه مش فريق مرعب، عنده مميزات بوضعنا الحالي هايكون صعب نتعامل معاها لكنه مش مستحيل بدليل تعامل غيرنا معاها، وعنده عيوب نقدر نستغلها ونلعب عليها
أستراليا هو ماتش العمر بالنسبة لمنتخب مصر 🇪🇬، أهم من بلجيكا ونيوزيلندا، الفوز به يخلينا في مكان عظيم، وده مش صعب خالص بس نركز
