28/04/2025
كمدربين، بيمر علينا لاعيبة كتير، أطفال بيبدأوا الرحلة معايا من الصفر، سنة واتنين وأكتر، وبالرغم من إننا بنعيش مع بعض تفاصيل يومية، تعب، ضحك، خناقات، لحظات فرح وانكسار، دايما بييجي وقت بيمشي فيه اللاعب لأي سبب! اختلاف أو قرار
الملحوظة اللي بشوفها بتتكرر؟
إن فيه لاعب لما بيمشي، بيكون شكله "أحسن" من زمايله، مهاراته أفضل، سرعته أعلى، شكله في الملعب أحسن، بس لما ترجع تشوفه بعد سنة أو اتنين … بتكتشف إن اللي كانوا أقل منه عدوه بمراحل.
ليه؟
علشان اللي بيفرق مش الشكل، ولا السرعة، ولا الـمهارة اللي بتتباهى بيها وأنت صغير.
اللي بيفرق هو التدريب 👌
الالتزام، الاستمرارية، إنك كل يوم تيجي تتمرن وتغلط وتتعلم وتعيد من تاني.
أنا كمدرب مش دوري أجهزك لماتش.
أنا دوري أجهزك لحياة في الفنون القتالية و تكون مقاتل حقيقي … وحياة براها كمان.
اللي بيثبت مع الوقت مش اللي بدأ أقوى، لكن اللي فضل يتطور كل يوم شوية، حتى لو كان أضعف، واستمر ومااستسلمش، وقع وقام كمل 💪
