21/05/2026
الدوري ده لو اتعاد 10 مرات بكل تفاصيله مش هنقدر نكسبه واللي حصل ده كان إستثناء مش قاعدة
وهنا أنا مش بكلمك في الأزمات والديون والقيد لأ بكلمك كورة بس..!
. أغشك وتفوق على صدمة..؟ ولا أصارحك عشان تستعد كويس..!
. الزمالك مقدرش يظهر هوية أو شخصية قوية في الملعب
فريق بيعاني في كل مراحل اللعب:
»» مشاكل في الخروج بالكرة
»» مشاكل في القدرة على السيطرة والأستحواذ
»» مشاكل فجة في منظومة الضغط واسترجاع الكرة
. في الفترة الأخيرة لعبنا بطرق لعب كتير جدا "4/3/3" و "4/2/3/1" و "4/4/2 D"
وده بيفسرلك ليه الفريق مكنش عنده هوية في الملعب
. وفي كل الاحوال ومع مختلف الطرق مكناش بنقدر نطبق غير "أسلوب لعب واحد" وهو "رد الفعل" وده بيرجع للاسباب اللي قولتها عشان تقدر تلعب بأسلوب الفعل والاستحواذ
لازم يكون عندك "منظومة ضغط" قوية قادرة تسترجع الكرة في وقت قليل جدا
. والحقيقة ان الزمالك كان واحد من أسوأ الفرق في الحته دي أكتر فريق بياخد وقت عشان يسترجع الكرات ولما بيسترجعها بيسترجعها في مناطق متأخرة جدا في التلت الأول من ملعبه
. وكل ده ناجم عن خلل "تكتيكي" يسأل عنه المدرب مافيش "انماط لعب متعددة" للخروج بالكرة
أو أنماط لعب هجوميه بتتكرر في المباريات
. ممكن تكون مشكلة لعيبة..؟ مؤكد لأ
ارجع لبداية الموسم مع "يانيك فيريرا" اللي بنقول عليه أضعف مدرب دخل مصر
الفريق كان قادر يعمل نسب "إستحواذ" عالية جدا وكان عندنا "منظومة ضغط عالي وعكسي" كويسة جدا جدا
ومش هتناقش في الحتة دي كتير بس تقدر ترجع للأحصائيات والارقام
الزمالك كان فريق قوي وصلب جدا دفاعيا مشاكله كانت بتبقى في اخر 10 دقايق فقط من المباراة نتيجة التراجع البدني وعدم تجهيز دكة قوية او روتيشن ويسأل عنها "يانيك فيريرا"
. طيب إزاي كسبنا الدوري وعملنا سلسلة انتصارات 8 ونتايج كويسة مع معتمد جمال..؟
. في الحقيقة كل ده كان ناتج عن "تجليات فردية" من بعض اللعيبة "بيزيرا" اللي كان بيمثل 90٪ من حلول الفريق وبرقابته الفريق كان بيتعطل تماما
"شيكوبانزا" وسرعاته واعتمادنا عليه بشكل كبير في عملية التحول
فوقان "ناصر منسي" و جودة "الدباغ" اللي كانوا بيقدروا يسجلوا من عدد فرص قليل جدا متاح للتسجيل
. وأقولك سر بمناسبة الحديث عن "بيزيرا، شيكوبانزا، الدباغ"
الثلاثي الهجومي ده لو كان اتوجدله سياق لعب قادر يوصلهم الكرات بالشكل وفي المكان المحبب ليهم أرقامهم كان ممكن تتضاعف بشكل ضخم..!
لكنهم واجهوا مشاكل كبيرة استنزفت طاقتهم وقدراتهم في المباريات بالنزول للتلت الأوسط والاول احيانا من ملعبهم للدفاع أو للمساعدة في الخروج بالكرة
. مرات تتعد على اصابع اليد الواحدة اللي قدر فيها وسط ملعبنا يوصلهم الكرات في مناطق عالية من ملعب الخصم وفي مواقف فيها أفضلية ليهم
. "بيزيرا تحديدا" بالحمل التقدمي اللي بيعمله بالكرة وقدراته الخارقة في المراوغات لو كان اتحط في مواقف كتير بوشه لمرمى الخصم وفي ربع مساحة أو موقف 1/1 كان هيضاعف ارقامه بشكل مهول
لكن هو طول الوقت بينزل عشان يستلم بضهره
. "شيكوبانزا" بسرعاته الخارقة لو في منظومة لعب قدرة تخدم على ميزته دي وتحطله الكرة في المساحات في ضهر المدافعين كانت ارقامه هتتضاعف بشكل كبير
. وفالنهاية المشكلة فين..؟
خلل في المنظومة التكتيكية يسأل عنها المدرب مقدرش يوجد سياق لعب جماعي يستفيد به من كل مميزات وبروفايلز ادواته
. عشان كده أول خطوة للاستعداد لموسم قادم هيكون صعب جدا وهتشارك فيه في مستوى تنافسي اعلى "دوري الابطال" لازم تكون ب "مدرب أجنبي" جيد
تتعاقد معاه بدري جدا ويشارك في الصفقات ويعمل فترة اعداد
. كابتن "معتمد جمال" كتر خيره والله وعمل اعجاز بس الموضوع صعب جدا عليه ما قدمش كورة والشكل كان صعب جدا بس مكنش هينفع نتكلم في الوقت ده
الفريق كان بيعاني من مشاكل كبيرة جدا ومكنش قدر يكون الطرف المسيطر فكل الشكر والتحية ليه وده انسب وقت يخرج فيه من الباب الكبير
. نقطة مهمه جدا جدا هي حجر الاساس اللي تبني عليه الاستعداد لموسم دوري الأبطال مدرب ثم مدرب ثم مدرب.
