31/05/2026
المحلل الرياضي خالد طلعت كتب 👇🏻
انا مش عارف الزملكاوية متضايقين ليه وزعلانين ان حسام حسن ضم عدد لاعيبة أكبر من الأهلي في منتخب مصر وبيقولوا ان المفروض يضم من الزمالك اكتر لانه بطل الدوري الكلام ده غير صحيح بالمرة لأسباب كتيرة جدا
1- لاعيبة الأهلي من حيث القيمة التسويقية أعلى بكتير من لاعيبة الزمالك (أكتر من الضعف)
2- لاعيبة الأهلي يمتلكوا خبرات أعلى بكتير من لاعيبة الزمالك سواء مع الأهلي أو المنتخب ولاعيبة الزمالك معظمهم صغيرين في السن ومعندهمش خبرات
3- لاعيبة الأهلي معظمهم لاعيبة دوليين لعبوا ماتشات كتيرة مع منتخب مصر بعكس لاعيبة الزمالك
4- الأهلي لما لاعب الزمالك (مواجهات مباشرة) 3 مرات الموسم الحالي الاهلي كسب في المرات التلاته واخر فوز من اقل من شهر كان 3-صفر
5- الزمالك كسب الدوري مش عشان لاعيبته فنيا اعلى من لاعيبة الاهلي لاء خالص الزمالك كسب الدوري لأسباب تانية كتيرة مفيهمش السبب ده خالص
6- من أهم أسباب فوز الزمالك بالدوري هو المدير الفني السيء للاهلي سواء ريبيرو او ثوروب واللي كانوا سبب في ضياع نقط كتير من الاهلي
7- لاعيبة الاهلي نفسها بتتألق مع منتخب مصر وتظهر بمستوى مميز تحت قيادة حسام حسن زي ما شفنا في ماتشات السعودية واسبانيا وماتشات تانية كتيرة وده يأكد ان اللي حصل في الاهلي عيب مدرب في المقام الاول مش عيب لاعيبه
8- التفاوت الكبير في مستحقات لاعيبة الاهلي أثر بشكل سلبي على أوضة اللبس وده كان ليه تأثير سلبي برضه على نتايج الاهلي وده أمر بعيد تماما عن الفنيات
9- من أسباب اخفاق الاهلي كمان الغرور والتعالي للاعيبة الفريق واللعب بفردية وانانية في احيان كتيرة
10- فوز الزمالك بالدوري كان نتيجة جمهور الزمالك في المقام الاول والروح والتركيز من اللاعيبة وشطارة وذكاء معتمد جمال في توظيف اللاعيبة ووجود معتمد فرق بشكل رهيب عن فترة يانيك فيريرا
11- الزمالك بيعتمد في المقام الاول على المحترفين مش المحليين ، أهم 2 لاعيبة في الفريق هما بيزيرا والدباغ وكان ليهم الدور الاكبر في تتويج الزمالك بالدوري ووصوله لنهائي الكونفيدرالية ، ومعاهم بنتايج وكمان شيكو بانزا على فترات بعكس الاهلي اللي قوامه الرئيسي والاساسي من اللاعيبه المصريين
12- حسام حسن من بداية توليه المسؤولية بيعتمد بشكل اكبر على لاعبي الاهلي وناجح بنسبة 90 % رابع كاس امم افريقيا والوصول لكاس العالم بدون هزيمة ونتايج ايجابية جدا في المباريات الودية الدولية
* خلاصة الكلام : فنيا على الورق لاعيبة الأهلي أفضل من الزمالك بمراحل وخصوصا كمان لو شلنا المحترفين من الفرقتين ، ولكن الزمالك كسب الدوري بمعجزة ولأسباب بعيدة تماما تماما عن فنيات اللاعبين
Khaled Talaat
#الزملكاوي
كلامك وتبريرك مش صح !!!! دا معناه ان المجتهد ملهوش مكان !!! طيب ليه مجبتش سيرة لاعبي بيراميدز ما هما قيمة تسوقية زي الاهلي بل علي العكس واخدين دوري ودوليين وفازوا بافريقيا ، لو انت مقتنع بكلامك ومش بتضحك علي الناس كنت كمان قولت ان لاعبي بيراميدز افضل من لاعبي الاهلي ،،، ولو كلامك صح كان خد احمد الشناوي بدل شوبير اللي معندهوش لا قيمة تسوقية ولا خبرة الشناوي!!! التطبيله طلعت وحشه المره دي!!!
