03/09/2026
دقيقة مع الكوتش خميس – الحلقة 34
«مش كل نقد تنمّر… ومش كل نقد لازم تقبليه»
عارفة إيه المشكلة؟
إن في لاعبات كتير بقوا بيخافوا من أي ملاحظة أو نقد، وبيعتبروا أي كلام سلبي عن أدائهم تنمّر.
لكن الحقيقة إن مش كل نقد تنمّر.
لما المدرب يقولك: «مستواكي النهارده أقل من مستواكي الطبيعي» ده مش تنمّر… ده توجيه.
ولما حد يقولك: «عندك نقطة ضعف وعايزة تشتغلي عليها» مش معناه إنه بيحبطك… بالعكس، ممكن يكون بيساعدك تتطوري.
لكن لما حد يقلل منك، أو يسخر من شكلك، أو يهينك، أو يحاول يكسرك قدام الناس… هنا إحنا بنتكلم عن تنمّر، وممنوع تقبليه.
اللاعبة الذكية مش بتسمع كل الكلام… ومش بترفض كل الكلام.
هي بتسأل نفسها: «الكلام ده هيخليني أحسن؟ ولا هيخليني أحس إني أقل؟»
خدي من النقد اللي يبنيكي… وسيبي الكلام اللي يهدمك.
ومتنسيش: ثقتك بنفسك مش معناها إنك شايفة نفسك كاملة… ثقتك معناها إنك عارفة إن عندك عيوب، وعندك الشجاعة تشتغلي عليها.
وفي النهاية…
إحنا مش هدفنا نصنع لاعبًا فقط… إحنا بنبني لاعبًا… ونصنع إنسانًا.
كوني نجمة… كوني قدوة.
تحياتي، كوتش خميس
#التنمر
#رياضة
#تحفيز
