10/09/2024
كلمتين للطرفين:👇
لكل ام عارفة إن بنتها مش بتاعت عيشة ومسؤولية ومش هتنفع تفتح بيت .
خليها جنبك يا ست الكل مترازيش بيها حد وترجعوا تقولوا ده طلع فيه وفيه وتدخلوا محاكم والحوارات دى ..
جالها راجل عاوز الحلال عرفيها يعني ايه مسئولية الجواز .. الجواز مش حبة رومانسية ودلع وبرفان وشكل حلو وبس ..
عرفيها أن الراجل ليه القوامة واحترامه فرض عليها
عرفيها أنها يوم ماتطلع من بيت ابوها متجيش غير زائرة زى ما أهلنا قالوا ..
عرفيها أنها تستر وتعيش على اد اللي موجود وطالما جوزها بيشتغل وبيجيب القرش ومش ماشى في سكة حرام تشيله على دماغها ..
إنما لما تكونى عارفة أن بنتك مش بتاعت عيشة وكارهة جوزها وراجعة غصب عنها ومش عاوزة تعيش يبقى ايه في دماغك ؟ .. عاوزة العفش والقايمة والدهب ومتطلعيش خسرانة ..
لا والله دى مش خساره ده مال حرام داخل عليكى لما تكونى انتى مش عاوزه تعيشى وعاوزة كل حاجة يبقى مال حرام لأن ربنا قال امساك بمعروف أو تسريح بإحسان وعرف كل نقطه وكل حق بالنسبة للبكر والثيب .
والعرف بيقول اللى بيبيع الجمل مبينقيش فى قراضه .. طالما مش عاوزه الشرع يحكم ..
إنما الشرع انتوا مش عاوزينه ومرجعاها تقرف فيه علشان هدف فدماغكم يبقا حرام عليكى .حسبى الله ونعم الوكيل فى كل واحده تظلم واحد على حساب انها مش عاوزه تخسر وحسبى الله فى كل واحد يظلم بنت ناس عايشه وراضيه .. وحسبى الله ونعم الوكيل فى كل ام بتسلط بنتها على جوزها .. وحسبي الله ونعم الوكيل في كل حما تخرب بيت ابنها وتشرد ابناء مالهم ذنب
ونصيحة لأى إتنين هيتجوزوا .. بلاش خلفة أول سنه لحد ما تعرفوا هتكملوا وتستحملوا تعيشوا مع بعض ولا لأ ..
أصل المخطوبين غير المتجوزين فى حاجات كتير بتبان مع العشرة
وربنا يصلح الأحوال
