25/05/2026
منقول اوعى تفتكر انك مش هتخسررررر!!!!
انت فاكر إن اي حد ناجح ادامك، ماخسرش !؟
تعالى اديلك مثال عليا ولو إني مش شايفني ناجح بس اهو مثال والسلام 😂❤️
أنا مثلا رجعت لنقطة الصفر في حياتي اكتر ما اتقالي صباح الخير 😅
وأوقات كان نقطة الصفر دي هدف أصلا
يعني أنا من كام شهر تقريبا كنت في شراكة واتفضت وطلعنا من الشراكة خسرانين الحمد لله
مبلغ الخسارة كنت بالكامل مغطيه من مالي الخاص لأني كنت عامل حسابي على خسارة معينة لكن ضربت مننا لأسباب خارجة الإرادة
واحنا بنفض الشراكة ماكنش عندي غرض اني أشيل الشركة
مش هاتفرق كتير اقدر ابدء من تاني إن شاء الله
الشريك كمان ماكنش عنده مشكلة فقالي شيل انت وطبعا شيل آنتي دي كانت مغرز محترم هاتعرفه بعدين
وعشان ماحبتش اطول في قعدة الفض عشان لا تعكر صفو العلاقة بيننا ما اتكلمتش كتير ولا حتى قولت سبب اني مش عايز أكمل في الشراكة ايه
المهم معنى اني أشيل الشركة يعني هاشيل الديون وابقى متصدر ادام الناس ومش ديوني بس كشريك لا كمان ديون الشريك التاني لان ظروفه لا تسمح بالسداد أصلا
وده كان هاياخد من ماليتي مبلغ كبير يكتفني
يعني أنا هادفع نصيبه كاش وهو يدفعها قسط مريييح
والمبلغ كان ممكن ينفعني في التشغيل بشكل كبير واستفيد منه
لكن قولت تحدي جديد زي اللي قبله لما أشوف هاقدر اعمل ايه
هتشغل الشركة وتسدد الديون دي ولا هاتدفع من معاك وتقفلها وتستنى الشريك يبعت الفلوس على مهله‼️
الحمد لله قعدت حسبتها مع حالي وحللت سبب الخسارة وعرفت المشكلة فين وبعدها حطيت خطة وسألت ربنا التوفيق والسداد
شغلت الدنيا واحدة واحدة وكانت فاضية بعد فض الشراكة وكنت بشتغل واسدد وأركز اكتر على الأرقام وأحسنها
لحد ما ربنا اكرم وسددت الجزء اللي عليا كله في مدة مش كبيرة
والشريك التاني كان بيبعت جزء لما يتيسر معاه لو افتكر
ربنا اكرمني وسددت فلوس الشريك التاني على طول بعدها ورجعت للصفر من تاني
صفر حسيت انه نعمة والله كنت يتمناها
كل ده ومحدش خالص حس بأي مشكلة لأني حطيت فلوسي الشخصية في الشركة بدل الدين حتى التجار اللي الشريك اخدهم وكان لهم فلوس في السيستم صفيتها وبعتهالهم من باب انه يشغل حاله لأنه محتاج الدنيا تمشي وعشان هما مالهمش ذنب
والحمد لله تعافيت وكملت بشكل أقوى وتطوير اكبر وبدل المشروع بقوا ٣ بفضل الله
الشاهد من الموضوع انك ماتفتكرش انك مش هاتخسر ‼️
الخسارة جزء كبير من المكسب
الخسارة جزء كبير من الخبرة
نعمة الصفر مش هاتعرفها إلا لما تبقى تحت الصفر بشوية
السوق عادي جدا فيه انك تخسر لكن اللي مش عادي انك تهرب
تقف وتواجه مشاكلك وتحاول تحلها وتهدى
لازم تهدى وتدير الموضوع بحكمة وهدوء لان المصيبة وقعت ومش هاتقدر تردها
معرفة سبب الخسارة اهم حاجة في الموضوع
لو ماعرفتش انت خسرت ليه او حتى كسبت ليه فأنت أكيد مش هاتكمل
فمحدش كبير عالخسارة بالعكس ساعات كتير بنبسط بيها وأعتبر دفعت فلوسها علام
وبس كده ياسيدي ❤️
