The Wadi Clan - عشيرة الوادى

The Wadi Clan - عشيرة الوادى Making the Egyptian wilderness accessible to all.
(1)

طالعين جبل أم شومر ان شاء الله (تاني أعلى جبل في مصر) و هنمشي وادي رمحان و إسلا (حوالي ٥٠ ك و إرتفاعات تصل ل ٢٥٠٠ م) على...
15/03/2026

طالعين جبل أم شومر ان شاء الله (تاني أعلى جبل في مصر) و هنمشي وادي رمحان و إسلا (حوالي ٥٠ ك و إرتفاعات تصل ل ٢٥٠٠ م) على مدار ٣ أيام (من كاترين للطور وسط الجبال)
هايك صعب و محتاج ناس عندها خبرة كويسة في الهايكنج و/أو رياضات التحمل
لينك تفاصيل الطلعة في أول تعليق.

مقتطفات من طلعة جبل كاترينا .. أعلى قمة جبلية في مصر ♡ ✌🏻 طلعنا قمة جبل كاترين وخيمنا فوق وطبعا شفنا الشروق والغروب من ف...
02/07/2025

مقتطفات من طلعة جبل كاترينا .. أعلى قمة جبلية في مصر ♡ ✌🏻
طلعنا قمة جبل كاترين وخيمنا فوق وطبعا شفنا الشروق والغروب من فوق القمة ..
جبل كاترين من الجبال المميزة والمشهورة .. برغم أنه طريقه ممهد إلا أنه فعلا بيتطلب صبر على طول المشوار..
بدأنا من مدينة سانت كاترين، و الطلوع من نقب أبو جيفة ( نقب ممهد حتى للجِمال ) و بعدها مشينا في وديان كاترين الجميلة للوصول لبداية طريق الجبل ، اخترنا نطلع من طريق كله سكرامبلينج ( صخور كبيرة بتحتاج تسلق ) عشان يخفف احساسنا بالمشوار .. لحد ما وصلنا بداية مسار الزجزاج، وهنا بدأت خطى الناس تختلف.. كل حد بقى له الخطوة اللي تناسبه، وده الطبيعي قبل الوصول للقمة..
وصلنا كلنا لنقطة التخييم الحمدلله قبل الغروب بوقت مناسب، ومكان التخييم كان بيبعد عن القمة تقريبًا ١٠ دقايق، استريحنا شوية، وبعدها طلعنا نشوف الغروب والأفق الواسع قدامنا ..
و نزلنا بعدها على عشا بدوي لذيذ ولسماع حكايات البدو حوالين النار 🔥 .
وقت الشروق ؛ ولأننا مخيمين على ارتفاع كبير، ف مجموعة مننا فضلت تشوف الشروق من مكان التخييم ومجموعة تانية طلعت القمة تاني ..
بعدها فطرنا ولمّينا حاجتنا وبدأنا طريق النزول..
ولأنه الجو كان حر شوية، ف ده خلّى كل جنينة أو بير مية نقابله هو نقطة استراحة ضرورية لينا 🥵.. نبرّد جسمنا ونشرب مية ونكمل، لحد ما رجعنا المدينة تاني الحمدلله ✌🏻❤️
وطبعا ختمنا الرحلة بأحلى مقلوبة فلسطيني اللي أصبحت علامة مميزة في ختام طلعاتنا.
مبسوطين بصحبتكم في جبل من أجمل جبال كاترين ونشوفكم على خير في طلعات أخرى بإذن الله

📷 رشاد - سارة حسن - جاسر - هاجر - نور الدين

رايحين الفيوم بعد العيد ان شاءالله ️👏🏻 طلعة سهلة مناسبة للمبتدئين ومحبّي الصحرا والتأمل والنجوم و هيكون فيه فسحة في الآث...
04/06/2025

رايحين الفيوم بعد العيد ان شاءالله ️👏🏻
طلعة سهلة مناسبة للمبتدئين ومحبّي الصحرا والتأمل والنجوم و هيكون فيه فسحة في الآثار القديمة لهياكل حيتان من ملايين السنين ..
تفاصيل أكثر في الإيفنت في التعليقات👇🏻👇🏻

هنروح وادي الحيتان يوم ٢٠ يونيو ان شاء الله 🗓 .. هنخيم يوم بليلة في صحراء الفيوم وهنلف في متحف المحمية وهنشوف الهياكل ال...
29/05/2025

هنروح وادي الحيتان يوم ٢٠ يونيو ان شاء الله 🗓 .. هنخيم يوم بليلة في صحراء الفيوم وهنلف في متحف المحمية وهنشوف الهياكل العظمية للحيتان الموجودة من ملايين السنين، وهنسمع شرح فلكي بسيط وبعدها هيكون معانا بقية الليل نتفرج على أروع مشهد فلكي في سماء الفيوم. ✨
الطلعة سهلة ( مسافة الهايك أقل من ٥ كم في اليوم )🤸🏻‍♂️
هنتحرك من القاهرة يوم الجمعة 20 يونيو 9 ص ونرجع يوم السبت 21 يونيو حوالي الساعة 1 ظ

تفاصيل أكثر في الايفنت أول تعليق 👇🏻

شكراً أصدقاء العشيرة الفراهيد اللي نورونا طلعة الجمعة اللي فاتت 🕶طلعة ١٦ كم في شمس الصيف بداية مش سهلة لكل المبتدئين فنح...
27/05/2025

شكراً أصدقاء العشيرة الفراهيد اللي نورونا طلعة الجمعة اللي فاتت 🕶
طلعة ١٦ كم في شمس الصيف بداية مش سهلة لكل المبتدئين فنحب نقولكم عاش فعلا 👏🏻👏🏻
وان شاء الله نستكمل موسم طلعات الصيف بعد العيد..
نشوفكم على خير وكل سنة وأنتم طيبين ❤️ 🐑

📷 رشاد - أحمد القاضي - نور - محمود - هاچر - أحمد هشام

طلعتنا الجاية في وادي دجلة يوم الجمعة ● ٢٣ من مايو ● ان شاءالله ..الطلعة مناسبة للمبتدئين في الهايكينج، بشرط،☝🏻وجود حد أ...
14/05/2025

طلعتنا الجاية في وادي دجلة يوم الجمعة ● ٢٣ من مايو ● ان شاءالله ..
الطلعة مناسبة للمبتدئين في الهايكينج، بشرط،☝🏻وجود حد أدنى من اللياقة البدنية ..
قراءة التفاصيل مهمة [هتلاقوها في أول تعليق]
ولو عندكم أسئلة ابعتولنا 😃 ..
ونشوفكم على خير.🙏🏻

المرة الرابعة لينا في رمحاااان 🥳 والمرة دي بصحبة ١٧ هايكر من أصدقاء عشيرة الوادي ♡شهرة رمحان من اسمه لأنه الصخر بيتحرك/ ...
05/05/2025

المرة الرابعة لينا في رمحاااان 🥳 والمرة دي بصحبة ١٧ هايكر من أصدقاء عشيرة الوادي ♡
شهرة رمحان من اسمه لأنه الصخر بيتحرك/ بيرمح فيه، وعشان كده طلوع رمحان بيحتاج خفة وحذر طول الطريق و التحرك على الصخور وعدم الثقة فيها كان قانون ثابت في طلوع الجبل ده. 📃
أول يوم كان الوصول لسفح الجبل والتخييم، يوم خفيف وتسخين قبل الجبل / المسافة الكلية لأول يوم ١٠ كم تقريبا بالإضافة لرحلة بالعربيات لعمق الوديان.. بعد الوصول لمكان التخييم كانت الخطة، الراحة والاستعداد للطلوع تاني يوم .. اليوم التاني مع أول ضوء للشمس كنا بدأنا طريقنا لرمحان، وبما أنه المجموعة كبيرة ف كنا بنتحرك منفصلين كمجموعات بينهم مسافة أمان كافية ، ومن استعدادات الجروب للطلعة المرة دي مكانش مجرد التدريب على شكل الجبل والمجهود لكن كمان ازاي نستخدم تطبيقات المِلاحة والخرائط لمعرفة المسار وشكله واحنا فين من القمة والارتفاع الكلي والنقطة ال احنا واقفين عندها .. وده سهّل كتير على كل شخص بتصور المسار بشكل فردي دون الاعتماد الكلي على الأدلة 🗺 🌐
من فضل الله وصلنا كلنا للقمة سالمين و نقدر نقول إنه قمة رمحان أصبحت من قمم العشيرة المألوفة 🕶🤝🏻
بعد استراحة طويلة فوق القمة بدأت رحلة النزول
واللي كانت أطول ومحتاجة حذر أكبر، وهنا اتقسمنا من بداية الطريق لمجموعتين بينهم مسافة تحمي المجموعة ال نزلت الأول.. المجموعات وصلت مكان التخييم بالتتابع قبل الغروب من فضل الله مبسوطين بالجبل والتحدي وبعودتهم سالمين 🙏🏻
ليلة مابعد صعود القمة من الليالي السعيدة لأي هايكر فسهرنا شوية حوالين النار نسمع حكايات وقصص البدو وال كانت ختام تاني يوم ❤️
تالت يوم بدأنا الطريق ناحية وادي إسلا 🌾🌴 ٢٧ كم في وادي من أجمل الوديان واللی بنعتبره مكافأة طلوع الجبال الصعبة 😌 .. وبرغم بداية الوادي الرملية الا أنه بينتهي بشجر ونخل وزروع مختلفة وبيفتح الوادي في نهايته على مشهد الغروب المهيب في مدينة الطور 🌅
سعيدين بعودة الكل سالم من فضل الله و وصحبة كل اللي شاركنا الطلعة.. وعاش ليهم وعلى تعاملهم مع تحديات جبل زي رمحان .. بصبر وحذر لكن خفة وحرص على كل أصدقاءهم في المسار ..
لمزيد من الطلعات ومزيد من المرات ال نطلع فيها رمحان ونوري جمال وهيبة الجبل ده لمحبي الجبال والرياضة دي عموما ان شاءالله..

📷 سُهى - سُليمان - مكرم - بهاء - رغدة - نُهى - سارة - عبد الرحمن - مُهند

مقتطفات من أولى طلعاتنا في دجلة لموسم الصيف 🤸🏻١٦ كم من المشي والمرتفعات وكانت بداية لكتير من أصحابنا الجُداد في الهايكين...
28/04/2025

مقتطفات من أولى طلعاتنا في دجلة لموسم الصيف 🤸🏻
١٦ كم من المشي والمرتفعات وكانت بداية لكتير من أصحابنا الجُداد في الهايكينج ..
متحمسين لطلعات صيفية أكثر بصحبتكم ان شاءالله ونتمنى يكون موسم نشيط ونفضل نشوفكم في الوادي ❤️

📷 LiTo

هنبدأ موسم الصيف في وادي دجلة بطلعة ١٦ كم للمبتدئين 🥳✌️ يوم الجمعة الجاية ان شاءالله -٢٥ أبريل- الطلعة مناسبة للمبتدئي...
21/04/2025

هنبدأ موسم الصيف في وادي دجلة بطلعة ١٦ كم للمبتدئين 🥳✌️ يوم الجمعة الجاية ان شاءالله -٢٥ أبريل-
الطلعة مناسبة للمبتدئين في الهايكينج، بشرط وجود حد أدنى من اللياقة البدنية ☝️ ..
الإيفينت في أول تعليق، قراءة التفاصيل مهمة ولو عندكم أسئلة ابعتولنا ..
ونشوفكم على خير 🤝🏻

هنبدأ موسم الصيف ان شاءالله بالتخييم فوق أعلى قمة في مصر 🕶 طالعين جبل كاترينا ان شاء الله يوم ١٦ و ١٧ مايو القادم ✌🏻جبل...
14/04/2025

هنبدأ موسم الصيف ان شاءالله بالتخييم فوق أعلى قمة في مصر 🕶
طالعين جبل كاترينا ان شاء الله يوم ١٦ و ١٧ مايو القادم ✌🏻
جبل كاترين هو أعلى قمة في مصر بارتفاع ٢٦٢٩ م فوق سطح البحر تقريبًا..
طلعة لمدة يومين هنشوف الغروب والشروق ونخيم فوق القمة وهنطلع وننزل من دروب مختلفة ..
مستوى الصعوبة: متوسط / سهل حسب لياقتك البدنية و حسب خبرتك في الهايكينج..

هتلاقوا كل التفاصيل في الايفنت أول تعلييق 👇🏻

مقتطفات من طلعتنا لجبل البنات ووديان كاترين 🧭حبينا نختم الموسم بجبل خفيف قبل رمضان بعد موسم كان كله جبال ملحمية من فضل ا...
10/03/2025

مقتطفات من طلعتنا لجبل البنات ووديان كاترين 🧭حبينا نختم الموسم بجبل خفيف قبل رمضان بعد موسم كان كله جبال ملحمية من فضل الله؛ وطبعا جبل البنات من جبالنا المفضلة المميزة اللي كل طريق فيه بيخليك تشوف الجبل بشكل مختلف.. وبرغم أنه يعتبر من الجبال السهلة إلا أنه بعض المسارات فيه ممكن تعتبر متوسطة أو أحيانا صعبة (زي نقب أبو نخل أو معين ندى ) ..
بدأنا طلعتنا بعربيات توصلنا لأول مسار أبو نخل وده من الأنقاب اللي بتحتاج مجهود نسبياً في التسلق لكن ده بيخلي الطريق مسلي جدا 🤩 بعد ساعات من المشي والمطالع وبعض الاستراحات وصلنا القمة الفسيحة المميزة لجبل البنات .. وبدأنا نعمل الغدا سريعا عشان الجو كان بارد .. واتصورنا وكتبنا أسماءنا في صندوق القمة وبعدها بدأنا النزول .. 🤸🏻‍♂️
طريق النزول كان فيه اختيارين : مجموعة فضلت تنزل من نقب الهجيج (الطريق الأقصر ) ومجموعة فضلت النزول من طريق وادي النقرة ( أطول وأغلبه سكرامبلينج ) لكن كل الطرق تؤدي إلى الكامب 😃✌🏻
وصلنا الكامب كلنا بسلام الحمدلله وقعدنا نتدفى حوالين النار في انتظار العشا 🔥
تاني يوم مشينا في ٣ من أجمل وديان كاترين; بدأنا من وادي روفيد وبعدين مرينا في وادي جناب ومنه وصلنا لوادي إطلاح وصولا لكاترين ..
وكل وادي منهم مميز بشكل مختلف جدا؛ مسافة المشي كانت حوالي ١٣ كم لحد كاترين عشان نختم الطلعة بأحلى مقلوبة فلسطيني من إيد الدليل ❤️
دي كانت آخر طلعة من طلعاتنا قبل رمضان وفعلا كانت مسك الختام لموسم طلعات عظيم الحمدلله 🙏
هناخد أجازة في رمضان ونرجع نستأنف طلعاتنا في العيد ان شاءالله..

وجهتنا القادمة ان شاءالله هتكون جبل رمحان ووادي إسلا ( في أجازة العيد ) ابعتولنا لو عايزين التفاصيل ونشوفكم على خير ♡✌🏻
📷 هاجر - أسامة - أشرف - علي - عُمر- سارة - نور الدين

Address

Wadi Degla Protectorate
Cairo

Website

Alerts

Be the first to know and let us send you an email when The Wadi Clan - عشيرة الوادى posts news and promotions. Your email address will not be used for any other purpose, and you can unsubscribe at any time.

Contact The Business

Send a message to The Wadi Clan - عشيرة الوادى:

Shortcuts

Share

Category