08/01/2025
مين اللي في النص دا
طبعا انت عارف حسام وابراهيم، لكن مين اللي في نص الصورة، اللي في نص الصورة، صاحب واحدة من اغرب القصص في الكورة المصرية.. وخلينا اقولك حكاية هشام عبد الرسول..
بص يا سيدي، جرت العادة يعني ان المنتخب بيكون اهلي وزمالك، وبنجيب 4 لاعيبة من بقية الاندية عشان يعني نقول انه فريق متنوع، في نهاية التمانينات مصر كانت بتلعب تصفيات كاس عالم.. عشان نتأهل لكاس العالم 1990..
كابتن محمود الجوهري رحمة الله عليه ضم لاعب من نادي المنيا اسمه هشام عبد الرسول، الكلام دا سنة 1988 (هشام مواليد 1964).. طيب ما عادي ايه القصة يعني..
شاب من سمالوط في المنيا، لقى نفسه بيمثل منتخب مصر، مش بس بيمثل منتخب مصر، دا نجم المنتخب..
مصر لاعب ليبيريا كسبت 2-0.. محمد رمضان وعلاء ميهوب.
وراحت اتعادلت مع مالاوي 1-1.. وسجل هدفنا هشام عبد الرسول، واتعادلنا مع كينيا بدون اهداف..
وبعدين لاعبنا ليبيريا هناك على ارضهم، وفازت ليبيريا 1-0، فبعد كدا لاعبنا مالاوي وكسبنا 1-0 وسجل برضه الهدف هشام عبد الرسول، وبعد كدا فزنا على كينيا 2-0، هشام عبد الرسول برضه وابراهيم حسن.. (هدف ابراهيم حسن من اغرب الاهداف اللي ممكن تشوفها.. حط دماغه في الارض وعمل الكورة لوب بدماغه... كورة غريبة قوي)..
طبعا احنا تأهلنا للدور التالي كأول مجموعة، وكان افريقيا وقته بيمثلها فريقين بس.. والاربعة اللي صعدوا كان مصر والجزائر، والكاميرون وتونس، مصر لاعبت الجزائر.. لعبنا هناك الاول 0-0، وبعدين فزنا هنا 1-0..
وبكدا مصر صعدت لكاس العالم 1990، وهداف مصر في التصفيات هشام عبد الرسول بـ 3 اهداف (من اصل 7 سجلتهم مصر) .. نجم رجع المنيا استقبلوه استقبال الابطال، والاهلي عايزه، والزمالك عايزه، والحياة بتحلو..
بيحكي كابتن هشام عبد الرسول، إنه رجع المنيا عشان يفرح اهله ويفرح الناس، لان الفرحة ملهاش طعم من غير الاهل، ووصل بعد الفجر، ولقى كل البلد هناك، وقال ان مكافاة صعود كاس العالم كانت شهادة استثمار لكل لاعب لعب الـ 8 ماتشات بـ 20 الف، يعني الماتش بـ الفين ونص، هو لعب 7 ماتشات بس فخد 17 الف ونص..
هو غاب المباراة الاولى بس وقاله الجوهري ساعتها: "مش عايز انزلك اول ماتش عشان ضغط الجماهير"، وقد كان.. هشام كسب ثقة الجمهور وبقى النجم اللي مستنيينه يشوفه في كاس العالم..
مصر عملت شوية حاجات استثنائية، اصل احنا مش بنروح كاس عالم كل 4 سنين، دا احنا بقالنا 56 سنة مصعدناش كاس عالم، فالجوهري، لغى الدوري اصلا، بعد 12 جولة، وقالك انا عايز اعمل معسكر طويل، بلا دوري بلا مندليف.. طيب ما احنا في امم افريقيا 1990.. هنروحها.. قالك بلا 90 بلا 60.. فككم من اسامي شوارع التجمع دي.. وراح رافض يبعت المنتخب الاول.. وراح باعت المنتخب الأولمبي بقيادة هاني مصطفى .. ومعهم اربعة كبار هما ثابت البطل (الأهلي) وطارق يحيى (الزمالك) وحمادة صدقي (غزل المحلة) إضافة لعادل عبد الرحمن (الأهلي)... والحقيقة كان رهان ممتاز.. لاننا لعبنا 3 ماتشات خسرناهم كلهم، وسجلنا هدف واحد جابه عادل عبد الرحمن..
كل دا ومنتخب مصر بيستعد لكاس العالم، هشام كان متعلم سواقة جديد، وكان عند اخته في حلوان، وقتها اتصل بيه لاعب زميله، وقاله إن فيه مصوريين وصحافيين أجانب عايزين يصوروا المنتخب في القرية الفرعونية، كدعاية لبطولة كاس العالم وكدا، والفراعنة قادمون يعني.. وهو في الطريق، فقدت تركيزه لثواني، فخبط في عربية تانية، وكانت حادثة صعبة جدا، مش بس منعته من اللعب في كاس العالم اللي كان من اهم اسباب صعودنا بل تسببت في نهاية مشواره كلاعب اصلا..
بيقول هشام عن الحادثة "عضمة الساق تفتت، بعض العضلات تهتكت ولكن الحمدلله كتب الله لي الحياة"، بدأ هشام يتعافى من الاصابة، والجوهري طلب منه ينضم لمعسكر المنتخب، لرفع حالته المعنوية، لكن الدكاترة قالوا ان الاصابة محتاجة 40 شهر عشان يرجع للملاعب (40 شهر يعني 3 سنين و4 شهور)..
فكابتن الجوهر، دعاه للتواجد مع المنتخب في المعسكر ومن ثمّ السفر لإيطاليا لحضور كأس العالم قبل أن يعود المنتخب مباشرة إلى المنيا لإقامة مباراة اعتزال هشام، وبيقول: "كان كابتن الجوهري يري أن أفضل تكريم لي وسط أهلي بدلاً من إقامتها في القاهرة".
وبكدا انتهت قصة هشام مع الكورة كلاعب شهور بسيطة، وفرحة كبيرة انتهت بكابوس، و3 اهداف كانوا سبب في صعودنا لكاس العالم.. ورحلة قصيرة كتير معرفهاش.. كتي معاصرهاش.. بس الاكيد انه لما بيشوفها بيرن في ودنه صوت كابتن ميمي الشربيني: "هشام عبد الرسول، يفض الاشتباك بينا وبين مالاوي، نجم المنيا الصاعد يشوط قنبلة تسكن الشباك"..
وقت ما حصلت القصة دي كلها انا مكنتش اتولدت، بس ابويا كان دايما يحكيلي قصة هشام عبد الرسول وانه كان لاعب عصري، وازاي لو راح كاس العالم كان فرق مع مصر قوي، وكان دايما يقولي "حظه كدا.. ربنا يعوضه"..
