13/06/2026
صداقة الرجالة في الgym ببعض ممكن تكون من أسمى العلاقات الإنسانية و أكثرهم صحة
في الجيم مفيش اسامي ولا رتب .. موظف بتمرن جنب دكتور جنب ظابط جنب بتاع اعلانات جنب مغني جنب واحد عاطل و بيدور على شغل.
كلنا سواسية .. محدش بيحاول يطنطط على حد و لا حد بينمر على حد ..
مجهودك هو مقياس رجولتك و الحديد هو الخصم و الحكم ..
بار فاضي بتتشجع..
٢٠٠ كيلو بتتشجع..
متنفس طبيعي لناس مكبوته و مفحوتة و نفسها تتشجع.. فبتشجع.
لو وقعت الكل بيجري عليك..
لو الوزن عاند هتسمع الف عاش..
و لو شديت معاه هتسمع تكبير و ما شاء الله.
اسمك بطل.. وحش .. كوتش .. دولي . .و كابتني .. احلي بكتير ع الودن من مستر فلان ولا استاذ علان .. و لا يا ريس ولا يا باشا ولا يا كبير
ممكن تقعد سنين ما تعرفش اسامي الناس اللي معاك في الجيم.... بس لما تشوفهم في حياتك االي برة .. تبتسموا لبعض في هدوء.. و سلام .. و كل واحد يكمل طريقه
من غير وجع قلب ولا حوارات .. ولا عتاب و لا مهاترات..
و ده بيخليها من أسهل و انضف الصداقات 💪🏽
